ທະນາຄານແຫ່ງ ສປປ ລາວ ມອບເງິນຊ່ວຍເຫລືອຜູ້ປະສົົບໄພນໍ້າຖ້ວມ.
ໃນວັນທີ 25 ກັນຍານີ້, ທີ່ກະຊວງແຮງງານ ແລະ ສະຫວັດດີການສັງຄົມ, ທ່ານ ລີປາວ ຢາງ ຫົວໜ້າຫ້ອງການກະຊວງແຮງງານ ແລະ ສະຫວັດດີການສັງຄົມ ໄດ້ຕາງໜ້າໃຫ້ຄະນະກຳມະປ້ອງກັນ ແລະ ຄວບຄຸມໄພພິບັດແຫ່ງຊາດຮັບເງິນຊ່ວຍເຫລືອຜູ້ປະສົບໄພນໍ້າຖ້ວມ ແລະ ເຄື່ອງອຸປະໂພກ-ບໍລິໂພກຕ່າງໆຈາກທະນາຄານແຫ່ງ ສປປ ລາວ ລວມມູນຄ່າ 72,8 ລ້ານກີບ ແລະ ຈາກທີມງານເສບສີລ໌ ຮ່ວມກັບໜ່ວຍງານການກຸສົນເພື່ອສັງຄົມ ຈຳນວນ 6 ລ້ານກວ່າກີບ ເພື່ອນຳໄປມອບໃຫ້ຜູ້ທີ່ໄດ້ຮັບຜົນກະທົບຈາກໄພນໍ້າຖວ້ມຢູ່ບັນດາແຂວງພາກກາງ, ພາກໃຕ້ໃຫ້ທົ່ວເຖິງ.
ໃນໂອກາດດັ່ງກ່າວ, ທ່ານ ລີປາວ ຢາງ ໄດ້ສະແດງຂອບໃຈຕໍ່ທະນາຄານ ແຫ່ງ ສປປ ລາວ ແລະ ທີມງານເສບສີລ໌ ຮ່ວມກັບໜ່ວຍງານການກຸສົນເພື່ອສັງຄົມ, ທີ່ໄດ້ໃຫ້ການຊ່ວຍເຫລືອຜູ້ປະສົບໄພນໍ້າຖ້ວມໃນຄັ້ງນີ້ ເພື່ອແກ້ໄຂບັນເທົາທຸກຊີວິດການເປັນຢູ່ໃຫ້ກັບສູ່ສະພາບປົກກະຕິໄດ້ໂດຍໄວ.
ຂ່າວໃຫ້ຮູ້ອີກວ່າ: ໃນວັນທີ 23 ກັນຍາຜ່ານມາ ເຈົ້າເມືອງອຸທຸມພອນແຂວງສະຫວັນນະເຂດ ໄດ້ລົງຊຸກຍູ້ປະຊາຊົນບ້ານເຫລົ່າໃຫຍ່ ແລະ ບ້ານໂນນວິໄລ ສ້ອມແປງເສັ້ນທາງໃນສອງບ້ານດັ່ງກ່າວທີ່ໄດ້ຮັບຜົນກະທົບຈາກໄພນໍ້າຖ້ວມໃນຜ່ານມາໄດ້ຮັບຜົນສໍາເລັດ. ໃນໄລຍະດຽວກັນ, ພະແນກກະສິກໍາ ແລະ ປ່າໄມ້ແຂວງສະຫວັນນະເຂດ ກໍໄດ້ນໍາເຄື່ອງຊ່ວຍເຫລືອປະກອບມີ ເກືອກິນ, ແປ້ງນົວ, ປາກະປ໋ອງ, ຢາປົວພະຍາດ, ໝີ່ສໍາເລັດຮູບ ແລະ ນໍ້າດື່ມ, ສະບູ, ຢາສະຜົມ ລວມມູນຄ່າຫລາຍກວ່າ 14 ລ້ານກີບລົງມອບໃຫ້ປະຊາຊົນຜູ້ປະສົບໄພນໍ້າຖ້ວມຢູ່ບ້ານສອງຄອນ, ວິໄຊສົງ ແລະ ບ້ານດົງສະຫວ່າງທົ່ງ ເມືອງສອງຄອນແຂວງສະຫວັນນະເຂດ ເພື່ອເຂົາເຈົ້າມີເງື່ອນໄຂປັບປຸງຊິວິດການເປັນຢູ່ຫລັງນໍ້າຖ້ວມດີຂຶ້ນ.
