ກະຊວງແຮງງານແຕ່ງຕັ້ງຫົວໜ້າກົມສັງຄົມສົງເຄາະ ແລະ ຫົວໜ້າຫ້ອງການແກ້ໄຂລະເບີດຕົກຄ້າງ
ວັນທີ 10 ຕຸລານີ້, ກະຊວງແຮງງານ ແລະ ສະຫວັດດີການສັງຄົມ (ຮສສ), ໄດ້ມີພິທີປະກາດການແຕ່ງຕັ້ງຫົວໜ້າກົມສັງຄົມສັງຄົມສົງເຄາະ ແລະ ຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດຕົກຄ້າງຢູ່ ສປປ ລາວ, ໂດຍໃຫ້ກຽດເຂົ້າຮ່ວມຂອງສະຫາຍ ຄຳແພງ ໄຊສົມແພງ ລັດຖະມົນຕີກະຊວງດັ່ງກ່າວ.
ໂອກາດນີ້, ທ່ານນາງ ອານົງຮັກ ຫວ່າງອານຸວົງ ຮອງຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີເລກທີ 296/ນຍ, ລົງວັນທີ 4 ກັນຍາ 2019 ວ່າດ້ວຍການແຕ່ງຕັ້ງທ່ານ ວິໄລພົງ ສີສົມຫວັງ ເປັນຫົວໜ້າກົມສັງຄົມສົງເຄາະ ແລະ ເລກທີ 297/ນຍ, ລົງວັນທີ 4 ກັນຍາ 2019 ວ່າດ້ວຍການແຕ່ງຕັ້ງທ່ານ ໂຈມແຍງ ແພງທອງສະຫວັດ ເປັນຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດຕົກຄ້າງຢູ່ ສປປ ລາວ ກະຊວງແຮງງານ ແລະ ສະຫວັດດີການສັງຄົມຜູ້ໃໝ່ ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຂອງກະຊວງແຮງງານ ແລະ ສະ
ຫວັດດີການສັງຄົມໃຫ້ມີປະສິດທິຜົນສູງ.
ສະຫາຍ ຄຳແພງ ໄຊສົມແພງ ໄດ້ໃຫ້ກຽດໂອ້ລົມວ່າ: ສອງສະຫາຍລວ້ນແຕ່ເປັນບຸກຄົນທີ່ມີຄວາມຮູ້, ຄວາມສາມາດ, ປະສົບການ, ຜົນງານໃນຫລາຍດ້ານ, ຜ່ານການບຸກບືນ, ຝຶກຝົນຫລໍ່ຫລອມຕົນເອງໄດ້ເຕີບໃຫຍ່ເຂັ້ມແຂງຂຶ້ນເປັນແຕ່ລະບາດກ້າວ ແລະ ໄດ້ຮັບຄວາມໄວ້ເນື້ອເຊື່ອໃຈຈາກການຈັດຕັ້ງເປັນຢ່າງດີນັ້ນ ຈົ່ງສືບຕໍ່ສຸມທຸກເຫື່ອແຮງ, ສະຕິປັນຍາ, ຍົກລະດັບຄວາມຮູ້ຄວາມສາມາດ, ຮັກສາຄວາມສາມັກຄີພາຍໃນເປັນປຶກແຜ່ນ, ສືບຕໍ່ປັບປຸງແບບແຜນວິທີເຮັດວຽກໃຫ້ມີປະສິທິພາບ ແລະ ປະສິດທິຜົນ ປະກອບສ່ວນເຂົ້າໃນພາລະ
ກິດປົກປັກຮັກສາ ແລະ ສ້າງສາປະເທດຊາດ, ໂດຍສະເພາະແມ່ນວຽກງານໃນຂົງເຂດທີ່ຕົນເອງຮັບຜິດຊອບ ກໍຄືວຽກງານກົມສັງຄົມສັງຄົມສົງເຄາະ ແລະ ຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດຕົກຄ້າງຢູ່ ສປປ ລາວ ໃຫ້ໄດ້ຮັບໝາກຜົນຍິ່ງໃຫຍ່ກວ່າເກົ່າ.
