ຢ່າໃຫ້ ສສຊ ເວົ້າເສຍນ້ຳລາຍລ້າໆ
ໂດຍ: ບັນຫາຈານແຫຍ່.
ເຄີຍເປັນມະນຸດເງິນເດືອນຢູ່ສະພາແຫ່ງຊາດອາວເຫິງ ຄືແຕ່ສະພາແຫ່ງຊາດຊຸດທີ 2 ຮອດຊຸດທີ 7, ແຕ່ກໍບໍ່ເຄີຍພົບກັບເຫດການຄືທີ່ເກີດຂຶ້ນໃນກອງປະຊຸມສະພາແຫ່ງຊາດທີ່ພວມດຳເນີນຢູ່ໃນເວລານີ້, ເຫດການໜ້າຕື່ນເຕັ້ນດັ່ງກ່າວເກີດຂຶ້ນໃນວັນທີ 8 ພະຈິກນີ້, ເຊິ່ງເປັນມື້ທີ 2 ຂອງກອງປະຊຸມດັ່ງກ່າວ ເມື່ອທ່ານປະທານສະພາແຫ່ງຊາດ, ທັງເປັນປະທານກອງປະຊຸມໄດ້ຕັ້ງຄຳຖາມກ່ຽວກັບການມີໜ້າຂອງພະນັກງານຮັບຜິດຊອບເບື້ອງລັດຖະບານໃນກອງປະຊຸມ, ໂດຍໄດ້ຖາມຫາຕົວແທນຂະແໜງກະສິກຳ, ທະນາຄານ ແລະ ການຄ້າ ວ່າໄດ້ເຂົ້າມານັ່ງຕິດຕາມກອງປະຊຸມຢູ່ ຫລືບໍ່?.
ຜົນກໍຄືວ່າບໍ່ມີຕົວແທນຂະແໜງດັ່ງກ່າວເຂົ້າຮ່ວມກອງປະຊຸມ. ດັ່ງນັ້ນທ່ານປະທານກອງປະຊຸມຈິ່ງໄດ້ໃຫ້ແຈ້ງໃຫ້ທ່ານຮອງນາຍົກກ່ຽວກັບເລື່ອງນີ້, ທັງໄດ້ກ່າວເລີ່ມວ່າຖ້າບໍ່ມີຕົວແທນເຫລົ່ານີ້ໃນກອງປະຊຸມແລ້ວຊິໃຫ້ສະມາຊິກສະພາແຫ່ງຊາດ (ສສຊ) ເວົ້າໃຫ້ໃຜຟັງ?. ຈາກນັ້ນ, ທ່ານປະທານກໍໄດ້ສະເໜີໃຫ້ພະນັກງານວິຊາການໃນຂະແໜງການທີ່ກ່າວມາຂ້າງເທິງນັ້ນຍົກມືຂຶ້ນຖ້າພວກເຂົາມີໜ້າຕົວຈິງໃນກອງປະຊຸມ.
ຂ່າວທີ່ຈານແຫຍ່ເອົາມາທົບທວນຫວນຄືນນີ້ ແປມາຈາກພາສາອັງກິດໃນໜັງສືພິມວຽງຈັນທາມສະບັບວັນທີ 11 ພະຈິກນີ້ເອງ, ເຊິ່ງອາດຜິດຜ້ຽນຈາກຄຳເວົ້າທີ່ທ່ານປະທານກອງປະຊຸມເປັ່ງອອກມາຕົວຈິງແຕ່ເຊື່ອເນື້ອໃນນັ້ນຖືກຕ້ອງ.
ກອງປະຊຸມໃນມື້ນັ້ນ, ໄດ້ລົງເລິກກ່ຽວກັບການປະຕິບັດໜ້າທີ່ຂອງພະນັກງານ, ໂດຍສະເພາະແມ່ນບັນດາລັດຖະມົນຕີທີ່ຮັບຜິດຊອບຂະແໜງເສດຖະກິດ ທ່ານປະທານກອງປະຊຸມສະເໜີວ່າໃນກອງປະຊຸມສະພານັ້ນຢ່າງໜ້ອຍບັນດາຮອງລັດຖະມົນຕີທີ່ກ່ຽວຂ້ອງຄວນເຂົ້າຮ່ວມຕິດຕາມຄຳຄິດເຫັນ ແລະ ຂໍ້ສະເໜີຂອງສະມາຊິກສະພາແຫ່ງຊາດ ເພື່ອເປັນທິດທາງໃຫ້ລັດຖະບານນຳໃຊ້ຜັນຂະຫຍາຍທີ່ກ່ຽວຂ້ອງ. ໃນກໍລະນີລັດຖະມົນຕີຕິດຂັດ, ຢ່າງນ້ອຍກໍຄວນແຕ່ງຮອງລັດຖະມົນຕີເຂົ້າຮ່ວມແທນ ແລະ ວ່າໃນກອງປະຊຸມເທື່ອຕໍ່ໆໄປບັນດາລັດຖະມົນຕີບໍ່ຄວນຂາດ.
ຄືໄດ້ເວົ້າມາໃນແຖວຕົ້ນໆຂອງບົດນີ້ວ່າ: ຈານແຫຍ່ເຫັນເຫດການນີ້ເປັນເລື່ອງສຳຄັນຍິ່ງ ແລະ ຂໍຊົມເຊີຍທ່ານປະທານສະພາແຫ່ງຊາດ ທີ່ໄດ້ສະເໜີບັນຫານີ້ອອກມາຢ່າງເປີດເຜີຍ ແລະ ກົງໄປກົງມາ.
ໃນໄລຍະຜ່ານມານັ້ນ, ເຫລົ່າ ສສຊ ມີແຕ່ຈົມນ້ອຍອົກນ້ອຍໃຈເອົາເອງວ່າ ບັນດາສະມາຊິກລັດຖະບານທີ່ກອງປະຊຸມສະພາແຫ່ງຊາດເລືອກຂຶ້ນມາກັບມືນັ້ນບໍ່ໃຫ້ຄວາມສົນໃຈເທົ່າທີ່ຄວນກັບກອງປະຊຸມສະພາ, ມີໜ້າອ້າວຄົບແດ່ກໍແມ່ນໃນພິທີເປີດ ແລະ ປິດກອງປະຊຸມເທົ່ານັ້ນ.
ສ່ວນໃນເວລາດຳເນີນກອງປະຊຸມນັ້ນກໍມີເຮັດໃຫ້ເກີດແຕ່ “ຜູ້ແທນເວົ້າໃຫ້ຜູ້ແທນເອງຟັງ” ແລ້ວຈະແກ້ບັນຫາໄດ້ແນວໃດ. ໜ້າທີ່ຕົ້ນຕໍຂອງ ສສຊ ນັ້ນກໍຄືເປັນກະບອກສຽງໃຫ້ປະຊາຊົນ, ມີໜ້າທີ່ຕິດແທດພື້ນຖານປະຊາຊົນເພື່ອເກັບກຳບັນຫາ, ຄໍາຄິດຄຳເຫັນ, ຂໍ້ສະເໜີ ແລະ ຄວາມຂັດຂ້ອງໝອງໃຈຂອງປະຊາຊົນ ເພື່ອນຳເຂົ້າສູ່ກອງປະຊຸມສະພາ ທີ່ເປັນເວທີສູງສຸດທາງການເມືອງຂອງສະພາແຫ່ງຊາດ.
ຢູ່ປະເທດຂອງພວກເຮົາ 3 ອຳນາດລັດລ້ວນແຕ່ເຄື່ອນໄຫວເປັນເອກະພາບພາຍໃຕ້ການນຳຂອງພັກດຽວ ແຕ່ກໍມີໜ້າທີ່ຮັບຜິດຊອບລະອຽດຂອງໃຜລາວ. ດັ່ງນັ້ນຈຶ່ງຕ້ອງມີການພົວພັນປະສານງານກັນເປັນຕ່ອງໂສ້ ແລະ ນຳທຸກບັນຫາສຳຄັນຂອງຊາດເຂົ້າສູ່ການພິຈາລະນາຕົກລົງໃນກອງປະຊຸມສະພາ. ຈານແຫຍ່ ວ່າ: ການທີ່ທ່ານປະທານກອງປະຊຸມສະເໜີວ່າຢ່າງນ້ອຍບັນດາຮອງລັດຖະມົນຕີຄວນເຂົ້າຮ່ວມຕິດຕາມກອງປະຊຸມສະພານັ້ນ ເປັນການຜ່ອນຜັນພໍແຮງແລ້ວເພາະຮອງລັດຖະມົນຕີ ບໍ່ແມ່ນສະມາຊິກລັດຖະບານຢູ່ບາງປະເທດ. ຖ້າຈະໃຫ້ຖືກຕ້ອງແທ້ຄວນແມ່ນລັດຖະມົນຕີເອງເຂົ້າຮ່ວມຕິດຕາມກອງປະຊຸມ, ໃນກໍລະນີທ່ານຮອງລັດຖະມົນຕີທີ່ກ່ຽວຂ້ອງຂຶ້ນມີຄຳເຫັນ ຫລືຕອບຄຳຖາມ ສສຊ ໃນກອງປະຊຸມແທນທ່ານລັດຖະມົນຕີນັ້ນກໍຄວນມີເອກະສານມອບໝາຍຈາກທ່ານລັດຖະມົນຕີທີ່ກ່ຽວຂ້ອງຄັກແນ່, ບໍ່ຄວນບອກພຽງວ່າ “ໂດຍໄດ້ຮັບການມອບໝາຍຈາກທ່ານລັດຖະມົນຕີ”
ຈານແຫຍ່ເຊື່ອວ່າຈະໄດ້ເຫັນການມີໜ້າຂອງບັນດາລັດຖະມົນຕີ, ຮອງລັດຖະມົນຕີ ນັ່ງຕິດຕາມກອງປະຊຸມສະພາຫລາຍຂຶ້ນໃນຕໍ່ໜ້າຕາມການສະເໜີຂອງທ່ານປະທານສະພາແຫ່ງຊາດ.
