ທຣຳ ສືບຕໍ່ໂຈມຕີພັກ ເດໂມແຄຣດ

ຮຽບຮຽງໂດຍ: ລູກເມືອງພວນ

ທຣຳ ກ່າວວ່າ: ພັກເດໂມແຄຣດ ຖິ້ມເວລາໄປແບບບໍ່ມີປະໂຫຍດ ເພື່ອຮ້ອງຟ້ອງເຂົາ. “ ພັກເດໂມແຄຣດ ຄວນໃສ່ໃຈການສ້າງສາພັດທະນາປະເທດຊາດຈະດີກ່ວາ ຢ່າໄປສູນເສຍເວລາ ແລະ ເຫື່ອເສຍແຮງນຳສິ່ງທີ່ ‘ຕາຍໆ’ ທີ່ເຂົາດຳເນີນມານັບຕັ້ງແຕ່ຂ້ອຍໄດ້ຮັບຕຳແໜ່ງແຕ່ປີ 2016 ເປັນຕົ້ນມາ ” ທຣຳ ຂຽນລົງໃນທະວິດເຕີສ່ວນຕົວ.

ຄຳປະກາດຂອງທຣຳ ມີຂຶ້ນໃນຂະນະທີ່ ສະພາຕໍ່າຂອງສະຫະລັດອາເມລິກາ ໂດຍພັກເດໂມແຄຣດ ນຳໜ້າ ປະກາດວ່າຈະໄຕ່ສວນຮ້ອງຟ້ອງປະທານາທິບໍດີ ກ່ຽວກັບການໂອ້ລົມກັນລະຫ່ວາງ ທຣຳ ກັບ ປະທານາທິບໍດີ ຢູເຄຣນ Zelensky ໃນວັນທີ 25 ກໍລະກົດຜ່ານມາ ໂດຍມີເນື້ອໃນໃຈຄວາມວ່າ ທຣຳ ໄດ້ຮຽກຮ້ອງໃຫ້ ຢູເຄຣນ ໄຕ່ສວນ ພໍ່-ລູກ ຮອງປະທານນາທິບໍດີສະຫະລັດ Joe Biden ຜູ້ສະໝັກລົງເລືອກຕັ້ງຕົວເກັງຂອງພັກ ເດໂມແຄຣດ ໃນການຊີງປະທານາທິບໍດີຂອງທຳນຽບຂາວ ປີ 2020.

ລູກຊາຍຂອງ Biden ແມ່ນ Hunter Biden ເຄີຍເຮັດວຽກຢູ່ໃນບໍລິສັດ ພະລັງງານຂອງ Ukraine Burisma ຖືກກ່າວຫາວ່າມີການສໍ້ລາດບັງຫຼວງ. ທຣຳ ແລະ ພັນທະມິດ ສົງໄສວ່າ Biden ໃຊ້ອຳນາດ ໃນຂະນະທີ່ເປັນຮອງປະທານາທິບໍດີຂອງສະຫະລັດໃນປີ 2016 ເພື່ອຊ່ວຍເຫຼືອ Burisma ໂດຍຖືກໄຕ່ສວນໂທດທາງອາຍາ.

ວັນທີ 1 ຕຸລາ ປະທານາທິບໍດີສະຫະລັດ ຂຽນລົງໃນທະວິດເຕີ ຮຽກການໄຕ່ສວນຮ້ອງຟ້ອງເຂົາ ໂດຍພັກເດໂມແຄຣດ ເປັນຜູ້ນຳນັ້ນວ່າ ເປັນພຶດຕິກຳກະບົດ. “ ເມື່ອຂ້ອຍເຂົ້າໃຈບັນຫາຈະແຈ້ງແລ້ວ, ຂ້ອຍສາມາດສະຫຼຸບໄດ້ວ່າ: ສິ່ງທີ່ກຳລັງເກີດຂຶ້ນຢູ່ໃນຂະນະນີ້ ມັນບໍ່ແມ່ນການຮ້ອງຟ້ອງ ຫາກເປັນການ ລັດຖະປະຫານ ” ທຣຳຂຽນ.

ຫົວໜ້າທຳນຽບຂາວບໍ່ມີຄວາມລັ່ງເລໃຈໃນການໂຈມຕີທ່ານ Adam Schiff, ປະທານຄະນະກຳມະການສືບລັບຂອງສະພາຕໍ່າ ແລະ ປະທານສະພາຕໍ່າ Nancy Pelosi ທ່ານກ່າວວ່າ: Schiff ຫັ້ນຄວນຈະຖືກຈັບຍ້ອນ “ ໂທດກະບົດຊາດ ”, ສິ່ງທີ່ Pelosi ປະກາດໃນອາທິດກ່ອນໜ້ານີ້ “ ເປັນການຂີ້ຕົວະ ”. ທ່ານຍັງກ່າວຕໍ່ໄປວ່າ: “ ຂ້ອຍຈະເຮັດວຽກກັບ Schiff ແລະ Pelosi ກໍຄືຜູ້ອື່ນໆ ເບິ່ງວ່າແມ່ນຫຍັງຈະເກີດຂຶ້ນ ”. ທຣຳ ຢືນຢັນວ່າ: ເຂົາບໍ່ໄດ້ເຮັດຫຍັງຜິດພາດ ໃນການໂອ້ລົມກັບຜູ້ນຳ ຢູເຄຣນ ໃນລະຫ່ວາງເດືອນກໍລະກົດຜ່ານມາ.