ມະຫັດສະຈັນ ຕ່ຳພົມລາວ ຜູ້ຕໍ່ຍອດສີໄມ້ລາຍມືລາວ ກ້າວຂຶ້ນສູ່ເວທີສາກົນ

ມະຫັດສະຈັນ ຕໍ່າພົມລາວ ເປັນໂຮງງານ ຜະລິດຜົນງານດ້ານສີໄມ້ລາຍມື ອັນເປັນສິລະປະ ທີ່ເກີດຈາກຄວາມມັກ-ຮັກ ແລະ ຫຼົງໄຫຼໃນລວດ ລາຍຜ້າ ແພລາວທີ່ສືບທອດມາແຕ່ບັນພະບຸລຸດລາວ ໂດຍປະຍຸກມາເປັນລາຍຜ້າພົມ ທີ່ມີແຫ່ງດຽວໃນ ປະເທດລາວ ແລະ ໄດ້ສ້າງຕັ້ງຂຶ້ນມາແຕ່ປີ 1998 ເຊິ່ງເປັນເວລາ 2 ທົດສະວັດແລ້ວ.

ເມື່ອກ້າວຂາເຂົ້າສູ່ສະຖານທີ່ດັ່ງກ່າວນີ້ ສິ່ງທີີ່ສະດຸດຕາທຳອິດ ກໍ່ຄືເອື້ອຍນ້ອງແມ່ຍິງນັ່ງຕໍ່າຜ້າພົມໃນກີ່ຕັ້ງຢືນຊື່ງແຕກຕ່າງຈາກກີ່ຕໍ່າຜ້າທົ່ວໄປ ບາງກີ່ກໍ່ມີ 2 ຄົນຕໍ່າ,ບາງກີ່ກໍ່ມີຮອດ8-9 ຄົນ ສຸດແລ້ວແຕ່ຄວາມກ້ວາງຂອງຜືນພົມທີ່ລູກຄ້າຕ້ອງການ, ພວກເຮົາຈະເຫັນແຕ່ສອງຝາມືນ້ອຍໆຂອງເອື້ອຍນ້ອງເໜັງຕີງດັ່ງຄຳບູຮານເພິ່ນວ່າ: ພວກເຂົາເຈົ້າ “ຂວໍ້າມືເປັນລາຍຫງາຍມືເປັນດອກ”. ຊ້າງເປັນໜ້າງຶດງໍ້ອັດສະຈັນແທ້ໆ.

ຍັງບໍ່ເທົ່ານັ້ນ ພວກເຮົາຍັງໄດ້ຍິນສຽງຂອງຫູກທີ່ເກີດຈາກການຕໍ່າຜ້າພົມ ເໝືອນດັ່ງໄດ້ຢູ່ໃນວົງດົນຕີທີ່ບັນເລງດ້ວຍມະໂຫລີອັນຍິ່ງໃຫຍ່ ເປັນຕາມ່ວນ ອອນຊອນ ເຂົ້າເຈົ້າໄດ້ຮ່ວມກັນປະສານສີມືລົງໃນຜືນພົມຢ່າງເປັນຈັງຫວະທີ່ມຸ້ງໝັ້ນໃນເປົ້າໜາຍດຽວກັນ ເຮັດໃຫ້ຜູ້ມາພົບພໍ້ສຳພັດໄດ້ເຖິງພະລັງແຫ່ງຄວາມຮັກ, ຄວາມປານີດ ແລະ ຄວາມຫຼົງໄຫຼໃນຜົນງານຕ່ຳພົມຈາກສືມືຂອງພວກເຂົ້າ.

ທ່ານ ນາງ ສຸວິຕາ ປະເສີດ ເຈົ້າຂອງ ໂຮງງານມະຫັດສະຈັນ ຕ່ຳພົມລາວ ໃຫ້ຮູ້ວ່າ: ຕົນເປັນຄົນທີ່ມັກ-ຮັກ ສິລະປະລວດລາຍຜ້າແພລາວ ບວກກັບໄດ້ແຮງບັນດານໃຈຈາກທາງຄອບຄົວ ຈຶ່ງໄດ້ຕັດສິນໃຈປະສົມປະສານສານລະຫວ່າງ ປະເພນີຕ່ຳຜ້າພື້ນເມືອງລາວ ແລະ ປະເພນີຕ່ຳພົມຈາກພາກກາງຂອງທະວີບອາຊີສ້າງເປັນຜະລິດຕະພັນຕົວໃໝ່,ວິຊາຊີບໃນການຕໍ່າພົມໄດ້ສ້າງ “ຜະລິດຕະພັນວິຈິດສິນ” ຊື່ງທໍາການຜະລິດດ້ວຍຈິດໃຈຄຽງຄູ່ກັບງານສີມື,ເນື້ອຂອງພົມຕໍ່າດ້ວຍເສັ້ນໃໝມ້ອນ, ຍ້ອມດ້ວຍສີທໍາມະຊາດທີ່ເປັນມິດກັບສິ່ງແວດລ້ອມ.ລວດລາຍທີ່ເນລະມິດລົງຜຶນພົມລ້ວນແລ້ວແຕ່ມີຄວາມໜາຍບົ່ງບອກເຖິງເອກະລັກ ແລະ ຄຸນຄ່າ, ສ້າງຄວາມສຸກ ແລະ ຄວາມປະທັບໃຈໃຫ້ແກ່ຜູ້ໄດ້ຄອບຄອງເປັນເຈົ້າຂອງ.

ບໍ່ພຽງເທົ່ານັ້ນ, ໂຮງງານແຫ່ງນີ້ໄດ້ກາຍເປັນແຫຼ່ງຮຽນຮູ້ ເປັນສູນສົ່ງເສີມສີມືແຮງງານໃຫ້ກັບຜູ້ດ້ອຍໂອກາດ ພິເສດໄດ້ສ້າງວຽກເຮັດງານທຳໃຫ້ແກ່່ຄົນພິການໄດ້ຕໍ່ຍອດດ້ານວິຊາການແລະພັດທະນາຢ່າງບໍ່ຢຸດຢອ່ນນັບຖືໄດ້ວ່າພູມປັນຍາດັ່ງກ່າວຈະກາຍເປັນມູນມໍລະດົກທາງປັນຍາ ແລະ ສີມືໃຫ້ແກ່ລູກຫຼານລາວເຮົາ, ສົມກັບສຸພາສິດລາວໄດ້ກ່າວໄວ້ວ່າ: “ມີພູມປັນຍາ ຫາກິນບໍ່ບົກ ຈົກກິນບໍ່ໝົດ”.

ມະຫັດສະຈັນ ຕ່ຳພົມລາວໄດ້ຄຽງບ່າຄຽງໄຫຼ່ກັບສະມາຊິກສະມາຄົມຫັດຖະກຳລາວ ເຂົ້າໄປປະກວດແຂ່ງຂັນຢູ່ພາຍໃນ ແລະ ຕ່າງປະເທດ ເຊິ່ງໄດ້ຮັບລາງວັນຫຼາຍໆຄັ້ງ, ປະດັບກຽດໃຫ້ແກ່ສີມືຊາວຊ່າງ, ໃຫ້ແກ່ສະມາຄົມ ແລະ ປະເທດຊາດ. ຫວ່າງບໍ່ໂດນມານີິິ້ ກໍ່ໄດ້ຮັບລາງວັນທຸລະກິດສ້າງສັນ2019 ໃນງານມະຫາກຳ ສີມືຫັດຖະກຳ. ຜ່ານມາໄດ້ສົ່ງຜລິດຕະພັນອອກກ່ວາ30ປະເທດໃນທົ່ວໂລກ. ປະຈຸບັນໄດ້ຮ່ວມມືກັບນັກອອກແບບຊື່ດັ່ງ ແລະຮ້ານຊື່ດັງລະດັບໂລກ Liberty Oriental carpets ທີ່ລອນດອນ ປະເທດອັງກິດ ຜລິດພົມທີ່ທ້າທາຍໃຊ້ໄໝມ້ອນ86ສີ.(ທ່ານທີ່ສົນໃຈສາມາດເຂົ້າໄປເບິ່ງໃນ Instagram)

ສຳລັບລູກຫຼານໄວໜຸ່ມຜູ່ທີ່ມັກ ຮັກສິລະປະຫັດຖະກຳ ແລະ ເພື່ອນມິດຜູ້ທີ່ສົນໃຈຂໍເຊີນມາຢ້ຽມຊົມ ແລະສັ່ງຈອງເປັນເຈົ້າຂອງໄດ້.

ໂຮງງານຕັ້ງຢູ່ບ້ານໜອງດ້ວງໃຕ້ ເມືອງຈັນທະບູລີ ນະຄອນຫລວງວຽງຈັນ ເປີດແຕ່ວັນຈັນ-ວັນເສົາໃນເວລາ 9:00-17:00 ຖ້າທ່ານໃດໄປບໍ່ຮອດຈອດບໍ່ເຖິງກໍສາມາດຕິດຕໍ່ໄດ້ທີ່ເບີ 021 216854, 020 5551 8189.