ຍີ່ປຸ່ນ ກຽມຈ່າຍແສນລ້ານໂດລາ ຫວັງຟື້ນຟູເສດຖະກິດປະເທດ
ຣອຍເຕີລາຍງານວ່າ: ເຈົ້າໜ້າທີ່ຂອງລັດຖະບານຍີ່ປຸ່ນເປີດເຜີຍວ່າ: ລັດຖະບານຍີ່ປຸ່ນກຽມດຳເນີນມາດຕະການກະຕຸ້ນເສດຖະກິດ ໂດຍຈ່າຍເງິນຫລາຍກວ່າ 13 ຕື້ເຢນ ຫລື ປະມານ 120.000 ລ້ານໂດລາສະຫະລັດ ເພື່ອຊ່ວຍຮັກສາເສດຖະກິດຂອງປະເທດທີ່ກຳລັງຊຸດໂຊມ ໂດຍຈະເບີກຈ່າຍຈາກງົບປະມານເພີ່ມຕື່ມສຳລັບປີງົບປະມານ 2019 ແລະ ງົບປະຈຳປີສຳລັບປີງົບປະມານ 2020.
ທັງນີ້ ເສດຖະກິດຍີ່ປຸ່ນຂະຫຍາຍຕົວຊ້າໃນໄຕມາດ 3/2019 ໂດຍເສດຖະກິດຂະຫຍາຍຕົວພຽງ 0,1% ຈາກໄຕມາດກ່ອນ ເຊິ່ງເປັນອັດຕາການເຕີບໃຫຍ່ທີ່ຕ່ຳສຸດຂອງປີນີ້ ເນື່ອງຈາກຜົນກະທົບຈາກສົງຄາມການຄ້າ ແລະ ສະພາບເສດຖະກິດທົ່ວໂລກສົ່ງຜົນຕໍ່ຂະແໜງການສົ່ງອອກຂອງປະເທດ. ນອກຈາກນີ້ ການຂຶ້ນພາສີມູນຄ່າເພີ່ມເປັນ 10% ໃນເດືອນຕຸລາ ຍັງກະທົບຕໍ່ຂະແໜງການບໍລິໂພກພາຍໃນປະເທດນຳອີກ ທັງສອງປັດໄຈດັ່ງກ່າວສ້າງຄວາມກັງວົນວ່າເສດຖະກິດຍີ່ປຸ່ນອາດເຂົ້າສູ່ສະພາບຫລຸດຖອຍ.
ເຖິງຢ່າງໃດກໍຕາມ ມາດຕະການກະຕຸ້ນເສດຖະກິດດັ່ງກ່າວອາດສົ່ງຜົນຕໍ່ບັນຫາໜີ້ສາທາລະນະຂອງປະເທດ ເຊິ່ງປັດຈຸບັນຢູ່ໃນອັດຕາສ່ວນຫລາຍກວ່າ 238% ຕໍ່ GDP.
ນອກຈາກນີ້ ຍັງມີການຄາດຄະເນວ່າເງິນຈາກມາດຕະການກະຕຸ້ນເສດຖະກິດສຳລັບປີນີ້ອາດມີຈຳນວນບໍ່ຫລາຍ ໂດຍທ່ານ ທາຄູຍະ ໂຮຊິໂນ ນັກເສດຖະສາດອາວຸໂສຂອງໄດອິຈິໄລຟ໌ ບໍລິສັດປະກັນໄພຊັ້ນນຳຂອງຍີ່ປຸ່ນ ຊີ້ວ່າ: ມາດຕະການກະຕຸ້ນເສດຖະກິດສຳລັບປີງົບປະມານນີ້ອາດມີພຽງ 3-4 ຕື້ເຢນເທົ່ານັ້ນ ເຊິ່ງບໍ່ສາມາດເພີ່ມອັດຕາການເຕີບໃຫຍ່ທາງເສດຖະກິດຢ່າງມີໄນສຳຄັນໄດ້.
