ໂຄງການສີ່ພັນດອນ ຊ່ວຍຊີວິດການເປັນຢູ່ຂອງປະຊາຊົນ ແຂວງຈຳປາສັກດີຂຶ້ນ
ຂປລ. ໂຄງການຄຸ້ມຄອງ, ຊົມໃຊ້ປາ ແລະ ສັດນໍ້າແບບຍືນຍົງ ຢູ່ເຂດສີ່ພັນດອນ ໄດ້ໃຫ້ ການສະໜັບສະໜູນ 114 ຄອບຄົວ ໃນ 20 ບ້ານເປົ້າໝາຍ ຢູ່ເມືອງໂຂງ ແລະ ເມືອງມຸນລະປະໂມກ ແຂວງຈໍາປາສັກ ເພື່ອພັດທະນາ, ສ້າງຄວາມສາມາດໃນການລິເລີ່ມຫາລ້ຽງຄອບຄົວແບບຍືນຍົງ ແລະ ເປັນການຫລຸດຜ່ອນການຫາປາໃນນໍ້າຂອງເປັນອາຊີບຫລັກ. ໂດຍໄດ້ສະໜອງແນວພັນ ເປັດ ແລະ ໄກ່ ລວມກັນເກືອບ 800 ໂຕ, ບູລະນະເສີມສ້າງໜອງປາທໍາມະຊາດ ແລະ ສ້າງໜອງປາ ໃນນາເຂົ້າລວມກັນເກືອບ 40 ໜອງ, ພ້ອມລູກປາເກືອບ 100.000 ໂຕ ໃຫ້ປະຊາຊົນກຸ່ມບ້ານເປົ້າໝາຍດັ່ງກ່າວ. ນອກຈາກນີ້, ທາງໂຄງການຍັງໄດ້ສະໜອງແບ້ ແລະ ແນວພັນຈິລີດ, ແນວພັນເຂົ້າ, ຝຶກເຕັກນິກການປູກເຂົ້າ, ລ້ຽງສັດ, ສົ່ງເສີມການປູກພັກອີ່ຮູມ ແລະ ອື່ນໆ ໃຫ້ບາງຄອບຄົວ.
ໂຄງການດັ່ງກ່າວ, ໄດ້ເລີ່ມຈັດຕັ້ງປະຕິບັດມາແຕ່ ປີ 2012 ໂດຍຈັດຕັ້ງປະຕິບັດຮ່ວມກັນ ລະ ຫວ່າງ ກົມລ້ຽງສັດ ແລະ ການປະມົງ ກະຊວງກະສິກຳ ແລະ ປ່າໄມ້, ຂະແໜງລ້ຽງສັດ ແລະ ການປະມົງແຂວງຈໍາປາສັກ ແລະອົງການກອງທຶນອະນຸຮັກທໍາມະຊາດໂລກ ປະຈໍາ ສປປ ລາວ (WWF-Laos) ໂດຍໄດ້ຮັບທຶນສະໜັບສະໜູນ ຈາກທຶນຊ່ວຍເຫລືອຂອງກະຊວງເພື່ອການຮ່ວມມື ແລະ ການພັດທະນາດ້ານເສດຖະກິດ ຂອງລັດຖະບານປະເທດເຢຍລະມັນ, ເຊິ່ງກິດຈະກໍາຫລັກຂອງໂຄງການ ລວມມີ ການຄຸ້ມຄອງການປະມົງ ແບບມີສ່ວນຮ່ວມ, ການລາດຕະເວນໜ້ານໍ້າ, ສ້າງຕັ້ງວັງສະ ຫງວນ ແລະ ຄະນະຄຸ້ມຄອງວັງສະຫງວນ, ສ້າງຄວາມເຂົ້າໃຈກ່ຽວກັບກົດໝາຍວ່າດ້ວຍການປະມົງ, ສະໜັບສະໜູນປັບປຸງຊີວິດການເປັນຢູ່ ໃຫ້ກັບຊຸມຊົນ ໃນເຂດສີ່ພັນດອນ, ປູກຈິດສໍານຶກຕໍ່ການຊົມ ໃຊ້ປາ ແລະ ສັດນໍ້າອື່ນໆ ໃຫ້ມີຄວາມຍືນຍົງ ແລະ ອື່ນໆ.
ທ້າວ ແຫລ້ ຊາວບ້ານນາ ເມືອງໂຂງ, ໜຶ່ງໃນຄອບຄົວຜູ້ໄດ້ຮັບຜົນປະໂຫຍດຈາກໂຄງການ,ໄດ້ໃຫ້ສຳພາດ ຕໍ່ທີມງານຂອງໂຄງການ ເມື່ອທ້າຍອາທິດຜ່ານມານີ້ວ່າ: ເມື່ອກ່ອນໄປຫາປາໃນນໍ້າຂອງເກືອບທຸກມື້ ເພື່ອຫາລ້ຽງຄອບຄົວ ແຕ່ຕອນນີ້ເກືອບວ່າບໍ່ໄດ້ໄປເລີຍໃນໄລຍະສອງປີຜ່ານມາ ການໄປຫາປາ ໃນແມ່ນໍ້າຂອງແມ່ນໄດ້ຫລຸດລົງຫລາຍ ເພາະບໍ່ໄດ້ດີຄືກັບແຕ່ກ່ອນ. ຫລັງຈາກມີໂຄງ ການນີ້ເຂົ້າມາ ແລະ ໄດ້ໃຫ້ການສະໜັບສະໜູນ ພ້ອມເຕັກນິກຄວາມຮູ້ວິຊາການຕໍ່ການລ້ຽງ ດັ່ງນັ້ນຄອບຄົວຂອງຂ້າພະເຈົ້າ ຈຶ່ງໄດ້ຫັນມາລ້ຽງເປັດ-ໄກ່ ແລະ ລ້ຽງປາໃນໜອງ-ນາເຂົ້າ. ທຳອິດໂຄງການໄດ້ສະໜັບສະໜູນລູກປາ ເກືອບ 4.000 ໂຕ ແລະ ແນວພັນເປັດ 10 ໂຕ, ປັດຈຸບັນແມ່ນຂະຫຍາຍພັນໄດ້ເປັນຈໍານວນຫລາຍ ແລະ ສາມາດເອົາມາເປັນອາຫານ ແລະ ຂາຍ ເພື່ອສ້າງລາຍຮັບໃຫ້ກັບຄອບຄົວ ແລະ ໄດ້ສົ່ງແນວພັນຄືນໃຫ້ກັບບ້ານ ເພື່ອໄປໃຫ້ຄອບຄົວອື່ນລ້ຽງຕໍ່.
ທ່ານ ວິພູ ຂຸນທະວົງ ຜູ້ຊີ້ນໍາໂຄງການສີ່ພັນດອນ ໄລຍະ 2 ອົງການ WWF-Laos ກ່າວວ່າ: ການສົ່ງເສີມ ແລະ ຫາທາງເລືອກອື່ນ ເພື່ອປະກອບສ່ວນຕໍ່ການສ້າງລາຍຮັບໃຫ້ກັບຄອບຄົວ ໃນເຂດອະນຸຮັກ ຄືໜຶ່ງໃນອົງປະກອບຂອງວຽກອະນຸຮັກ ເພາະຖ້າຊາວບ້ານມີທາງເລືອກອື່ນ ເພື່ອຫາລ້ຽງຄອບຄົວ ແລະ ລາຍຮັບແບບພໍພຽງທີ່ມີຄວາມຍືນຍົງກວ່າ ກໍ່ຈະຫລຸດຜ່ອນການໄປຫາປາ ໃນແມ່ນ້ຳ ຂອງຂອງຊາວບ້ານໄດ້ໃນລະດັບໜຶ່ງ.
ການສະໜັບສະໜູນປັບປຸງຊີວິດການເປັນຢູ່ ໃຫ້ກັບຊາວບ້ານ ທີ່ອາໄສຢູ່ໃນເຂດສີ່ພັນດອນ ຄືໜຶ່ງໃນກິດຈະກໍາຫລັກ ທີ່ໂຄງການສີພັນດອນໄລຍະ 2 ໃຫ້ຄວາມສໍາຄັນ ເພາະນີ້ຄືໜຶ່ງໃນວິທີທາງທີ່ຊ່ວຍໃຫ້ປະຊາຊົນໃນເຂດອະນຸຮັກປາມີລາຍຮັບເສີມ ແລະ ທາງເລືອກໃນການຫາລ້ຽງຄອບຄົວ ຊຶ່ງເຊື່ອວ່າຈະເປັນການຊ່ວຍໃຫ້ຫລຸດຜ່ອນການຫາປາໃນນໍ້າຂອງໄດ້.
