ເຂົ້າສານ ຄືຄວາມຕ້ອງຮີບດ່ວນ

ໂດຍ:​ ມຶກບໍ່ແຫ້ງ

ນໍ້າຖ້ວມປີນີ້ໄດ້ສ້າງຄວາມເສຍຫາຍຫຼາຍຢ່າງຕໍ່ຊີວິດ ແລະຊັບສິນຂອງປະຊາຊົນລາວ ໂດຍສະເພາະ ເຂດແຂວງພາກໃຕ້ ທີ່ຜູ້ຂຽນຫາກໍໄດ້ໄປຢ້ຽມມາໃໝ່ມາດໆ ເຊິ່ງຮັບຮູ້ໄດ້ວ່າ ເຂົ້າສານ ແມ່ນສິ່ງທີ່ຜູ້ປະສົບໄພຕ້ອງການດ່ວນທີ່ສຸດ.

ໄພນໍ້າຖ້ວມອັນຮ້າຍແຮງ ເປັນຕົ້ນ ທ້າຍເດືອນ ສິງຫາ ຫາ ເດືອນ ກັນຍາ 2019 ນີ້ ໄດ້ສ້າງຄວາມສາຍຫາຍຫຼາຍປະການຕໍ່ປະຊາຊົນລາວ ໂດຍສະເພາະແມ່ນ 6 ​ແຂວງ ພາກກາງ ແລະພາກໃຕ້ ທີ່ເຮັດໃຫ້ປະຊາຊົນສູນເສຍຜົນຜະລິດຂອງເຂົາເຈົ້າ, ແມ່ນແຕ່ເຂົ້າຢູ່ເລົ້າກໍໄປນໍານໍ້າຈົນໝົດ ເລີຍເຮັດໃຫ້ ປະຊາຊົນ ພົບພໍ້ກັບຄວາມຫຍຸ້ງຍາກ ມາຮອດທຸກມື້ນີ້.

ເມື່ອອາທິດທີ່ຜ່ານມາ ຜູ້ຂຽນໄດ້ລົງໄປຕິດຕາມ ການປະເມີນຜົນຄວາມຕ້ອງການຂອງຜູ້ປະສົບໄພຢູ່ສອງແຂວງຄື ແຂວງຈຳປາສັກ ແລະ ສາລະວັນ ເຊິ່ງແມ່ນສອງແຂວງ ທີ່ໄດ້ປະສົບກັບໄພນໍ້າຖ້ວມຄັ້ງຮ້າຍຄັ້ງໜຶ່ງ ໃນປະຫວັດສາດຂອງແຂວງດັ່ງກ່າວ, ແນ່ນອນຜົນເສຍຫາຍນັ້ນ ແມ່ນຫຼວງຫຼາຍ ກ່າຍກອງ ທີ່ເຫັນແລ້ວເປັນຕາໜ້າສົງສານປະຊາຊົນ ຜູ້ເຊິ່ງກາງຕໍ່ໃສ່ ໄຮ່ນາ ຮົ້ວສວນ ໃນການຜະລິດສະບຽງອາຫານ ແລະລາຍໄດ້ ແຕ່ສິ່ງເຫຼົ່ານັ້ນ ໄດ້ກັບກາຍເປັນຝັນຮ້າຍ ເມື່ອນໍ້າມາຖ້ວມພຽງ 2-3 ມື້.

ສາລະວັນ ຖືເປັນແຂວງປະສົບກັບໄພນໍ້າຖ້ວມຮ້າຍແຮງທີ່ສຸດໃນຮອບ 51 ປີ ເຊິ່ງຄັ້ງທີ່ຮ້າຍແຮງເທື່ອຜ່ານມາ ແມ່ນເກີດຂຶ້ນຕັ້ງແຕ່ປີ 1968, ເມື່ອມາຮອດປີນີ້ນໍ້າໄດ້ຖ້ວມແຂວງສາລະວັນ ໂດຍສະເພາະ ສາມເມືອງ ຄື ສາລະວັນ, ວາປີ ແລະຄົງເຊໂດນ ເຊິ່ງໄດ້ສ້າງຄວາມເສຍຫາຍຢ່າງມະຫາສານ, ອີງຕາມການລາຍງານ ໃນເບື້ອງຕົ້ນ ຂອງພະແນກແຮງງານ ແລະ ສະຫວັດດິການ ສັງຄົມ ແຂວງດັ່ງກ່າວໃຫ້ຮູ້ວ່າ ຜົນເສຍຫາຍທັງໝົດ ອາດຈະຢູ່ລະຫວ່າງ 700-800 ຕື້ກີບ (ຕົວເລກນີ້ ຍັງບໍ່ເປັນທາງການ ເພາະການເກັບກຳ ແລະ ສະຫຼຸບຂໍ້ມູນຍັງ ບໍ່ທັນສຳເລັດສົມບູນ).

ທ່າມກາງຄວາມເສຍຫາຍ ແລະ ຄວາມຕ້ອງການອັນຮີບດ່ວນຂອງປະຊາຊົນມີຫຼວງຫຼາຍນັ້ນ, ເຂົ້າສານແມ່ນ ສິ່ງປະຊາຊົນຕ້ອງການດ່ວນທີ່ສຸດ ເພາະ ຫຼາຍຄອບຄົວ ແມ່ນບໍ່ມີເຂົ້າກິນເລີຍ ຍ້ອນເລົ້າເຂົ້າ ບ່ອນເກັບມ້ຽນເຂົ້າ ທີ່ເກັບມາໄດ້ນັ້ນ ພັດຖືກພັດໄປນໍານໍ້າ, ນອກນັ້ນ ພືດຜັກ ທັນຍາຫານ ລວມທັງ ນາໄດ້ຖືກຜົນເສຍຫາຍຈົນໝົດ ເຊິ່ງໃຫ້ປະຊາຊົນ ຂາດເຂົ້າກິນ ຢ່າງກະທັນຫັນ.

ປະຊາຊົນທ່ານໜຶ່ງຂອງ ບ້ານໜອງມານ ເມືອງ ຄົງເຊໂດນ ແຂວງສາລະວັນ ກ່າວວ່າ ດຽວນີ້ໄຮ່ນາຕາກ້າແມ່ນຍັງເຫຼືອແຕ່ຕໍເຟືອງ, ເຂົ້າກິນບໍ່ມີ, ອາໄສການຊ່ວຍເຫຼືອຂອງທາງການ ກໍມີພຽງເລັກນ້ອຍ (4-5 ກິໂລ ຕໍ່ຄອບຄົວ) ເຊິ່ງກໍເຫັນໃຈລັດຖະບານເຮົາທີ່ເພິ່ນໄດ້ພະຍາຍາມເຕັມທີ່ແລ້ວ ແຕ່ຜົນເສຍຫາຍປີນີ້ ຖືວ່າໜັກໜ່ວງ ກວມເອົາຫຼາຍໝູ່ບ້ານ ທີ່ເກີນກວ່າກຳລັງພວກເຮົາສາມາດຮັບມືໄດ້ຢ່າງທັນການ.

ບໍ່ສະເພາະ ແຕ່ບ້ານໜອງມານ ເທົ່ານັ້ນ ບ້ານອື່ນໆ ຂອງສາມເມືອງທີ່ໄດ້ຮັບຜົນກະທົບ ກໍເວົ້າເຊັ່ນກັນ, ຕາມການຄິດໄລ່ຂອງ ເຈົ້າໜ້າທີ່ແຂວງດັ່ງກ່າວໃຫ້ຮູ້ວ່າ ສາລະວັນ ຕ້ອງການເຂົ້າສານ ເພື່ອຕອບສະໜອງໃຫ້ ປະຊາຊົນຜູ້ໄດ້ຮັບຜົນກະທົບພາຍໃນ 3 ເມືອງທີ່ໄດ້ຮັບຜົນກະທົບ ແຕ່ນີ້ຮອດ ທ້າຍປີ 2019 ມີປະລິມານ 5000-6000 ໂຕນ ເຊິ່ງເປັນເລື່ອງທີ່ໜັກໃຈພໍສົມຄວນຂອງ ອຳນາດການປົກຄອງ ແລະພາກສ່ວນກ່ຽວຂ້ອງ ວ່າຈະຫາເຂົ້າສານໃຫ້ປະຊາຊົນໄດ້ແນວໃດ?

ເພາະສະນັ້ນ ຈຶ່ງຂໍວິງວອນສັງຄົມທຸກພາກສ່ວນ ຈົ່ງຊ່ວຍພ້ອມພາກັນ ອູ້ມຊູ ຜູ້ປະສົບໄພໃຫ້ຜ່ານຜ່າວິກິດ ນີ້ໄປໃຫ້ໄດ້ ໂດຍສົມທົບກັບພາກສ່ວນທີ່ກ່ຽວຂ້ອງ ເປັນຕົ້ນ ຂະແໜງແຮງງານ ແລະ ສະຫວັດດິການ ສັງຄົມ ໃນການບໍລິຈາກເຂົ້າສານ ທີ່ສາມາດໄປຮອດໄປເຖິງປະຊາຊົນ ທີ່ມີຄວາມຕ້ອງການຢ່າງເລັ່ງດ່ວນນີ້.