ອີກ 5 ປີແຂວງຄຳມ່ວນຈະສູ້ຊົນຜະລິດເຂົ້າໃຫ້ໄດ້ 2 ລ້ານກວ່າໂຕນ
ຫົວໜ້າ ຂະແໜງປູກຝັງ ແຂວງຄຳມ່ວນໄດ້ກ່າວລາຍງານຕໍ່ກອງປະຊຸມໜ່ວຍພັກຂອງຕົນໃນວັນທີ 24 ຕຸລານີ້ວ່າ: ໃນຕໍ່ໜ້າຈະເອົາ ໃຈໃສ່ປັບປຸງຄຸນນະພາບຂອງການຜະລິດໃຫ້ສູງ, ສ້າງໃຫ້ໄດ້ຕົວແບບການຜະລິດທີ່ດີ, ສາມາດຂະຫຍາຍອອກ ໃຫ້ນັບມື້ນັບຫລາຍຂຶ້ນເພື່ອສູ້ຊົນຜະລິດເຂົ້າໃຫ້ໄດ້ 2,36 ລ້ານກວ່າໃນ 5 ປີຕໍ່ໜ້າ, ໃນນັ້ນປູກເຂົ້ານາປີ ໃຫ້ໄດ້ 533.768 ເຮັກຕາ, ນາແຊງ 69.315 ເຮັກຕາ, ເພື່ອຄໍ້າປະກັນສະບຽງອາຫານໃຫ້ໄດ້ 1,55 ລ້ານກວ່າ ໂຕນ ແລະ ຜະລິດເປັນສິນ ຄ້າໃຫ້ໄດ້ 422.984 ໂຕນ ດ້ວຍ ສະມັດຕະພາບການ ຜະລິດສະເລ່ຍ 3,99 ໂຕນ/ ເຮັກຕາ, ຊ່ວຍໃຫ້ພົນລະເມືອງ ຜູ້ໜຶ່ງໄດ້ຮັບເຂົ້າເປືອກ 930 ກິໂລ/ ປີ.
ສະຫາຍ ນົງຄານ ແສງສຸລິນ ຮັກສາການ ເລຂາໜ່ວຍພັກຂະແໜງປູກຝັງໄດ້ຜ່ານລາຍງານການເມືອງ ພ້ອມທັງສະຫຼຸບຕີລາຄາຄືນການ ເຄື່ອນໄຫວວຽກງານໃນໄລຍະ 5 ປີຜ່ານມາ ເຊິ່ງຍາມໃດ ຄະນະພັກໄດ້ຖືເອົາວຽກງານສຶກສາອົບຮົມດ້ານການ ເມືອງ – ແນວຄິດເປັນກົກ ສອດຫ້ອຍເຂົ້າກັບທຸກຂົງເຂດ ວຽກງານໂດຍນຳເອົາມະຕິ, ຄຳສັ່ງ, ບົດແນະນຳຂອງ ຂັ້ນເທິງມາເຊື່ອມຊຶມ ໃຫ້ສະມາຊິກພັກ – ພະນັກງານ ແລະ ດໍາເນີນຮ່ວມຊີວິດພັກເປັນປົກກະຕິ, ຕິດພັນກັບການກວດ ກາຕີລາຄາແບ່ງປະເພດ, ປັບປຸງລະບົບການຈັດຕັ້ງພັກ, ແບບແຜນວິທີເຮັດວຽກ ຂອງ ຄະນະພັກ, ສະມາຊິກ ພັກ ໃຫ້ ມີຄວາມໜັກແໜ້ນ, ເຂັ້ມແຂງ, ສາມາດປະຕິບັດໜ້າທີ່ການ ເມືອງໄດ້ຢ່າງເຕັມສ່ວນສະ ແດງອອກດ້ານວຽກງານນຳພາວິຊາສະເພາະໄລຍະຜ່ານມາ ໄດ້ເອົາໃຈໃສ່ປັບປຸງຄຸນ ນະພາບຂອງການຜະລິດໃຫ້ສູງຂຶ້ນໂດຍນຳເອົາເຕັກນິກ ການຜະລິດລົງສູ່ພື້ນຖານ ຢ່າງຕໍ່ເນື່ອງ, ຈໍາກັດ ແລະ ຫລຸດຜ່ອນການຜະລິດແບບ ຟຸມເຟືອຍ, ສ້າງຕົວແບບໃນ ການຜະລິດກະສິກຳ ແລະ ສາມາດຂະຫຍາຍອອກນັບມື້ນັບຫລາຍຂຶ້ນເຫັນວ່າຂະບວນການຜະລິດດ້ານກະສິ ກຳໄດ້ມີບາດກ້າວຂະຫຍາຍ ຕົວຕໍ່ເນື່ອງ.
ປັດຈຸບັນໜ່ວຍພັກຂະ ແໜງປູກຝັງມີສະມາຊິກພັກ ທັງໝົດ 18 ສະຫາຍ, ຍິງ 8 ສະຫາຍ, ສຳຮອງ 2 ສະ ຫາຍ/ຍິງ. ກອງປະຊຸມຄັ້ງນີ້ ໄດ້ປ່ອນບັດຄັດເລືອກເອົາ ຄະນະໜ່ວຍພັກຊຸດໃໝ່ເຊິ່ງ ມີຜູ້ສະໝັກທັງໝົດ 5 ສະຫາຍ, ເລືອກເອົາ 3 ສະຫາຍ. ໂດຍ ສະຫາຍ ນົງຄານ ແສງສຸລິນ ເປັນເລຂາໜ່ວຍພັກ, ສະຫາຍ ອ່ອນແກ້ວ ຫອມສົມບັດ ເປັນຮອງເລຂາ, ທັງເປັນ ປະທານກວດກາ ແລະ ສະຫາຍ ນາງ ຄຳກາ ນຳພາວັນ ເປັນຄະນະກໍາມະການ./.
