ປຸກລະດົມໃຫ້ມວນຊົນສົ່ງເສີມພຶດຕິກໍາທີ່ປອດໄພເພື່ອຕ້ານເອດ
ໃນວັນທີ 13 ທັນວານີ້, ອົງການສະຫະປະຊາຊາດຕ້ານເອດ ຮ່ວມກັບສະມາຄົມຜູ້ຕິດເຊື້ອເຮສໄອວີ ຫລື ເອດ (APL+) ແລະ ອົງການຈັດຕັ້ງທາງສັງຄົມ ໄດ້ຈັດກິດຈະກຳປຸກລະດົມໃຫ້ມວນຊົນໄປກວດເລືອດຊອກຫາເຊື້ອເອດ ຂຶ້ນຢູ່ສວນເຈົ້າອານຸວົງ ທີ່ນະຄອນຫລວງວຽງຈັນ, ເນື່ອງໃນໂອກາດວັນສາກົນຕ້ານເອດ 1 ທັນວາ ຄົບຮອບ 31 ປີ ພາຍໃຕ້ຄໍາຂວັນ “ຊຸມຊົນສ້າງຄວາມປ່ຽນແປງໄດ້”.
ໃນງານດັ່ງກ່າວຍັງເປັນໂອກາດເຜີຍແຜ່ຄວາມຮູ້ກ່ຽວກັບພະຍາດເອດໃຫ້ແກ່ຊຸມຊົນໄດ້ຮັບຮູ້ເຂົ້າໃຈໃຫ້ຖືສຳຄັນການເຂົ້າມາກວດເລືອດຊອກຫາເຊື້ອເອດ ແລະ ສົ່ງເສີມພຶດຕິກໍາທີ່ປອດໄພ, ພ້ອມຊ່ວຍເຮັດໃຫ້ອັດຕາການເສຍຊີວິດຍ້ອນພະຍາດເອດຫລຸດລົງ ແລະ ຜູ້ຕິດເຊື້ອໃຫ້ເຂົ້າມາຮັບການປິ່ນປົວທັນເວລາ, ທັງເປັນການເຕືອນໃຫ້ສັງຄົມຮູ້ວ່າພະຍາດເອດຍັງເປັນອຸປະສັກຕໍ່ບັນຫາສຸຂະ ພາບ ແລະ ການພັດທະນາອີກດ້ວຍ.
ປັດຈຸບັນ, ທົ່ວໂລກມີຜູ້ທີ່ຕິດເຊື້ອເອດຫລາຍກວ່າ 9,4 ລ້ານຄົນ, ທີ່ຍັງບໍ່ຮູ້ວ່າຕົນເອງຕິດເຊື້ອ. ສໍາລັບ ສປປ ລາວ ຄາດວ່າ 1 ໃນ 4 ຄົນ ຂອງຜູ້ຕິດເຊື້ອຍັງບໍ່ຮູ້ສະຖານະພາບຂອງຕົນເອງ, ຄົນສ່ວນຫລາຍຍັງບໍ່ທັນເຂົ້າມາຊອກຫາການປິ່ນປົວແຕ່ຫົວທີ ແລະ ຖ້າບໍ່ໄດ້ຮັບການປິ່ນປົວກໍຈະມີອາການປ່ວຍໜັກຂຶ້ນ ແລະ ເສຍຊີວິດໄດ້ຄື: ຢູ່ອາຊີປາຊີຟິກ ມີພຽງ 1 ໃນ 3 ຂອງໄວໜຸ່ມຈາກກຸ່ມປະຊາກອນສ່ຽງ ແລະ ເຄິ່ງໜຶ່ງຂອງຜູ້ຂາຍບໍລິການທາງເພດ, ຊາຍມີເພດສໍາພັນກັບຊາຍ, ຜູ້ໃຊ້ເຂັມຢາເສບຕິດ ແລະ ກຸ່ມກະເທີຍ ຮູ້ວ່າຕົນເອງຕິດເຊື້ອ.
ໃນ 31 ປີຜ່ານມາ, ຕັ້ງແຕ່ໄດ້ຈັດວັນສາກົນຕ້ານເອດຄັ້ງທໍາອິດໃນປີ 1988 ການໂຕ້ຕອບບັນຫາໂລກເອດໄດ້ມີຄວາມຄືບໜ້າຢ່າງຕໍ່ເນື່ອງ, ໃນທົ່ວໂລກມີຫລາຍກວ່າ 75% ຂອງຜູ້ຕິດເຊື້ອໄດ້ເຂົ້າເຖິງການກວດເລືອດ ແລະ ຮູ້ວ່າຕົນເອງຕິດເຊື້ອ, ການທີ່ຮູ້ວ່າຕົນເອງຕິດເຊື້ອເອດ ແລະ ໄດ້ກິນຢາປິ່ນປົວ 1 ເມັດຕໍ່ມື້ ສາມາດຄວບຄຸມເຊື້ອເອດ ແລະ ເຮັດໃຫ້ລະບົບພູມຄຸ້ມກັນແຂງແຮງ. ປັດຈຸບັນ, ຜູ້ຕິດເຊື້ອສາມາດດໍາລົງຊີວິດໄດ້ຍືນຍາວ, ມີສຸຂະພາບແຂງແຮງປົກກະຕິ ແລະ ມີອາຍຸຍືນສະເລ່ຍຂອງຜູ້ຕິດເຊື້ອທີ່ໄດ້ຮັບການປິ່ນປົວ ແມ່ນໄກ້ຄຽງກັບຜູ້ທີ່ບໍ່ຕິດເຊື້ອ. ສະນັ້ນການໄປກວດເລືອດ ແມ່ນປະຕູສຳຄັນທີ່ນຳໄປສູ່ການປ້ອງກັນເຊື້ອເອດ, ການປິ່ນປົວ, ການຮັກສາດູແລ ແລະ ຊ່ວຍເຫລືອ ເພື່ອໃຫ້ສຸຂະ ພາບແຂງແຮງ ແລະ ມີຊີວິດຍືນຍາວໄດ້.
