ນະຄອນຫລວງກຽມລົງມ້າງແຫລ່ງຄ້າປະເວນີຫລາຍຈຸດ

ຫົວຫນ້າຄະນະກໍາມະການຕ້ານການຄ້າມະນຸດນະຄອນຫລວງວຽງຈັນໃຫ້ຮູ້ວ່າ: ປັດຈຸບັນ, ໜ່ວຍງານຂອງຕົນກຽມສືບຕໍ່ລົງຕິດຕາມກວດກາ ແລະ ມ້າງແຫລ່ງຄ້າປະເວນີໃນຕົວເມືອງຫລາຍຈຸດຕາມສະຖານທີ່ບໍລິການຕ່າງໆ ເຊັ່ນ: ໂຮງແຮມ, ເຮືອນພັກ, ຮ້ານອົບນວດ, ຮ້ານກາເຟ, ຮ້ານບັນເທີງ-ຄາລາໂອເກະ ແລະ ຈຸດຫລໍ່ແຫລມອື່ນໆ, ຫລັງຈາກເຫັນວ່າບັນຫາດັ່ງກ່າວເປັນການກະທໍາທີ່ສົ່ງຜົນກະທົບຕໍ່ຮ່າງກາຍ, ຈິດໃຈ ແລະ ກຽດສັກສີ, ອິດສະຫລະພາບຂອງບຸກຄົນ ແລະ ແຕະຕ້ອງເຖິງຮີດຄອງປະເພນີອັນດີງາມຂອງຊາດ ແລະ ຜິດລະບຽບກົດໝາຍບ້ານເມືອງ, ທັງສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງຊາດອີກດ້ວຍ.

ເຊິ່ງເຂດຫລໍ່ແຫລມທີ່ມີການລັກລອບຄ້າປະເວນີຫລາຍກວ່າໝູ່ແມ່ນຢູ່ເສັ້ນທາງ 450 ປີ, ໜອງພະຍາ, ໜອງບຶກ, ຕານມີໄຊ, ດອນກອຍ, ດົງໂດກ, ຄໍາຮຸ່ງ, ດົງກະເລົາ, ທ່າງ່ອນ, ຫລັກ 19, ອຸດົມຜົນ ແລະ ອື່ນໆຄື: ໃນໄລຍະຜ່ານມາ, ເຈົ້າໜ້າທີ່ໄດ້ເຮັດບົດບັນທຶກ ແລະ ສຶກສາອົບຮົມຕໍ່ຜູ້ທີ່ຄ້າ ແລະ ຂາຍປະເວນີທີ່ມີທັງຄົນລາວ ແລະ ຕ່າງປະເທດຫລາຍກວ່າ 350 ຄົນຢູ່ຕາມຮ້ານເສີມສວຍ, ຮ້ານກາເຟ,​ ຮ້ານອາຫານ-ບັນເທີງແລະໂຮງແຮມຕ່າງໆ ທີ່ແອບແຝງຂາຍປະເວນີໄປພ້ອມ. ນອກນີ້, ຍັງໄດ້ສົ່ງຜູ້ທີ່ຕົກເປັນເຫຍື່ອການຄ້າປະເວນີ ແລະ ຄ້າມະນຸດກັບຄືນພູມລໍາເນົາ ແລະ ປະເທດເຂົາເຈົ້າເປັນຈໍານວນຫລາຍ.

ທ່ານຫົວຫນ້າຄະນະດັ່ງກ່າວໃຫ້ຮູ້ວ່າ: ຄຽງຄູ່ກັບການປະຕິບັດມາດຕະການດ້ານລະບຽບກົດໝາຍແລ້ວ, ກໍຈະໄດ້ເພີ່ມທະວີວຽກງານໂຄສະນາຜົນຮ້າຍຂອງການຄ້າມະນຸດຕາມສະຖານທີ່ຕ່າງໆເປັນຕົ້ນ: ດ່ານສາກົນ, ຈຸດຊຸມຊົນແອອັດ, ສະຖາບັນການສຶກສາ, ໂຮງຈັກ-ໂຮງງານ, ເຂດທ່ອງທ່ຽວ ແລະ ສະຖານທີ່ອື່ນໆ ເພື່ອເຮັດໃຫ້ບັນຫາບໍ່ດີດັ່ງກ່າວໝົດໄປເທື່ອລະກ້າວ.