ໜຶ່ງຫົນທາງສູ່ຊີວິດທີ່ມີຄວາມສຸກທາງການເງິນ
ທ່ານເຄີຍໄດ້ຍິນບໍ່ວ່າ ຄວາມຂີ້ຖີ່ຂີ້ໜຽວແມ່ນຫົນທາງສູ່ຊີວິດທີ່ມີຄວາມສຸກທາງດ້ານການເງິນ
? ຄວາມຂີ້ຖີ່ໃນບ່ອນນີ້ບໍ່ໄດ້ໝາຍເຖິງການຄອບຄອງສິ່ງຂອງພຽງນ້ອຍໆ
ຫລື ການຊື້ຫາແຕ່ຂອງທີ່ມີລາຄາຖືກທີ່ສຸດ ແຕ່ມັນເປັນການຮູ້ຈັກໃຊ້ສິ່ງຂອງທີ່ມີຢູ່ໃຫ້ກຸ້ມຄ່າຫລາຍທີ່ສຸດຕ່າງຫາກ
ເຊັ່ນ : ບາງຄົນກໍມັກນຸ່ງເຄື່ອງໂຕເກົ່າໆ ບໍ່ຍອມຊື້ເຄື່ອງໃໝ່
ໃນຂະນະທີ່ພວກຫລາຍໆຄົນຊຳ້ພັດມັກຊື້ໜັງສືມາກອງໄວ້ຫລວງຫລາຍຈົນອ່ານບໍ່ໝົດ
ປ່ອຍໃຫ້ຂີ້ຝຸ່ນຈັບ ມາຈົນເຖິງຕອນນີ້ຫລາຍໆຄົນຄົງເລີ່ມຮູ້ແລ້ວວ່າ
ໂຕເອງເປັນຄົນຂີ້ຖີ່ຂີ້ໜຽວແບບນີ້ຫລືບໍ່ ?
ຖ້າທ່ານຢາກມີຄວາມສຸກທາງການເງິນຫລາຍຂຶ້ນ ເຮົາມາເບິ່ງກັນດີກ່ວາວ່າເຄັດລັບໃນການເປັນຄົນຂີ້ຖີ່ຂີ້ໜຽວໃນຮູບແບບນີ້ ຫລື ມີຄວາມສຸກໃນສິ່ງຂອງໆຕົນເອງນັ້ນມີຫຍັງແດ່ :
1. ຖາມໂຕເອງວ່າທ່ານຈະໄດ້ໃຊ້ສິ່ງຂອງດັ່ງກ່າວນີ້ແທ້ໆຫລືບໍ່ : ທຸກເທື່ອກ່ອນຈະຊື້ຫຍັງຈັກຢ່າງ ຖາມໂຕເອງກ່ອນວ່າທ່ານຈະໄດ້ໃຊ້ມັນຢ່າງກຸ້ມຄ່າແທ້ໆຫລືບໍ່ ? ທ່ານຈະໄດ້ນຸ່ງເຄື່ອງໂຕນີ້ຈັກເທື່ອ ຈະອ່ານໜັງສື ຫລື ຫລິ້ນເກມທີ່ຊື້ມາຫລືບໍ່ ? ຖ້າທ່ານຮູ້ໂຕວ່າມັກດອງໜັງສືໄວ້ ຕໍ່ໄປກໍໃຫ້ລະມັດລະວັງຫລາຍຂຶ້ນ ແລະ ຕັດສິນໃຈຊື້ແຕ່ໜັງສືທີ່ທ່ານມັກ ແລະ ຢາກອ່ານຫລາຍແທ້ໆ.
2. ໃຊ້ສິ່ງຂອງທີ່ມີຢູ່ໃຫ້ກຸ້ມຄ່າທີ່ສຸດ : ຖັດມາແມ່ນການພະຍາຍາມໃຊ້ສິ່ງຂອງທີ່ທ່ານມີໃຫ້ກຸ້ມຄ່າ ແລະ ມີຄວາມສຸກກັບມັນໃຫ້ຫລາຍທີ່ສຸດ ລອງເບິ່ງໄປອ້ອມໆເຮືອນວ່າມີຫຍັງແດ່ທີ່ທ່ານບໍ່ຄ່ອຍໄດ້ໃຊ້ ຫລື ບໍ່ເຄີຍຈັບມັນຂຶ້ນມາເລີຍ ເຊັ່ນ : ລອງຈັບໜັງສືທີ່ບໍ່ເຄີຍຈັບມາເປີດອ່ານຜ່ານໆ ບໍ່ຕ້ອງອ່ານຈົນຈົບທັນທີ ເພາະຢ່າງໜ້ອຍມັນກໍໄດ້ໃຫ້ຄຸນຄ່າບາງຢ່າງຕໍ່ທ່ານແລ້ວ.
3. ຂາຍ ຫລື ບໍລິຈາກສິ່ງຂອງທີ່ບໍ່ໄດ້ໃຊ້ : ທ່ານບໍ່ຈຳເປັນຕ້ອງຝືນໃຊ້ສິ່ງຂອງທີ່ທ່ານບໍ່ມັກ ພຽງເພາະທ່ານຈ່າຍເງິນຊື້ມັນມາດອກ ເອົາເວລາທີ່ຈະຕ້ອງເສຍໄປໃຊ້ກັບສິ່ງອື່ນທີ່ມີປະໂຫຍດດີກ່ວາ ຍິ່ງ ທ່ານມີສິ່ງຂອງໜ້ອຍ ທ່ານກໍຈະຍິ່ງໃສ່ໃຈກັບສິ່ງຂອງທີ່ມີຢູ່ໄດ້ຫລາຍຂຶ້ນ ທັງການຂາຍ ຫລື ບໍລິຈາກຍັງເປີດໂອກາດໃຫ້ຄົນອື່ນໄດ້ໃຊ້ປະໂຫຍດຈາກສິ່ງຂອງທີ່ທ່ານບໍ່ເຫັນຄຸນຄ່ານຳ.
4. ຖ້າເປັນໄປໄດ້ໃຫ້ເຊົ່າ ຫລື ຢືມແທນ : ທ່ານສາມາດມີຄວາມສຸກກັບສິ່ງຂອງຕ່າງໆໄດ້ ເຖິງວ່າຈະບໍ່ໄດ້ເປັນເຈົ້າຂອງມັນ ສະນັ້ນ ແທນທີ່ຈະຊື້ ລອງເບິ່ງກ່ອນວ່າທ່ານສາມາດເຊົ່າ ຫລື ຢືມຄົນອື່ນແທນໄດ້ຫລືບໍ່ ຈະໄດ້ບໍ່ຕ້ອງຈົບລົງໂດຍການມີສິ່ງຂອງລົ້ນເຮືອນ ຈົນບໍ່ມີບ່ອນໃຫ້ເກັບມ້ຽນ.
5. ເລືອກຊື້ສິ່ງຂອງທີ່ທົນທານ ແລະ ໃຊ້ໄດ້ດົນ : ການໃຊ້ງານສິ່ງຂອງບາງຢ່າງເປັນເວລາດົນຈະເຮັດໃຫ້ທ່ານມີຄວາມສຸກກັບມັນຍິ່ງຂຶ້ນ ນັ້ນເປັນເຫດຜົນວ່າເປັນຫຍັງລາຄາຈຶ່ງບໍ່ແມ່ນປັດໄຈດຽວໃນການຕັດສິນໃຈຊື້ສິ່ງຂອງ ອີກປັດໄຈໜຶ່ງທີ່ບໍ່ຄວນເບິ່ງຂ້າມກໍຄືຄວາມທົນທານ ຖ້າສິ່ງຂອງຍີ່ຫໍ້ໜຶ່ງທີ່ລາຄາແພງມີຄຸນນະພາບດີກ່ວາໃຊ້ໄດ້ດົນກ່ວາອີກຍ່ີຫໍ້ໜຶ່ງ ທ່ານກໍຄວນຈະເລືອກຊື້ຍີ່ຫໍ້ທຳອິດ ເພາະມັນໝາຍຄວາມວ່າທ່ານຈະມີຄວາມສຸກຈາກການໄດ້ໃຊ້ສິ່ງຂອງສິ່ງນັ້ນຫລາຍຍິ່ງຂຶ້ນ.
ເຄັດລັບເຫລົ່ານີ້ຈະເຮັດໃຫ້ທ່ານມີຄວາມສຸກກັບສິ່ງຂອງທຸກຢ່າງ ແລະ ມີຄວາມສຸກກັບຊີວິດຫລາຍຂຶ້ນ ເຖິງວ່າຈະບໍລິໂພກ ໜ້ອຍລົງ ຄວາມຂີ້ຖີ່ຂີ້ໜຽວແບບນີ້ຈຶ່ງເປັນຜົນດີຕໍ່ທັງໂຕທ່ານເອງ ແລະ ຄົນອື່ນໆໃນໂລກນີ້ນຳ.
