ລາວຕັດຫລາຍຂັ້ນຕອນການຈົດທະບຽນວິສາຫະກິດໃໝ່
ກະຊວງອຸດສາຫະກໍາ ແລະ ການຄ້າ ໃຫ້ຮູ້ວ່າ: ຂະແໜງການຂອງຕົນໄດ້ຕັດຫລາຍຂັ້ນຕອນໃນການຂໍຈົດທະບຽນວິສາຫະກິດລົງ, ຫລັງຈາກຜ່ານມາໄດ້ຮັບການສະເໜີຈາກນັກລົງທຶນ ກໍຄືຜູ້ປະກອບການຫລາຍບັນຫາວ່າການຂໍຈົດທະບຽນສ້າງຕັ້ງບໍລິສັດແມ່ນໃຊ້ເວລາດົນ, ພ້ອມທັງມີການຮຽນຮ້ອງເອົາເງື່ອນໄຂຕ່າງໆແບບບໍ່ເໝາະສົມ.
ບັນຫາດັ່ງກ່າວ, ໄດ້ຮັບການຊີ້ແຈງຢູ່ກອງປະຊຸມທຸລະກິດລາວຄັ້ງທີ 12 ເມື່ອບໍ່ດົນມານີ້, ເຊິ່ງຜູ້ຕາງໜ້າກະຊວງອຸດສາຫະກໍາ ແລະ ການຄ້າ ໄດ້ກ່າວວ່າ: ມາຮອດປັດຈຸບັນ, ຂະແໜງການຂອງຕົນ ໄດ້ປັບປຸງແກ້ໄຂຫລາຍດ້ານ ເພື່ອສ້າງເງື່ອນໄຂໃຫ້ແກ່ວຽກງານການຂໍຈົດທະບຽນວິສາຫະກິດໄວ້ຂຶ້ນ, ໂດຍສະເພາະກິດຈະການທີ່ບໍ່ຢູ່ໃນບັນຊີຄວບຄຸມແມ່ນເຈົ້າໜ້າທີ່ທະບຽນສາມາດອອກໃບທະບຽນວິສາຫະກິດໃຫ້ເລີຍ, ໂດຍຊ້າສຸດບໍ່ເກີນ 10 ວັນລັດຖະການ, ໄດ້ລົບລ້າງການອອກໃບຢັ້ງຢືນເລກປະຈໍາຕົວຜູ້ເສຍອາກອນ ແລ້ວອອກເລກດັ່ງກ່າວ.
ພ້ອມກັນກັບການອອກໃບທະບຽນວິສາຫະກິດ ແລະ ສາມາດໃຊ້ແທນໃບທະບຽນອາກອນທຸກຊະນິດອີກດ້ວຍ, ພ້ອມໄດ້ຍົກເລີກໃບສັ່ງຈອງຊື່ວິສາຫະກິດ, ພ້ອມທັງລົບລ້າງຮ່າງແບບຟອມໃບຢັ້ງຢືນທີ່ຕັ້ງສໍານັກງານ ຫລື ສາຂາຂອງວິສາຫະກິດອອກຈາກຂັ້ນຕອນການແຈ້ງຂຶ້ນທະບຽນວິສາຫະກິດ, ຍົກເລີກການອອກໃບອະນຸຍາດຄວັດກາປະທັບ ແລະ ໃບອະນຸຍາດເນື້ອໃນປ້າຍຊື່ວິສາຫະກິດ, ຫລຸດຂັ້ນຕອນການຈົດທະບຽນປະກັນສັງຄົມຈາກ 3 ອາທິດໃຫ້ເຫລືອ 1-2 ວັນ, ຫລຸດຂັ້ນຕອນການກວດສອບປະຫວັດຜູ້ລົງທຶນຈາກ 10 ວັນໃຫ້ເຫລືອ 5 ວັນ. ສັງລວມແລ້ວເຫັນວ່າຂັ້ນຕອນການເລີ່ມຕົ້ນທຸລະກິດໄດ້ຫລຸດຈາກ 10 ລົງມາເຫລືອ 4 ຂັ້ນຕອນ ແລະ ຫລຸດຈາກ 228 ວັນລົງມາບໍ່ໃຫ້ເກີນ 40 ວັນ, ອັນໄດ້ເຮັດໃຫ້ການຂຶ້ນທະບຽນວິສາຫະກິດມີຄວາມສະດວກຂຶ້ນ.
