ການເກັບຄ່າບໍລິການລົດຕຸກໆ-ຈຳໂບ້ ເກີນກຳນົດຈະແກ້ແນວໃດ?

    ເມື່ອບໍ່ດົນມານີ້, ໄດ້ມີປະຊາຊົນໄດ້ສ່ອງແສງມາຍັງຫນັງສືພິມລາວພັດທະນາວ່າ: ມີການບໍລິການຂອງລົດຕຸກໆ, ຈຳໂບ້ ບາງຄັນສວຍໂອກາດ, ເກັບຄ່າບໍລິການເກີນກຳນົດ, ພ້ອມຍັງມີປະກົດການຈອດລົດຊະຊາຍຕາມທາງຄົນຍ່າງ ລວມທັງມາລະຍາດຂອງຜູ້ຂັບຂີ່ຈຳນວນໜຶ່ງ ແລະ ຕໍ່ບັນຫາດັ່ງກ່າວ ທາງໜັງສືພິມລາວພັດທະນາໄດ້ສອບຖາມໄປຍັງສະມາຄົມລົດຕຸກໆ, ຈຳໂບ້ ນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ ຍັງມີລົດຕຸກໆຈຳໂບ້ ຈຳນວນໜຶ່ງ ສວຍໂອກາດເກັບລາຄາບໍລິການແພງເກີນຈິງ ຄວາມເປັນຈິງແມ່ນມີແທ້, ເນື່ອງຈາກພວກເຂົາບໍ່ໄດ້ເຂົ້າເປັນສະມາຊິກຂອງສະມາຄົມ ແລະ ມີການເຄື່ອນໄຫວບໍ່ຖືກຕ້ອງ, ສົ່ງຜົນຕໍ່ຜູ້ປະກອບການ, ຜ່ານມາ ກໍມີປະຊາຊົນສະເຫນີມາຫລາຍແຕ່ກໍແກ້ໄຂບໍ່ໄດ້.

    ທ່ານ ບົວແຊງ ພິຊາລາດ ປະທານສະມາຄົມດັ່ງກ່າວ ໃຫ້ຮູ້ວ່າ: ປັດຈຸບັນ, ມີຜູ້ປະກອບການລົດຕຸກໆ-ຈຳໂບ້ ເຂົ້າມາເປັນສະມາຊິກຂອງສະມາຄົມກ່ວາ 900 ຄັນ, ໂດຍໄດ້ແບ່ງການບໍລິການອອກເປັນ 5 ເຂດ ແລະ ມີ 60 ຄິວບ່ອນຈອດລົດ ຢູ່ທົ່ວນະຄອນຫລວງວຽງຈັນ, ແຕ່ຄຽງຄູ່ກັນນັ້ນພົບເຫັນລົດທີ່ບໍ່ມີທະບຽນອະນຸຍາດກ່ວາ 15%, ໂດຍສະເພາະເປັນລົດປ້າຍເຫລືອງ, ທີ່ບໍ່ໄດ້ຂຶ້ນທະບຽນກັບສະມາຄົມ ແລະ ມາແລ່ນຕາມລຳພັງໂດຍບໍ່ຖືກຕ້ອງ, ຊຶ່ງພວກເຂົາແມ່ນເປັນກຸ່ມພະນັກງານ, ກຳມະກອນ ແລະ ອື່ນໆ ທີ່ອາໃສໂມງເລີກການ ຫລື ໃນໄລຍະແລງ ອອກມາເຄື່ອນໄຫວບໍລິການແລ່ນລົດຢ່າງຖືກຕ້ອງຊຶ່ງຈະຕ້ອງໄດ້ສືບຕໍ່ແກ້ໄຂ.

    ປະທານສະມາຄົມຂົນສົ່ງໂດຍສານ ຕຸກໆ-ຈຳໂບ້ ໃຫ້ຮູ້ວ່າ: ໂດຍປົກກະຕິແລ້ວ, ສະມາຊິກສະມາຄົມ ທີ່ມີສິດແລ່ນລົດ ແມ່ນຈະຕ້ອງໄດ້ເສຍຄ່າທຳນຽມຄື: 1 ລ້ານກີບກີບ ຕໍ່ຄັນຕໍ່ປີ, ທັງນີ້ ກໍເພື່ອປະກອບສ່ວນເສຍພັນທະແກ່ລັດ, ຊຶ່ງພາຍຫລັງເຂົ້າສະມາຄົມ ພວກເຮົາກໍຈະອອກໃບອະນຸຍາດແລ່ນລົດ ແລະ ມີການເກັບກຳໂດຍຕິດປ້າຍໃສ່ທາງໜ້າລົດ ເພື່ອບອກຈຸດບໍລິການຕ່າງໆ,  ທັງນີ້ ກໍເພື່ອຄວາມສະດວກຂອງລູກຄ້າ ແລະ ເມື່ອພົບເຫັນການບໍລິການບໍ່ຖືກຕ້ອງກໍສາມາດສ່ອງແສງມາຍັງສະມາຄົມໄດ້ ຊຶ່ງພວກເຮົາຈະມີການກວດກາຕາມລະບຽບ, ເພື່ອແນໃສ່ສະກັດກັ້ນປະກົດການຫຍໍ້ທໍ້ດັ່ງກ່າວໃຫ້ໝົດໄປ.