ສະຫະລັດອາເມລິກາ ແລະ ຈີນ ເລີ່ມອຸ່ນເຄື່ອງເພື່ອເຈລະຈາການຄ້າຮອບໃໝ່

ຮຽບຮຽງໂດຍ: ລູກເມືອງພວນ

ຂ່າວຈາກ VTC News ວັນທີ 7 ຕຸລານີ້ ໃຫ້ຮູ້ວ່າ: ສະຫະລັດ ແລະ ຈີນ ໄດ້ເລີ່ມມີການເຈລະຈາການຄ້າຢູ່ ວໍຊິງຕັນ 3 ວັນ ກ່ອນຈະມີການເຈລະຈາລະດັບສູງເລີ່ມຂຶ້ນ ໂດຍຮອງຫົວໜ້າຄະນະເຈລະຈາຂອງຈີນ.

ຣອຍເຕີ ໃຫ້ຮູ້ວ່າ: ຮອງລັດຖະມົນຕີກະຊວງການເງິນຂອງຈີນ ລຽວເມິນ ໄດ້ນຳພາຄະນະ 30 ຄົນໄປແລກປ່ຽນກັບຜູ້ຕາງໜ້າການຄ້າຂອງສະຫະລັດ ເປັນເວລາ 2 ວັນ ແຕ່ວັນທີ 7 – 10 ຕຸລາ. ການເຈລະຈາລະດັບສູງລະຫ່ວາງຮອງນາຍົກລັດຖະມົນຕີຂອງຈີນ ຫຼິວຫາກ ກັບ ຜູ້ຕາງໜ້າການຄ້າສະຫະລັດ Robert Lighthizer ແລະ ລັດຖະມົນຕີກະຊວງການເງິນ Steven Mnuchin ໄດ້ເລີ່ມຕົ້ນຂຶ້ນແລ້ວ.

ເລຂາໜັງສືພິມຂອງທຳນຽບຂາວ Stephanie Grisham ໃຫ້ຮູ້ວ່າ: ບັນຫາທີ່ຈະນຳເອົາມາເຈລະຈາກັນໃນຄັ້ງນີ້ ລວມມີ: ການຖ່າຍທອດດ້ານເຕັກໂນໂລຢີ ແບບບັງຄັບ, ສິດຄອບຄອງດ້ານສະຕິປັນຍາ, ການບໍລິການ, ການປອດພາສີ, ການກະເສດ ແລະ ວິທີການຈັດຕັ້ງປະຕິບັດ.

ເມື່ອເວົ້າເຖິງການເຈລະຈາຮອບໃໝ່, ຜູ້ ຊ່ຽວຊານດ້ານເສດຖະກິດຂອງທຳນຽບຂາວ Larry Kudlow ໃຫ້ຮູ້ວ່າ: ສະຫະລັດພ້ອມທີ່ຈະທົບທວນຄືນຕໍ່ບັນຫາທີ່ຈີນສະເໜີມາ. “ ອາດຈະມີຄວາມຄືບໜ້າເພີ່ມເຕີມ ໃນການຈັດຕັ້ງປະຕິບັດຕໍ່ກັບຈີນໃນທ້າຍອາທິດນີ້ ” Kudlow ກ່າວ.