ມີສະພາບໂຈນເຄື່ອນໄຫວລັກທອງໝໍ້ແປງໄຟຟ້າ
ຝ່າຍປະຕິບັດການໄຟຟ້ານະຄອນຫລວງວຽງຈັນ ໄດ້ຮຽກຮ້ອງໃຫ້ສັງຄົມຊ່ວຍເປັນຫູເປັນຕາ ຫາກພົບເຫັນການກະທຳຂອງກຸ່ມຄົນບໍ່ດີເຄື່ອນໄຫວລັກຕັດສາຍໄຟ ແລະ ລັກເອົາທອງໃນໝໍ້ແປງໄຟຟ້າທີ່ປາກົດຂຶ້ນໃນປັດຈຸບັນ, ພາຍຫລັງເມື່ອວັນທີ 4 ພະຈິກນີ້, ໄດ້ມີພວກກຸ່ມຄົນບໍ່ດີລັກເອົາເຄື່ອງອາໄຫລ່ ແລະ ສາຍທອງໃນໝໍ້ແປງໄຟຟ້າທີ່ກຳລັງຕິດຕັ້ງຢູ່ສຳນັກງານປົກຄອງເມືອງໄຊທານີ(ຫລັງໃໝ່), ສະນັ້ນຕໍ່ກັບສະພາບດັ່ງກ່າວ ຈຶ່ງຂໍເຕືອນໃຫ້ສັງຄົມເອົາໃຈໃສ່ຊ່ວຍເປັນເຈົ້າການຕິດຕາມ ແລະ ປົກປັກຮັກສາຊັບສິນສ່ວນລວມ ແລະ ຂອງຊາດ, ຖ້າພົບເຫັນໃຫ້ລາຍງານເຈົ້າໜ້າທີ່ ແລະ ພາກສ່ວນກ່ຽວຂ້ອງໂດຍໄວ ເພື່ອນໍາຈັບຕົວຄົນຮ້າຍມາດໍາເນີນຄະດີໃຫ້ໄດ້ໂດຍໄວ.
ຝ່າຍປະຕິບັດການໄຟຟ້ານະຄອນຫລວງວຽງຈັນ ໃຫ້ຮູ້ວ່າ: ກ່ອນໜ້ານີ້, ໄດ້ມີກຸ່ມຄົນບໍ່ດີໄປລັກຕັດສາຍໄຟຟ້າຢູ່ເຂດເສັ້ນທາງ 450 ປີ, ຊຶ່ງໄດ້ເຮັດໃຫ້ໄຟ
ຟ້າໃນເຂດດັ່ງກ່າວຕັດຂາດແລ້ວທາງເຈົ້າໜ້າທີ່ກໍສາມາດຕິດຕາມຈັບຄົນຮ້າຍກໍ່ເຫດມາໄດ້ 1 ຄົນ, ຊຶ່ງເປັນໄວລຸ້ນໃນເຂດດັ່ງກ່າວ. ສະນັ້ນຈຶ່ງຂໍາໃຫ້ສັງຄົມຊ່ວຍກັນເປັນຫູເປັນຕາຄຸ້ມຄອງດູແລ ຫາກພົບຄົນບໍ່ດີກໍໃຫ້ໂທສາຍດ່ວນຄື: 1199 ໄດ້ຕະຫລອດ 24 ຊົ່ວໂມງ.
