ສສຊ ສຸມໃສ່ປະກອບຄໍາເຫັນໃສ່ບົດລາຍງານຂອງລັດຖະບານ
ໃນວາລະດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII, ທ້າຍອາທິດຜ່ານມາ, ບັນດາສະມາຊິກສະພາແຫ່ງຊາດ (ສສຊ) ໄດ້ພ້ອມກັນສຸມໃສ່ປະກອບຄໍາຄິດຄໍາເຫັນໃສ່ບົດລາຍງານຂອງລັດຖະບານ, ບົດລາຍງານຂອງອົງການກວດສອບແຫ່ງລັດ ແລະ ອົງການກວດສອບລັດຖະບານ, ໂດຍລວມແລ້ວເຫັນດີເປັນເອກະພາບຕໍ່ບົດລາຍງານດັັ່ງກ່າວ ແຕ່ຍັງມີບາງບັນຫາທີ່ ສສຊ ສະເໜີໃຫ້ລັດຖະບານ ກໍຄືກະຊວງກ່ຽວຂ້ອງ ສຸມໃສ່ປັບປຸງແກ້ໄຂ ໂດຍສະເພາະບັນຫາການນໍາເຂົ້າ-ສົ່ງອອກສິນຄ້າ, ບັນຫາການແກ້ໄຂຄວາມທຸກຍາກຂອງປະຊາຊົນ, ການລົງທຶນຂອງພາກລັດ ແລະ ເອກະຊົນ, ການຈັດສັນງົບປະມານ, ປັບປຸງ ແລະ ສົ່ງເສີມການທ່ອງທ່ຽວ, ການພັດທະນາຊົນນະບົດ ແລະ ອື່ນໆດັ່ງ:
ທ່ານ ທອງດີ ຈັນທະວົງ ສສຊ ເຂດເລືອກຕັ້ງທີ 14 ແຂວງ ສາລະວັນ ໄດ້ສະເໜີໃຫ້ລັດຖະບານ ມີມາດຕະການສະເພາະ ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ, ຜົນກະທົບຈາກໄພພິບັດ, ເປັນຕົ້ນແມ່ນການຟື້ນຟູລະບົບຊົນລະປະທານ, ແນວພັນຕ່າງໆ ໃຫ້ທັນໄດ້ລະດູການ ແລະ ອື່ນໆ. ພ້ອມນີ້, ທ່ານ ບຸນປັນ ດວງລາຕີ ສສຊ ເຂດເລືອກຕັ້ງທີ 12 ແຂວງ ຄໍາມ່ວນ ໄດ້ສະເໜີພາກສ່ວນກ່ຽວຂ້ອງເບິ່ງຄືນກ່ຽວກັບການແບ່ງຊັດສ່ວນງົບປະມານ ເຖິງວ່າບັນລຸຕາມເປົ້າໝາຍຢູ່ຂັ້ນສູນກາງ ແຕ່ຂັ້ນທ່ອງຖິ່ນຍັງພົບຄວາມທຸກຍາກ ຍ້ອນການແບ່ງຊັດສ່ວນບໍ່ສົມດູດ, ພ້ອມທັງເບິ່ງຄືນກ່ຽວກັບການສົ່ງອອກແຮ່ທາດ ແຂວງຄໍາມ່ວນກໍເປັນຈຸດໜຶ່ງທີ່ສົ່ງອອກຫີນປະເພດນີ້ ແຕ່ວ່າການສົ່ງອອກມີຄວາມສ່ຽງ ຍ້ອນການສົ່ງອອກຜ່ານດ່ານປະເວນີ້ ບໍ່ແມ່ນດ່ານສາກົນ.
ທ່ານ ໄຊພອນ ຄຸນສີລິເຮືອງ ສະມາຊິກສະພາແຫ່ງຊາດ ເຂດເລືອກຕັ້ງທີ 3 ແຂວງ ຫຼວງນໍ້າທາ ໄດ້ສະເໜີໃຫ້ລັດຖະບານ ເພີ່ມການລົງທຶນ, ພ້ອມທັງເພີ່ມກໍາລັງເຂົ້າໃນວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ປະຊາຊົນຫຼາຍຂຶ້ນ, ລົງທຶນພັດທະນາຈຸດສຸມ ແລະ ສ້າງຈຸດສຸມ ໃຫ້ເປັນຕົວແບບໃນການພັດທະນາ ແລະ ສ້າງກຸ້ມບ້ານນ້ອຍໃຫ້ກາຍເປັນຕົວເມືອງໃນຊົນນະບົດ ແລະ ທ່ານ ຄໍາວອນ ບຸນທະວົງ ສສຊ ເຂດເລືອກຕັ້ງທີ 8 ແຂວງຫົວ ໄດ້ສະເໜີວ່າ: ການແກ້ໄຂຄວາມທຸກຍາກຂອງປະຊາຊົນ ໃນປີ 2020 ລັດຖະບານໄດ້ກໍານົດສູ້ຊົນສ້າງຄອບຄົວພົ້ນທຸກໃຫ້ບັນລຸໄດ້ 3.234 ຄອບຄົວ ແຕ່ການຈັດຕັ້ງປະຕິບັດຕົວຈິງ ຈະບໍ່ສາມາດບັນລຸໄດ້ ຖ້າອີງໃສ່ມາດຕະຖານການພົ້ນທຸກສະບັບໃໝ່ ກໍານົດຕົວເລກຄ້ອນຂ້າງສູງ, ສ່ວນການລົງທຶນຂອງລັດ ຜ່ານມາບໍ່ມີບັນຍາກາດຟົດຟື້ນເທົ່າທີ່ຄວນ ຍ້ອນບັນຫາທຶນ ແລະ ການສະໜອງທຶນຍັງບໍ່ຫຼາຍ ສ່ວນໃຫຍ່ແມ່ນລົງທນໃສ່ໂຄງການສືບຕໍ່ ສ່ວນໂຄງການໃໝ່ ຍັງບໍ່ທັນໄດ້ຮັບການສະໜອງທຶນທີ່ພຽງພໍກັບຄວາມຮຽກຮ້ອງຕ້ອງການຂອງປະຊາຊົນ ໂດຍສະເພາະ ການລົງທຶນໃສ່ພື້ນຖານໂຄງລ່າງ, ການລົງທຶນພາຍໃນ ແລະ ຕ່າງປະເທດຍັງມີໜ້ອຍ ສະເໜີໃຫ້ພາກສ່ວນກ່ຽວຂ້ອງພິຈາລະນາແກ້ໄຂເພີ່ມຢ່າງຮີບດ່ວນ.
