ນະຄອນຫລວງວຽງຈັນ ຈະເລັ່ງກວດຄືນໂຮງງານນ້ຳກ້ອນ ແລະ ນ້ຳດື່ມທີ່ບໍ່ໄດ້ມາດຖານ.
ພະແນກຊັບພະຍາກອນ ທຳມະຊາດ ແລະ ສິ່ງແວດລ້ອມໃຫ້ຮູ້ວ່າ: ປັດຈຸບັນ ພະແນກການຂອງຕົນພວມ ກຳລັງເລັ່ງກວດກາຄືນ ບັນດາໂຮງງານນ້ຳກ້ອນ ແລະ ນໍ້າດື່ມ ທີ່ບໍ່ໄດ້ມາດຕະຖານ, ພາຍຫລັງເຫັນວ່າມີບັນຫາກະທົບຕໍ່ສິ່ງແວດລ້ອມ ແລະ ສັງຄົມ ໂດຍສະເພາະເມື່ອບໍ່ດົນມານີ້, ໄດ້ເກີດເຫດການຮົ່ວໄຫລຂອງກນເຕີມນ້ຳຢາອາໂມເນຍ(NH4) ຈາກໂຮງງານຜະລິດ ນ້ຳກ້ອນ ແຫ່ງໜຶ່ງ ຕັ້ງຢູ່ບ້ານ ດົງປ່າແຫລບ ເມືອງ ຈັນທະບູລີ ນະຄອນຫລວງວຽງຈັນ ພາໃຫ້ເກີດມີກິ່ນຂິວແຮງ ຢູ່ອ້ອມແອ້ມບໍລິເວນຂອງໂຮງງານ ທີ່ມີບ້ານເຮືອນປະຊາຊົນຕັ້ງຢູ່ໜາແໜ້ນ ໂດຍສະເພາະແມ່ນໂຮງຮຽນ ຫວຽນຢູ ເຮັດໃຫ້ນັກຮຽນ 100 ກ່ວາຄົນ ມີອາການວິນຫົວ, ເຈັບຄໍ, ເຈັບຕາ ແລະ ໄດ້ປິດການສອນຊົ່ວຄາວ, ສະນັ້ນ ທາງເຈົ້າໜ້າທີ່ຈຶ່ງໄດ້ສັ່ງປິດກິດຈະການຊົ່ວຄາວຂອງໂຮງງານດັ່ງກ່າວ, ເພື່ອປັບປຸງແກ້ໄຂ, ພ້ອມດຽວກັນນັ້ນ ໂຮງງານຫລາຍແຫ່ງທີ່ຍັງບໍ່ທັນໄດ້ມາດຕະຖານ ຊຶ່ງພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ກໍຈະໄດ້ເລັ່ງດຳເນີນການກວດກາລະອຽດ ຫາກພົບເຫັນບັນຫາຮ້າຍແຮງກໍຈະສັ່ງປິດກິດຈະການທັນທີ.
ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ປັດຈຸບັນ ຢູ່ ນະຄອນຫລວງວຽງຈັນ ມີໂຮງງານຜະລິດນ້ຳກ້ອນຫລາຍກ່ວາ 30 ແຫ່ງ ແລະ ຜະລິດນ້ຳດື່ມຫລາຍກ່ວາ 50 ແຫ່ງ ແລະ ໃນໄລຍະຜ່ານມາ ເຫັນວ່າມີຫລາຍໂຮງງານໄດ້ຮັບມາດຕະຖານ ແລະ ບາງບ່ອນກໍໄດ້ສັ່ງປິດກິດຈະການຍ້ອນກະທົບຕໍ່ສັງຄົມ ແລະ ສິ່ງແວດລ້ອມ, ເປັນຕົ້ນແມ່ນການປ່ອຍສານເຄມີລົງໃສ່ນ້ຳ ແລະ ສັງຄົມຄື: ໃນປີ 2017 ທາງເຈົ້າໜ້າທີ່ໄດ້ສັ່ງປິດໂຮງງານນ້ຳດື່ມ ແລະ ນ້ຳກ້ອນ 5 ແຫ່ງ ຢູ່ ເມືອງ ຈັນທະບູລີ ແລະ ໄຊທານີ.
ປັດຈຸບັນ ນອກຈາກໂຮງງານຜະລິດນ້ຳກ້ອນ ແລະ ນ້ຳດື່ມທີ່ບໍ່ໄດ້ມາດຕະຖານ ແລ້ວ ຍັງມີໂຮງງານອື່ນໆຫລາຍແຫ່ງທີ່ກະທົບຕໍ່ສິ່ງແວດລ້ອມ ແລະ ສັງຄົມ ເປັນຕົ້ນແມ່ນໂຮງງານຜະລິດເຄື່ອງເອັກເລັກໂຕນິກ ແລະ ອື່ນໆ, ຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ໃນໄລຍະ 3 ປີຜ່ານມາ ໄດ້ມີການກວດກາບັນດາໂຮງງານ ທີ່ກະທົບຕໍ່ສິ່ງແວດລ້ອມ, ໂດຍໄດ້ສັ່ງປິດກິດຈະການຄື: ໂຮງງານຜະລິດເສດຊີ້ນສ່ວນໝໍ້ໄຟ ຕັ້ງຢູ່ ບ້ານ ຫລັກ 36 ເມືອງ ໄຊທານີ, ໂຮງງານຕົ້ມຢາງ ແລະ ຜະລິດຕີນລົດມືສອງ ຢູ່ ບ້ານ ໂນນສະຫວ່າງ ເມືອງ ໄຊທານີ ແລະ ໂຮງງານອື່ນໆ. ເພື່ອສະກັດກັ້ນບໍ່ໃຫ້ມີຜົນກະທົບຕໍ່ສິ່ງແວດລ້ອມ ແລະ ສັງຄົມ.
