ຈຳນວນຜູ້ເສຍຊີວິດຈາກນ້ຳຖ້ວມຢູ່ສີລັງກາເປັນ 126 ຄົນ, ສູນຫາຍ 97 ຄົນ

​ໂກ​ລົມ​ໂບ 28 ພຶດສະພາ: ໜ່ວຍ​ກູ້​ໄພ​ສີ​ລັງກາ​ລາຍ​ງານ​ວ່າ: ຈາກ​ສະພາບ​ອາກາດ​ທີ່​ດີ​ຂຶ້ນ ​ແລະ ລະດັບ​ນ້ຳຫລຸດ​ລົງ​​ແລ້ວ ​ເຮັດ​ໃຫ້​ເຈົ້າໜ້າ​ທີ່​ສາມາດ​ເຂົ້າຊ່ວ​ຍ​ເຫລືອ​ປະຊາຊົນ​ຫລາຍ​ພັນ​ຄົນ​ທີ່​ຕ້ອງການ​ເຄື່ອງ​ຂອງ​ຈຳ​ເປັນ, ພາຍ​ຫລັງ​ປະສົບ​ອຸ​ທົກ​ກະ​ໄພ ​ແລະ​ ດິນ​ເຈື່ອນ ​ເຮັດ​ໃຫ້​ມີ​ຜູ້​ເສຍ​ຊີວິດ 126 ຄົນ.

​ເຈົ້າໜ້າ​ທີ່​ສີ​ລັງກາ​ຄາດ​ວ່າ: ຄວາມ​ຫວັງ​ທີ່​ຈະ​ພົບ​ຜູ້​ລອດ​ຊີວິດ​ໜ້ອຍ​ລົງ, ພາຍຫລັງ​ມີ​ລາຍ​ງານ​ຜູ້​ສູນຫາຍ 97 ຄົນ​ໃນ​ໄລຍະ​ສອງ​ວັນ​ທີ່​ຝົນຕົກ​ໜັກ ​ແລະ ດິນ​ເຈື່ອນ​ໄຫລ​ເຂົ້າຖ້ວມ​ພື້ນທີ່​ທາງ​ພາກ​ຕາ​ເວັນ​ຕົກ ​ແລະ ພາກ​ໃຕ້​ຂອງ​ປະ​ເທດ ​ເຮັດ​ໃຫ້​ມີ​ຜູ້​ບໍ່​ມີ​ບ່ອນຢູ່​ເຖິງ 100.000 ຄົນ. ຂະນະ​ດຽວ​ກັນ ສະຫະ​ປະຊາ​ຊາດ​ພວມ​ຕີ​ລາຄາ​​ໃຫ້ການ​ຊ່ວຍ​ເຫລືອ​ບັນ​ເທົາ​ທຸກ​ຕາມ​ລັດຖະບານ​ສີລັງກາ​ຮ້ອງ​ຂໍ, ​ເຖິງ​ວ່າສະພາບ​ອາກາດ​ຈະ​ດີ​ຂຶ້ນ​ແລ້ວ, ​ແຕ່​ມີ​ພະຍາກອນ​ອາກາດ​ວ່າ​ຈະ​ມີ​ຝົນຕົກ​ອີກ​.