ປ໊ອກບາ ຕັດສິນໃຈແລ້ວ ເລື່ອງຕໍ່ສັນຍາ ແມນຢູ
ສື່ດັງອິຕາລີລະບຸວ່າ: ປອລ ປ໊ອກບາ ກອງກາງດາວດັງ ແມນເຊັສເຕີ ຢູໄນເຕັດ ຕັດສິນໃຈຮຽບຮ້ອຍ ກ່ຽວກັບເລື່ອງອະນາຄົດຂອງຕົນເອງ ເຖິງວ່າປັດຈຸບັນເຫລືອສັນຍາກັບ ແມນຢູ ອີກ 2 ປີ.
ປອລ ປ໊ອກບາ ກອງກາງຊຸບເປີສະຕາຊາວຝຣັ່ງຂອງ ແມນເຊັສເຕີ ຢູໄນເຕັດ ສະໂມສອນຍັກໃຫຍ່ແຫ່ງເວທີ ພຣີເມຍລີກ ອັງກິດ ຕັດສິນໃຈຮຽບຮ້ອຍແລ້ວ ທີ່ຈະບໍ່ເຊັນສັນຍາສະບັບໃໝ່ກັບຕົ້ນ ສັງກັດ. ຕາມລາຍງານຈາກ ຕຸດໂຕ້ສະປອດ ສື່ກິລາຊັ້ນນຳຂອງອິຕາລີ ໃນວັນທີ 9 ຕຸລາ.
ດາວເຕະທີມຊາດຝຣັ່ງ ໄວ 26 ປີ ເຄີຍມີຂ່າວກ່ຽວຂ້ອງກັບ ຣີລ ມາດຣິດ ຍອດສະໂມສອນຂອງສະເປນຢ່າງໜັກໃນຊ່ວງໜ້າຮ້ອນຜ່ານມາ ແຕ່ວ່າສຸດທ້າຍ ຣີລ ມາດຣິດ ບໍ່ສາມາດຕົກລົງກັບ ແມນເຊັສເຕີ ຢູໄນເຕັດ ໄດ້.
ເຖິງວ່າປັດຈຸບັນ ປ໊ອກບາ ເຫລືອສັນຍາຫລິ້ນໃນຖິ່ນ ໂອລ ແທຣັບຟອດ ເຖິງປີ 2021. ຂະນະທີ່ ຜູ້ຈັດການທີມ ໂອເລ່ ກຸນນາ ໂຊລຊາ ຢາກເຫັນລາວເຊັນສັນຍາສະບັບໃໝ່ກັບທີມ. ເຖິງຢ່າງໃດກໍ ຕາມ ຫລ້າສຸດ ຕຸດໂຕ້ສະປອດ ລະບຸວ່າ: ປ໊ອກບາ ເລືອກແລ້ວທີ່ຈະບໍ່ຕໍ່ສັນຍາ ເພາະຕ້ອງການຍ້າຍທີມ.
ຢູເວນຕຸສ ອະດີດຕົ້ນສັງກັດ ເປັນອີກທີມທີ່ຢາກດຶງ ປ໊ອກບາ ມາຮ່ວມທັບ ແຕ່ ແມນເຊັສເຕີ ຢູໄນເຕັດ ຕັ້ງຄ່າຕົວໄວ້ສູງເຖິງ 180 ລ້ານປອນ ເຊິ່ງເປັນລາຄາທີ່ ຢູເວນຕຸສ ສູ້ບໍ່ໄຫວ.
ທັງນີ້ ປ໊ອກບາ ລົງຫລິ້ນໃຫ້ ແມນເຊັສເຕີ ຢູໄນເຕັດ ໄປແລ້ວທັງໝົດ 141 ນັດ ຍິງໄດ້ 31 ປະຕູ ນັບແຕ່ຍ້າຍມາຈາກ ຢູເວນຕຸສ ຊ່ວງໜ້າຮ້ອນປີ 2016.
