ຕຳຫລວດຮົງກົງຂູ່ຈະໃຊ້ລູກປືນແທ້ຍິງໃສ່ຜູ້ຊຸມນຸມ
ຕຳຫລວດຮົງກົງປະກາດເຕືອນກຸ່ມຜູ້ຊຸມນຸມໃຫ້ຢຸດໃຊ້ຄວາມຮຸນແຮງ ແລະ ອາວຸດອັນຕະລາຍໃນການຕໍ່ສູ້ກັບເຈົ້າໜ້າທີ່ ບໍ່ສະນັ້ນຈະຖືກຕອບໂຕ້ດ້ວຍການໃຊ້ລູກປືນແທ້.
ຄວາມຮຸນແຮງຈາກການປະທ້ວງຢູ່ຮົງກົງຍັງຄົງດຳເນີນໄປຢ່າງຕໍ່ເນື່ອງ ໂດຍສະເພາະໃນຄືນວັນທີ 17 ພະຈິກ ຢູ່ບໍລິເວນໜ້າມະຫາວິທະຍາໄລໂປລີເຕັກນິກ ໄດ້ກາຍສະພາບເປັນສະມໍລະພູມນ້ອຍ ລະຫວ່າງຜູ້ຊຸມນຸມໃນຍຶດຄອງພື້ນທີ່ມະຫາວິທະຍາໄລ ກັບຕຳຫລວດທີ່ພະຍາຍາມເຂົ້າໄປສະຫລາຍການຊຸມນຸມ ແຕ່ຈຸດທີ່ມີການປະທະກັນຮຸນແຮງທີ່ສຸດ ຢູ່ຂົວທີ່ເຊື່ອມລະຫວ່າງຮົງກົງກັບເກົາລູນ.
ຈາກຄວາມຮຸນແຮງໃນຄືນດັ່ງກ່າວ ເຮັດໃຫ້ຜູ້ບັງຄັບການຕຳຫລວດຮົງກົງໄດ້ອອກຖະແຫລງການລະບຸວ່າ: ຂໍໃຫ້ຜູ້ຊຸມນຸມຢຸດການໃຊ້ອາວຸດຮ້າຍແຮງທຸກຊະນິດເຊັ່ນ: ທະນູ, ລະເບີດໄຟ ລວມທັງລົດຍົນ ບໍ່ສະນັ້ນທາງເຈົ້າໜ້າທີ່ຈຳເປັນຕ້ອງໃຊ້ມາດຕະການທີ່ເດັດຂາດຂຶ້ນ ນັ້ນຄືການໃຊ້ລູກປືນແທ້ຍິງໃສ່, ແຕ່ກ່ອນການປະກາດ ເຈົ້າໜ້າທີ່ໄດ້ໃຊ້ລູກປືນແທ້ຍິງໃສ່ລົດຍົນຄັນໜຶ່ງທີ່ຄົນຂັບພະຍາຍາມແລ່ນຕຳຕຳຫລວດໄປໃນຕອນບ່າຍວັນທີ 17 ພະຈິກມາແລ້ວ.
ສ່ວນສະມາຊິກສະພາທ້ອງຖິ່ນຫລາຍຄົນ ໄດ້ພະຍາຍາມເຂົ້າໄປພາຍໃນບໍລິເວນມະຫາວິທະຍາໄລ ເພື່ອເຈລະຈາກັບແກນນຳຜູ້ຊຸມນຸມ ໃຫ້ຢຸດການໃຊ້ຄວາມຮຸນແຮງ ແຕ່ບໍ່ສາມາດເຂົ້າໄປໄດ້.
ຂະນະທີ່ອະທິການບໍດີຂອງມະຫາວິທະຍາໄລ ໄດ້ອອກມາຂໍຮ້ອງໃຫ້ຜູ້ຊຸມນຸມຢຸດການໃຊ້ພື້ນທີ່ໃນມະຫາວິທະຍາໄລ ເພາະເປັນສະຖານສຶກສາທີ່ໃຊ້ສຳລັບໃຫ້ຄວາມຮູ້ແກ່ນັກສຶກສາ ບໍ່ແມ່ນເປັນບ່ອນລີ້ຊ້ອນ ຫລື ກໍ່ຄວາມຮຸນແຮງໃດໆທັງໝົດ.
