ລາວທຳລາຍນ້ຳມັນເຄື່ອງປອມກວ່າ 4.600 ລິດ

ເມື່ອ​ທ້າຍ​ອາທິດ​ຜ່ານ​ມາ ນີ້, ກະຊວງອຸດສາຫະກຳ ແລະ ການຄ້າ ໄດ້ຈັດພິທີທຳລາຍນ້ຳມັນເຄື່ອງປອມແປງຍີ່ຫໍ້ຮອນດ້າຫຼາຍກວ່າ 6 ພັນຕຸກ ມູນຄ່າ 150 ກວ່າລ້ານ, ທີ່ນຳເຂົ້າມາ ແລະ ຈຳໜ່າຍບໍ່ຖືກຕ້ອງສອດຄ່ອງກັບກົດໝາຍ ແລະ ລະບຽບການທີ່ ສປປ ລາວ ທີ່ໂຮງງານຕົ້ມກັ່ນນ້ຳມັນດຳໃຈຍະຫວາດ, ບ້ານ ບໍ່ເຫຼັກ, ເມືອງໄຊທານີ, ນະຄອນຫຼວງວຽງຈັນ.

        ນ້ຳມັນເຄື່ອງປອມແປງຮຽບແບບທີ່ຍຶດມາ ແລະ ທຳລາຍໃນຄັ້ງນີ້ມີ: ນໍ້າມັນເຄື່ອງລຸ້ນ 4T ຝາສີແດງ 1 ລິດ; ນໍ້າມັນເຄື່ອງ ລຸ້ນ 4T ຝາສີແດງ 0,7 ລິດ; ນໍ້າມັນເຄື່ອງ ລຸ້ນ 4T ຝາສີປອນ 0,7 ລິດ; ນໍ້າມັນເຄື່ອງ ລຸ້ນ 4T ຝາສີຟ້າ 0,8 ລິດ ລວມທັງໝົດ 6.490 ຕຸກ ປະລິມານ 4.699 ລິດ, ເຊິ່ງການທຳລາຍໃນຄັ້ງນີ້ ແມ່ນໄດ້ໃຊ້ວິທີການເທປົນໃສ່ກັບນ້ຳມັນດຳຂອງໂຮງງານກັ່ນນ້ຳມັນໃຈຍະຫວາດ ເພື່ອນຳໄປກັ່ນຕ່ອງຄືນໃໝ່ ແລະ ວິທີການທຳລາຍແບບນີ້ກໍເພື່ອເປັນການຮັກສາສິ່ງແວດລ້ອມ.