ບຸນນະມັດສະການພະທາດຫລວງຈະໄດ້ເພີ່ມທະວີຮັກສາຄວາມສະຫງົບ.
ໃນທ້າຍອາທິດທີ່ຜ່ານມາ, ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໄດ້ຜ່ານແຜນ ແລະ ບັນຈຸກໍາ ລັງເຂົ້າປ້ອງກັນງານບຸນນະມັດສະການພຣະທາດຫຼວງວຽງຈັນ ແລະ ງານວາງສະແດງສິນຄ້າຢູ່ສູນການຄ້າລາວ-ໄອເຕັກ ເຊິ່ງຈັດຂຶ້ນໃນລະຫວ່າງ 5 ຫາ 11 ພະຈິກ ນີ້, ເພື່ອບັນຈຸກໍາລັງຫຼາຍຮ້ອຍສະຫາຍເຂົ້າປະຈໍາຢູ່ຈຸດຕ່າງໆ ເຮັດໜ້າທີ່ອໍານວຍຄວາມສະດວກໃຫ້ຜູ້ໃຊ້ລົດ-ໃຊ້ຖະໜົນທີ່ຈະມາທ່ຽວບຸນນະມັດສະການພຣະທາດຫຼວງ ມີຄວາມເປັນລະບຽບຮຽບຮ້ອຍ ແລະ ປອດໄພ.
ທ່ານ ພັນໂທ ເພັງສະຫວັນ ທໍາມະບູນ ຫົວໜ້າພະແນກຈະລາຈອນ ນະຄອນຫລວງວຽງຈັນ ໃຫ້້ຮູ້ວ່າ: ໃນງານບຸນມະນັດສະການພຣະທາດຫຼວງປີນີ້ ຈັດຂຶ້ນພ້ອມກັບການເປີດປີທ່ອງທ່ຽວລາວ-ຈີນ, ເຊິ່ງງານຄັ້ງນີ້ຈະຈັດຂຶ້ນຍິ່ງໃຫຍ່ກວ່າທຸກປີຜ່ານມາ, ດັ່ງນັ້ນສະພາບການສັນຈອນ ອາດຈະມີຄວາມແອອັດຢູ່ຕາມເສັ້ນທາງຕ່າງໆຄື: ທາງໄກສອນ, ໜອງບອນ, ກໍາແພງເມືອງ ແລະ ເສັ້ນທາງທາດຫຼວງ ເພື່ອຮັບມືກັບສະພາບການດັ່ງກ່າວ ພະແນກຕໍາຫຼວດຈະລາຈອນ ນະຄອນຫລວງວຽງຈັນຈະໄດ້ ນໍາໃຊ້ກໍາລັງ 400 ກວ່າສະຫາຍ, ໃສ່ຈຸດປ້ອງກັນວົງໃນ, ແລະ ວົງນອກ 80 ຈຸດ ແລະ ເຮັດໜ້າທີ່ປະຈໍາປ້ອມ, ທາງແຍກ, ທາງຮ່ອມ, ທາງວົງວຽນຄື: ປ້ອມປະຕູໄຊ, ແຍກທູດຫວຽດນາມ, ແຍກທູດທະນາຄານອິນດູຈີນ, ໄຟອໍານາດໂພນສະອາດ, ແຍກຫ້ອງການບ້ານໂພນສະອາດ, ແຍກໜອງສ້າງທໍ່, ວົງວຽນ 450 ປີ, ທາງເຂົ້າດາວແດງເກົ່າ, ແຍກປໍ້ານໍ້າປະປາກໍ້າເໜືອ-ກໍ້າໃຕ້, ແຍກຫ້ອງການບ້ານໂພນເຄັງ, ປ້ອມຮ່ອງແຊງ, ແຍກລົງໂພນພະເນົາ, ແຍກໄຟອໍານາດໜອງໜ່ຽງ, ປ້ອມຫຼັກ 6, ປ້ອມດົງໂດກ, ແຍກສະພາ, ແຍກສີສັງວອນ, ແຍກທູດໂປໂລຍ, ສາມແຍກນາໄຊ, ຈຸດປ້ອງກັນລາວ-ໄອເຕັກ, ແຍກສູນກາງຊາວໜຸ່ມ, ແຍກໄຟແດງໂພນໄຊ, ແຍກປົກຄອງ ບ້ານໂພນໄຊ, ແຍກທູດອັງກິດ, ແຍກປໍ້ານໍ້າມັນໂພນໄຊເກົ່າ ແລະອື່ນໆ. ສໍາລັບຈຸດວົງນອກ ແມ່ນປະກອບດ້ວຍບັນດາປ້ອມ ແລະ ເຂົ້າ-ອອກເມືອງ.
ໂອກາດດຽວກັນນີ້, ຫົວໜ້າພະແນກ ກໍໄດ້ເນັ້ນຄະນະພັກ-ຄະນະບັນຊາພະແນກຕໍາຫຼວດຈະລາຈອນ ຕະຫຼອດຮອດພະນັກງານທີ່ເຮັດໜ້າທີ່ປ້ອງກັນບຸນທາດຫຼວງວຽງຈັນ ໃຫ້ມີຄວາມຮັບຜິດຊອບສູງຕໍ່ໜ້າທີວຽກງານທີ່ໄດ້ມອບໝາຍໃຫ້, ຮັບປະກັນໃຫ້ງານບຸນດັ່ງກ່າວມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພດ້ານການສັນຈອນ ພ້ອມທັງຮຽກຮ້ອງມາຍັງຜູ້ໃຊ້ລົດ-ໃຊ້ຖະໜົນ ໃຫ້ມີຄວາມລະມັດລະວັງສູງໃນການຂັບຂີ່ ພ້ອມກັນປະຕິບັດຕາມແຈ້ງການ, ຄໍາແນະນໍາຂອງຕໍາຫຼວດຈະລາຈອນປະຈໍາຈຸດ ໂດຍສະເພາະແມ່ນການຈອດລົດ.
ເຈົ້າໜ້າທີ່ ປກສ ນະຄອນຫລວງວຽງຈັນ ໃຫ້ຮູ້ວ່າ: ໃນໄລຍະຈັດງານບຸນນະມັດສະການພະທາດຫລວງວຽງຈັນ ໃນປີຜ່ານມາ ມີປະກົດການຫຍໍ້ທໍ້ເກີດຂຶ້ນ 27 ເລື່ອງ, ໃນນີ້ລັກຊັບ 4 ເລື່ອງ, ແຫກກະເປົາ 4 ເລື່ອງ, ລ່ວງກະເປົາ 19 ເລື່ອງ ແລະ ອື່ນໆ ເຈົ້າໜ້າທີ່ສາມາດຈັບຕົວຜູ້ກະທຳຜິດມາດຳເນີນຄະດີໄດ້ ກ່ວາ 10 ຄົນ.
