ເຈັບທ້ອງເບື້ອງຂວາ ມີໂອກາດສ່ຽງເປັນຫຍັງໄດ້ແດ່ ?
ອາການເຈັບທ້ອງ
ຖືເປັນອາການຜິດປົກກະຕິທີ່ສ້າງຄວາມລຳບາກໃນການດຳເນີນຊີວິດປະຈຳວັນ ແລະ
ແນ່ນອນຕ້ອງມີສາເຫດທີ່ຮ່າງກາຍເຕືອນວ່າເຮົາອາດຈະເປັນຫຍັງຈັກຢ່າງ
ໃນທາງການແພດມີການແບ່ງອາການເຈັບທ້ອງວ່າເຈັບເບື້ອງໃດ ຕຳແໜ່ງໃດ
ຍ້ອນຈະເຮັດໃຫ້ບົ່ງມະຕິສາເຫດໄດ້ງ່າຍຫລາຍຂຶ້ນ. ໃນບົດຄວາມນີ້ມີຂໍ້ມູນກ່ຽວກັບອາການເຈັບທ້ອງເບື້ອງຂວາ
ໃຜທີ່ເຈັບທ້ອງເບື້ອງຂວາຕະຫລອດ ມາເບິ່ງກັນວ່າທ່ານອາດຈະເປັນພະຍາດຫຍັງໄດ້ແດ່ ດັ່ງນີ້
:
– ເຈັບທ້ອງບໍລິເວນເບື້ອງຂວາທາງເທິງ ເປັນບໍລິເວນທີ່ຢູ່ຂອງຕັບ, ຖົງນຳ້ບີ ແລະ ຕັບອ່ອນ ອາດເກີດໄດ້ຈາກ 2 ສາເຫດ :
1. ພະຍາດຕັບ ຫລື ໜິ້ວໃນຖົງນຳ້ບີ : ຈະເກີດຂຶ້ນຫລັງຈາກກິນອາຫານທີ່ມີໄຂມັນຫລາຍ ຫາກຄຳ ຫລື ກົດບໍລິເວນທີ່ປວດອາດຈະພົບກ້ອນຊີ້ນແຂງໆ ເມື່ອປ່ອຍປະໄວ້ດົນຈະສັງເກດໄດ້ວ່າ ມີອາການໂຕເຫລືອງ ແລະ ຕາເຫລືອງຫລາຍກ່ວາເກົ່າ.
2. ຕັບອ່ອນອັກເສບ : ບໍ່ວ່າຈະເຈັບທ້ອງພາກສ່ວນເທິງທາງຊ້າຍ ແລະ ຂວາ ເກີດຈາກການດື່ມອານກໍຮໍຫລາຍເກີນໄປ ສົ່ງຜົນໃຫ້ຕັບອ່ອນເຮັດວຽກຜິດປົກກະຕິ ແລະ ເກີດການອັກເສບໄດ້ ອາການເຈັບປວດອາດລາມໄປຫາຫລັງ.
– ເຈັບທ້ອງເບື້ອງຂວາທາງລຸ່ມ: ບໍລິເວນຂອງໄສ້ຕິ່ງ, ລຳໄສ້ນ້ອຍບາງສ່ວນ ແລະ ຮວຍໝາກໄຂ່ຫລັງ ອາດຈະເປັນຄວາມຜິດປົກກະຕິຕໍ່ໄປນີ້:
– ໄສ້ຕິ່ງອັກເສບ : ຫາກເຈັບທ້ອງແບບຈຸກແໜ້ນ ຕັ້ງແຕ່ສາຍບື ໄປຈົນຮອດທ້ອງນ້ອຍເບື້ອງຂວາ ຈົນຮູ້ສຶກຫາຍໃຈໄດ້ບໍ່ເຕັມປອດ, ຄຳເບິ່ງແລ້ວພົບກ້ອນຊີ້ນສວດອອກມາ ແລະ ເຈັບຫລາຍ ສັນນິຖານໄດ້ເລີຍວ່າ ທ່ານກຳລັງເປັນໄສ້ຕິ່ງອັກເສບ ຕ້ອງຟ້າວໄປໂຮງໝໍໂດຍໄວ ເພາະຖ້າໄສ້ຕິ່ງແຕກອອກມາຈະສົ່ງຜົນເຮັດໃຫ້ເກີດການຕິດເຊື້ອໃນອະໄວຍະວະພາກສ່ວນອື່ນໆໄດ້.
– ລຳໄສ້ປັ່ນປ່ວນ : ເປັນຄວາມຜິດປົກກະຕິຂອງລຳໄສ້ ຈະເຮັດໃຫ້ຮູ້ສຶກເຈັບທ້ອງບໍລິເວນເບື້ອງຂວາແບບຮູ້ສຶກປຸ້ນທ້ອງ, ບໍ່ສະບາຍທ້ອງ ບໍ່ມີອາການຮຸນແຮງຫຍັງຫລາຍ ແຕ່ກິນຢາຫລຸດກົດກໍສາມາດເຊົາໄດ້ເປັນປົກກະຕິ.
– ທໍ່ຍ່ຽວອັກເສບຕິດເຊື້ອ : ຈະຮູ້ສຶກເຈັບທ້ອງເບື້ອງຂວາທາງລຸ່ມລາມລົງໄປຈົນຮອດບໍລິເວນກົກຂາ ເກີດຈາກຄວາມຜິດປົກກະຕິຂອງຮວຍໝາກໄຂ່ຫລັງ ເປັນຜົນມາຈາກການກັ້ນຍ່ຽວເປັນເວລາດົນ, ບໍ່ເບິ່ງແຍງສຸຂະອະນາໄມໃນການເຂົ້າຫ້ອງນຳ້ ບາງເທື່ອອາດຈະພົບພະຍາດໜິ້ວໃນໝາກໄຂ່ຫລັງໄດ້.
– ເຈັບທ້ອງກ້ອງໂຄງກະດູກຂ້າງເບື້ອງຂວາ : ເກີດຈາກລຳໄສ້ນ້ອຍບໍ່ສາມາດດູດຊຶມອາຫານໄດ້. ອາການທີ່ພົບທົ່ວໄປແມ່ນແໜ້ນທ້ອງຮ່ວມກັບຈຸກທ້ອງຢ່າງຮຸນແຮງ, ແຕ່ບໍ່ຮຸນແຮງເທົ່າກັບໄສ້ຕິ່ງອັກເສບ ແຕ່ກໍບໍ່ຄວນປ່ອຍໄວ້ດົນ ເພາະຈະເຮັດໃຫ້ເປັນລຳໄສ້ອັກເສບ ຄວນໄປໂຮງໝໍເພື່ອຮັບການປິ່ນປົວໂດຍໄວທີ່ສຸດ.
– ເຈັບທ້ອງບໍລິເວນກົກແອວເບື້ອງຂວາ : ຕຳແໜ່ງນີ້ເປັນບ່ອນຢູ່ຂອງລຳໄສ້ໃຫຍ່ ແລະ ທໍ່ໝາກໄຂ່ຫລັງ ຖ້າເຈັບຕຳແໜ່ງນີ້ ແລະ ມີການຖ່າຍເປັນເລືອດຮ່ວມນຳ ອາດໝາຍເຖິງອາການລຳໄສ້ໃຫຍ່ມີການອັກເສບ ຄວນຟ້າວໄປໂຮງໝໍໂດຍໄວ ແຕ່ຖ້າເຈັບແບບເປັນໆເຊົາໆ ແຕ່ຮຸນແຮງຫລາຍຂຶ້ນພາຍຫລັງຈາກການກິນອາຫານເຄັມ ອາດເກີດຈາກການທີ່ໝາກໄຂ່ຫລັງເຮັດວຽກໜັກ ແລະ ເກີດການອັກເສບ ຫລຸດຜ່ອນດ້ວຍການດື່ມນຳ້ໃນປະລິມານຫລາຍຂຶ້ນ ເພື່ອໄລ່ຄວາມເຄັມອອກຈາກຮ່າງກາຍ.
