ອາເມລິກາອາດຫ້າມເອົາໂນດບຸກຂຶ້ນເຮືອບິນເຂົ້າປະເທດຈາກທົ່ວໂລກ
ທ່ານ ຈອນ ເຄວລີ ລັດຖະມົນຕີກະຊວງຄວາມໝັ້ນຄົງແຫ່ງມາຕຸພູມຂອງອາເມລິກາ ໃຫ້ສຳພາດສະຖານີໂທລະພາບຟ໊ອກນິວວ່າ: ເຈົ້າໜ້າທີ່ທາງການອາເມລິກາຍັງພິຈາລະນາວ່າຈະຫ້າມນຳເອົາຄອມພິວເຕີຂຶ້ນຫ້ອງໂດຍສານຢູ່ເຮືອບິນໃນທຸກຖ້ຽວບິນຈາກທົ່ວໂລກ ຫລື ບໍ່, ພາຍຫລັງກ່ອນໜ້ານີ້ ອາເມລິກາໄດ້ຫ້າມແບບນີ້ໃນທຸກຖ້ຽວບິນທີ່ມາຈາກປະເທດທີ່ມີປະຊາກອນສ່ວນຫລາຍນັບຖືສາສະໜາອິສລາມ 8 ປະເທດ.
ທ່ານ ເຄວລີ ກ່າວວ່າ: ມີໄພຄຸກຄາມທີ່ແທ້ຈິງຢູ່ ແລະ ຜູ້ກໍ່ການຮ້າຍຍັງມີຄວາມຫວັງກັບຄວາມຄິດໃນການຕ້ອງເຮັດໃຫ້ເຮືອບິນອາເມລິກາຕົກໃຫ້ໄດ້.
+ ອາເມລິກາ-ອີຢູ ບໍ່ອອກຄຳສັ່ງຫ້າມເອົາໂນ໊ດບຸກຈາກຖ້ຽວບິນເອີຣົບຂຶ້ນເຮືອບິນ
+ ອາເມລິກາຫ້າມບໍ່ໃຫ້ຜູ້ໂດຍສານ 8 ປະເທດນຳເອົາເຄື່ອງເອເລັກໂຕຣນິກທີ່ໃຫຍ່ກວ່າມືຖືຂຶ້ນເຮືອບິນ
ໃນອາທິດກ່ອນ, ເຈົ້າໜ້າທີ່ທາງການຕັດສິນໃຈບໍ່ຂະຫຍາຍການຫ້າມເອົາໂນດບຸກຂຶ້ນເຮືອບິນໃນຖ້ຽວບິນລະຫວ່າງອາເມລິກາ ແລະ ສະຫະພາບເອີຣົບ, ແຕ່ການສະແດງຄວາມເຫັນຂອງທ່ານ ເຄວລີ ອາດຈະເຮັດໃຫ້ເກີດຄວາມບໍ່ແນ່ນອນຕໍ່ການຕັດສິນໃຈດັ່ງກ່າວ.
ທ່ານ ເຄວລີ ກ່າວໃນລາຍການຂອງຟ໊ອກນິວ ໃນວັນທີ 28 ພຶດສະພານີ້ ກ່ຽວກັບຄວາມພະຍາຍາມຕ່າງໆໃນການປາບປາມການກໍ່ການຮ້າຍ, ພາຍຫລັງເກີດເຫດໂຈມຕີດ້ວຍລະເບີດໃນອັງກິດໃນວັນທີ 22 ພຶດສະພາ.
ຂໍ້ຫ້າມນີ້ຂອງອາເມລິກາ ເຊິ່ງເລີ່ມໃຊ້ມາແຕ່ເດືອນມີນາ ມີຜົນກັບອຸປະກອນທຸກຊະນິດທີ່ມີຂະໜາດໃຫຍ່ກວ່າມືຖື, ອຸປະກອນເຫລົ່ານັ້ນຈະບໍ່ໄດ້ຮັບອະນຸຍາດໃຫ້ເອົາຂຶ້ນເຮືອບິນໃນທຸກຖ້ຽວບິນທີ່ມາຈາກຕວກກີ, ມາຣົກ, ຊອກດານີ, ເອຢິບ, ເອເມຣັດ ອາຣັບ, ກາຕາ, ອາຣັບບີ ຊາອຸດິດ ແລະ ກູເວດ.
ຜູ້ຊ່ຽວຊານດ້ານຄວາມປອດໄພໃນການເດີນທາງ ເຕືອນວ່າມີຄວາມສ່ຽງເພີ່ມຂຶ້ນທີ່ຈະບໍ່ສາມາດກວດສອບແບັດເຕີລີຖ້າເກີດໄຟໄໝ້, ຖ້າອຸປະກອນເອເລັກໂຕຣນິກຂະໜາດໃຫຍ່ເຫລົ່ານັ້ນຖືກເກັບໄວ້ໃນຫ້ອງເກັບເຄື່ອງຂອງເຮືອບິນ.
