ນໍ້າຫຼຸດລົງ ສົ່ງໃຈຊ່ວຍປະຊາ
ໂດຍ: ມຶກບໍ່ແຫ້ງ
ນໍ້າຖ້ວມທີ່ໜັກໜາສາຫັດໃນປີນີ້ໄດ້ສ້າງຄວາມເຈັບປວດໃຫ້ແກ່ປະຊາ ຊົນຫຼາຍພັນຄົນໃນປະເທດ, ຕອນນໍ້າຂຶ້ນນັ້ນຫຼາຍຄົນກໍເອົາຊີວິດເກືອບ ບໍ່ລອດ ແຕ່ຕອນຈາກຫຼຸດລົງກໍຍັງຄົງເຫຼືອໄວ້ແຕ່ຄວາມເສຍຫາຍທີ່ຕ້ອງໄດ້ ຮັບການຟື້ນຟູ.
ການຕອບໂຕ້ ແລະ ຮັບມືໃນໄລຍະນໍ້າຂຶ້ນນັ້ນມັນຈຳເປັນຕ້ອງຮີບຟ້າວ ເພື່ອເອົາຊີວິດໃຫ້ລອດປອດໄພກ່ອນ ໂດຍບໍ່ທັນເອົາຮອດຊັບສິນວັດຖຸມີຄ່າ ແຕ່ຢ່າງໃດທີ່ຫາໄວ້ມາເປັນເວລາຫຼາຍປີ, ອັນນີ້ຄືໄພພິບັດທຳມະຊາດທີ່ໄດ້ ສ້າງຄວາມເສຍຫາຍ ເຊິ່ງບາງຄັ້ງບໍ່ສາມາດປະເມີນຄ່າໄດ້ເລີຍ.
ຂໍ້ມູນຫຼັງສຸດ ທີ່ໂຄສົກລັດຖະບານໄດ້ລາຍງານວັນທີ 16 ກັນຍານີ້ ໃຫ້ຮູ້ວ່າ ໄພນໍ້າຖ້ວມຢູ່ ສປປລາວ ໂດຍສະເພາະ 6 ແຂວງ ພາກກາງ ແລະ ພາກໃຕ້ ສົ່ງຜົນກະທົບໂດຍກົງຕໍ່ປະຊາຊົນຈຳນວນ 546,000 ຄົນ, ກວມເອົາ 47 ຕົວເມືອງ, ມີຜູ້ເສຍຊີວິດເຖິງ 18 ຄົນ, ປະຊາຊົນຖືກຍົກ ຍ້າຍກວ່າ 10,000 ຄອບຄົວ ເກືອບ 40,000 ຄົນ.
ນອກຈາກຜົນເສຍຫາຍດັ່ງກ່າວແລ້ວ, ພື້ນຖານການຜະລິດຂອງປະຊາ ຊົນ ແມ່ນເສຍຫາຍຢ່າງໜັກ ໂດຍສະເພາະເນື້ອທີ່ນາ, ສວນປູກພືດຜັກ ທີ່ເປັນ ການຄໍ້າສະບຽງອາຫານ ແລະ ລາຍໄດ້ແກ່ປະຊາຊົນ , ດັ່ງນັ້ນ ຈຶ່ງມີຄວາມຫຍຸ້ງຍາກໃນການຟື້ນຟູຊີວິດການເປັນຢູ່ຂອງຕົນ ຖ້າຫາກຂາດ ການຊ່ວຍເຫຼືອທີ່ພຽງພໍ.
ເພາະສະນັ້ນ, ການຊ່ວຍເຫຼືອຂອງປະຊາຊົນທີ່ໄດ້ຮັບຜົນກະທົບຈາກ ໄພນໍ້າຖ້ວມນັ້ນ, ມັນມີຄວາມສຳຄັນໃນການຮັບມືກັບໄພສຸກເສີນໃນລະ ຫວ່າງນໍ້າກຳລັງຖ້ວມ ແຕ່ເມື່ອນໍ້າຫຼຸດລົງການຊ່ວຍເຫຼືອກໍຍິ່ງມີຄວາມ ຕ້ອງການເຊັ່ນກັນໂດຍສະເພາະບັນດາແນວພັນເຂົ້າ, ພືດຜັກຕ່າງໆ.
ແນ່ນອນການຊ່ວຍເຫຼືອເບື້ອງຕົ້ນ ໂດຍສະເພາະປະເພດອາຫານ ແລະ ເຄື່ອງດື່ມນັ້ນມີຄວາມຈຳເປັນຢ່າງຍິ່ງຄຽງຄູ່ກັບການຮັກສຸຂະພາບ ຫຼີກລ່ຽງ ພະຍາດຕ່າງໆທີ່ກະຊວງສາທາລະນະສຸກເພິ່ນໄດ້ແຈ້ງເຕືອນ ແລະ ກະຊວງ ດັ່ງກ່າວກໍໄດ້ສົ່ງນັກວິຊາການ, ຊ່ຽວຊານລົງພື້ນທີ່ ເພື່ອຮັບປະກັນວ່າ ບັນດາ ພະຍາດ ເປັນຕົ້ນແມ່ນພະຍາດອະຫິວາ ແລະ ພະຍາດອື່ນໆບໍ່ສາມາດ ລະບາດໄດ້.
ມີການປະເມີນວ່າໄພນໍ້າຖ້ວມຍັງເຮັດໃຫ້ບັນຫາໂພຊະນາການກາຍ ເປັນເລື່ອງສຳຄັນທີ່ຕ້ອງໄດ້ເອົາໃຈໃສ່ ເພາະປະຊາຊົນໂດຍສະເພາະເດັກ ນ້ອຍ ບໍ່ສາມາດໄດ້ຮັບອາຫານທີ່ມີໂພຊະນາການພຽງພໍໃນລະຫວ່າງໄພ ນໍ້າຖ້ວມ, ເພາະສະນັ້ນ ຈຶ່ງເຫັນໄດ້ວ່າມີຫຼາຍບັນຫາປິ່ນອ້ອມພາຍຫຼັງນໍ້າ ຫຼຸດລົງ.
ກັບມາເວົ້າເລື່ອງ ການຜະລິດ, ຜູ້ຂຽນຄິດວ່າ ອາດເປັນການດີ ຖ້າພວກ ເຮົາ ເລັ່ງການສົ່ງເສີມການຜະລິດລະດູແລ້ງ ໂດຍມີນະໂຍບາຍພິເສດ ຕໍ່ຜູ້ຖືກຜົນກະທົບເຊັ່ນ ການສະໜອງແນວພັນໃຫ້ລ້າ, ເຮັດນາແຊງກໍບໍ່ເສຍ ຄ່າໄຟຟ້າ ແລະ ອື່ນໆ ເພື່ອເປັນການຟື້ນຟູຊີວິດການເປັນຢູ່ຂອງປະຊາຊົນ ໂດຍໄວ.
ເມື່ອປີ 2018 ທີ່ຜ່ານ ລັດຖະບານເຮົາ ສົມທົບກັບ ບັນດາຄູ່ຮ່ວມພັດທະ ນາທັງຫຼາຍ ໄດ້ເຮັດການປະເມີນຄວາມຕ້ອງການພາຍຫຼັງໄພພິບັດ (ນໍ້າຖ້ວມ) (PDNA) ເຊິ່ງເຫັນວ່າມີຄວາມສຳຄັນໃນການຊ່ວຍຜູ້ປະສົບ ໄພນໍ້າຖ້ວມໂດຍສະເພາະ ໃຫ້ຮູ້ຢ່າງແທ້ຈິງວ່າຄວາມຕ້ອງການທີ່ແທ້ຈິງ ຂອງປະຊາຊົນແມ່ນຫຍັງກັນແທ້, ອັນນີ້ກໍເປັນແນວທາງໜຶ່ງໃນການຊ່ວຍ ເຫຼືອປະຊາຊົນໃນປີ 2019 ໃຫ້ໄດ້ດີ.
ສະນັ້ນ, ທຸກພາກສ່ວນຈົ່ງພ້ອມຊ່ວຍເຫຼືອ ແລະ ເຮັດວຽກຮ່ວມກັບ ລັດຖະບານ ເພື່ອຊ່ວຍຊູປະຊາຊົນຜູ້ໄດ້ຮັບຜົນກະທົບຈາກໄພນໍ້າຖ້ວມປີນີ້ ໃຫ້ມີຊີວິດທີ່ດີກວ່າເກົ່າ.
