ອາກາດປ່ຽນ ກໍຂາດຄວາມສະຖຽນ

ໂດຍ: ມຶກບໍ່ແຫ້ງ

ການປ່ຽນແປງດິນຟ້າອາກາດໄດ້ກາຍເປັນບັນຫາໃຫຍ່ ແລະ ໄພຂົ່ມ ຂູ່ທົ່ວໂລກທີ່ກໍາລັງກັງວົນເຊັ່ນກັບສປປລາວທີ່ໄດ້ເຫັນຜົນກະທົບຍ້ອນການປ່ຽນແປງດິນຟ້າອາກາດນັບມື້ນັບຈະແຈ້ງ ແລະ ຮ້າຍແຮງຂຶ້ນ.ໃນອາທິດນີ້ ຢູ່ນະຄອນນິວຢອກ ຜູ້ນໍາຂອງບັນດາປະເທດໃນ ໂລກຈະໄດ້ລົມແລະປຶກສາຫາລືກັນກ່ຽວກັບການປ່ຽນແປງດິນຟ້າອາດໂດຍສະເພາະແມ່ນບາດກ້າວໃນການຈັດຕັ້ງປະຕິບັດສັນຍາປາຣີທີ່ໄດ້ເຊັນກັນໃນປີ 2015 ເຊິ່ງສປປລາວເຮົາກໍເປັນປະເທດທີ່ໄດ້ລົງນາມໃນສັນຍາດັ່ງກ່າວ.

ພ້ອມກັບການຈັດກອງປະຊຸມຂອງອົງການສະຫະປະຊາຊາດກ່ຽວກັບການປ່ຽນແປງດິນຟ້າອາກາດຢູ່ທ່ີນິວຢອກອາທິດນີ້, ທົ່ວໂລກໄດ້ມີການ ເຕົ້າໂຮມຂອງສາທາລະນະຊົນຢູ່ຫຼາຍປະເທດເຊັ່ນ: ອົດສະຕາລີ,ຝຣັ່ງ, ເຢຍລະມັນ ແລະ ປະເທດອື່ນໆເພື່ອຊຸກຫນຸນໃຫ້ ລັດຖະບານຂອງຕົນເອົາໃຈໃສ່ເພີ່ມຕື່ມກ່ຽວກັບການປ່ຽນແປງດິນຟ້າອາກາດໂດຍການນໍາໃຊ້ມາດຕະການຕ່າງໆ ນັບແຕ່ການຫຼຸດຜ່ອນປລາສຕິກຈົນຮອດການສ້າງນະໂຍບາຍອື່ນໆ.

ໃນສປປລາວຜົນກະທົບຈາກການປ່ຽນແປງດິນຟ້າອາກາດນັບມື້ນັບ ເຫັນໄດ້ຊັດເຈນຕົວຢ່າງປີ 2018 ຫາ 2019 ມານີ້ ພວກເຮົາຄົນລາວໄດ້ພົບພໍ້ກັບໄພນໍ້າຖ້ວມນັບມື້ນັບຮຸນແຮງ, ທັງກວມເອົາບໍລິເວນກວ້າງຂວາງ ແລະ ມີຜົນກະທົບຫຼາຍຂຶ້ນກວ່າເກົ່າ. ເຊິ່ງສິ່ງດັ່ງກ່າວໄດ້ສ້າງຄວາມເສຍຫາຍຫຼາຍປະການທາງດ້ານຊີວິດແລະຊັບສິນ,ໂຄງລ່າງພື້ນຖານຕ່າງໆ, ກາຍເປັນອຸປະສັກຕົ້ນຕໍຂອງລັດຖະບານໃນການບັນລຸເປົ້າຫມາຍການພັດທະນາໂດຍສະເພາະການຫຼຸດຜ່ອນ ຄວາມທຸກຍາກ.

ນອກຈາກນໍ້າຖ້ວມແລ້ວ, ໄລຍະຕົ້ນລະດູຝົນປີນີ້ ພວກເຮົາຍັງໄດ້ເຫັນ ນໍ້າຂອງບົກແຫ້ງຜິດທໍາມະຊາດເຊິ່ງເກືອບວ່າບໍ່ເຄີຍເກີດຂຶ້ນມາກ່ອນ, ພ້ອມນັ້ນໃນປັດຈຸບັນທີ່ໃກ້ຈະສິ້ນສຸດລະດູຝົນນັ້ນນໍ້າງຶ່ມທີ່ເປັນສາຂາຂອງແມ່ນໍ້າຂອງກໍບົກແແຫ້ງຢ່າງຜິດຫູຜິດຕາເຊັ່ນກັນ, ອັນໄດ້ສ້າງຄວາມປະຫຼາດໃຈໃຫ້ແກ່ປະຊາຊົນທີ່ຖືເອົາແມ່ນໍ້າສາຍນີ້ລ້ຽງຊີວິດມາຫຼາຍເຊັ່ນຄົນເຊິ່ງຄໍາຖາມຈາກນີ້ໄປກໍຄືຖ້າແຫ້ງແຕ່ຕອນນີ້, ຮອດເດືອນ4-5 ແມ່ນໍ້າສາຍດັ່ງກ່າວຈະມີນໍ້າຢູ່ບໍ່? ເມື່ອເປັນເຊັ່ນນັ້ນພວກເຮົາເຮັດຫຍັງໄດ້ແດ່ເພື່ອສ້າງໃຫ້ປະເທດລາວເຂັ້ມແຂງ, ສາມາດປັບຕົວແລະທົນທານຕໍ່ການປ່ຽນແປງຂອງດິນຟ້າອາກາດ?

ມາຮອດປັດຈຸບັນລັດຖະບານລາວເຮົາກໍມີກົດຫມາຍ,ນະໂຍ ບາຍຫຼາຍຢ່າງເປັນຕົ້ນແມ່ນແຜນງານປັບຕົວ ແລະການຈັດຕັ້ງປະຕິບັດງານຕໍ່ການປ່ຽນແປງດິນຟ້າອາກາດປີ 2019 ແລະ ຍຸດທະສາດວ່າດ້ວຍການຄຸ້ມ ຄອງການປ່ຽນແປງດິນຟ້າອາກາດກໍກໍາລັງໄດ້ຮັບການທົບທວນ.

ແຕ່ທາງເລືອກຫນຶ່ງເພື່ອການຫຼຸດຜ່ອນຜົນກະທົບຂອງການປ່ຽນແປງດິນຟ້າອາກາດຂອງປະເທດເຮົາກໍຄື “ທາງອອກທີ່ອາໄສທໍາມະຊາດນັ້ນເອງ (Nature-based Solution) ເຊິ່ງປັດຈຸບັນກໍາລັງໄດ້ຮັບການປຶກສາຫາ ລືກັນຢ່າງກວ້າງຂວາງ”.

ສປປ ລາວ ເຮົາຖືໄດ້ວ່າຍັງເປັນປະເທດທີ່ທໍາມະຊາດຍັງຂ້ອນຂ້າງອຸດົມສົມບູນເຊິ່ງເປັນທ່າແຮງຫນຶ່ງທີ່ພວກເຮົາຄວນໃຫ້ຄວາມສໍາຄັນໃນການປັບຕົວ ແລະ ຫຼຸດຜ່ອນຜົນກະທົບຈາກການປ່ຽນແປງດິນຟ້າອາກາດເພື່ອຮັກສາໄດ້ຄວາມສະຖຽນລະພາບທາງດ້ານເສດຖະກິດ-ສັງຄົມ.