ອີຣານພົບບໍ່ນ້ຳມັນໃໝ່ຫລາຍກວ່າ 5 ໝື່ນລ້ານບາເຣລ
ປະທານາທິບໍດີອີຣານ ປະກາດວ່າ: ພົບບໍ່ນ້ຳມັນໃໝ່ມີນ້ຳມັນດິບ 5,3 ໝື່ນລ້ານບາເຣລ ຊ່ວຍເພີ່ມປະລິມານນ້ຳມັນສຳຮອງພິສູດແລ້ວຫລາຍກວ່າ 1 ໃນ 3.
ປະທານາທິບໍດີ ຮຳຊັນ ໂຣຮານີ ຂອງອີຣານ ຖະແຫລງຜ່ານໂທລະພາບວ່າ: ພົບບໍ່ນ້ຳມັນແຫ່ງໃໝ່ຄວບຄຸມເນື້ອທີ່ 2.400 ກິໂລຕາແມັດ ເລິກ 80 ແມັດ ຕັ້ງຢູ່ແຂວງຄູເຊສະຖານ ທາງເບື້ອງທິດຕາເວັນຕົກສຽງໃຕ້ຂອງປະເທດ ໄລຍະຍາວຈາກຊາຍແດນອີຣັກໄປເມືອງໂອມິດິເຍ “ນີ້ເປັນຂອງຂວັນເລັກໜ້ອຍທີ່ລັດຖະບານມອບໃຫ້ຊາວອີຣານ”. ປະທານາທິບໍດີ ກ່າວ.
ບີພີ ເຄີຍຕີລາຄາວ່າ: ອີຣານ ມີນ້ຳມັນດິບສຳຮອງພິສູດແລ້ວ 1,55 ແສນລ້ານບາເຣລ ເຊິ່ງນ້ຳມັນທີ່ພົບໃນບໍ່ໃໝ່ຄິດເປັນປະມານ 34%.
ອີຣານ ເປັນສະມາຊິກຜູ້ສ້າງຕັ້ງກຸ່ມໂອເປັກ ແລະ ມີນ້ຳມັນສຳຮອງໃຫຍ່ເປັນອັນດັບ 4 ຂອງໂລກ ມີແຫລ່ງແກັສສຳຮອງເປັນອັນດັບ 2 ຂອງໂລກ, ແຕ່ຕອນນີ້ມີບັນຫາເລື່ອງການຂາຍນ້ຳມັນ ຫລັງຈາກປະທານາທິບໍດີ ໂດນັລ ທຣຳ ຂອງອາເມລິກາ ຖອນຕົວອອກຈາກຂໍ້ຕົກລົງນິວເຄຼຍ ປີ 2015 ແລະ ກັບມາຂວ້ຳບາດອີຣານແຕ່ພຽງຝ່າຍດຽວ.
ຂະນະທີ່ພາຄີທີ່ເຫລືອ ທັງອັງກິດ, ຈີນ, ຝຣັ່ງ, ເຢຍລະມັນ ແລະ ຣັດເຊຍ ພະຍາຍາມເກັບຂໍ້ຕົກລົງໄວ້ ໂດຍຫລີກເວັ້ນມາດຕະການຂວ້ຳບາດຂອງອາເມລິກາ ແຕ່ເຖິງບັດນີ້ຄວາມພະຍາຍາມກໍໄດ້ຜົນໜ້ອຍ.
