ສ ເກົາຫຼີບໍ່ໃຫ້ບູລິມະສິດການຄ້າຕໍ່ຍີ່ປຸ່ນ

ຮຽບຮຽງໂດຍ: ລູກເມືອງພວນ

ວັນທີ 18 ກັນຍານີ້, ສ ເກົາຫຼີ ຕັດສິນໃຈເອົາຍີ່ປຸ່ນອອກຈາກ “ ບັນຊີຂາວ ” ການຄ້າທີ່ໄວ້ວາງໃຈຂອງ ສ ເກົາຫຼີ, ແຕ່ເວົ້າວ່າ: ການເຮັດແບບນີ້ບໍ່ແມ່ນເປັນການຕອບໂຕ້ຄືນຕໍ່ ໂຕກຽວ ແຕ່ຢ່າງໃດ.

ການຕັດສິນໃຈເອົາຍີ່ປຸ່ນອອກຈາກ “ ບັນຊີຂາວ ” ມີຜົນປະຕິບັດການໄດ້ໃນມື້ນີ້ ເລີຍທີ 18 ກັນຍາ. ກະຊວງອຸດສາຫະກຳ-ການຄ້າ ແລະ ພະລັງງານ ສ ເກົາຫຼີໃຫ້ຮູ້ວ່າ: ເຊອູນ ໄດ້ກະກຽມແຜນການດັ່ງກ່າວ ມາເປັນເວລາໜຶ່ງເດືອນແລ້ວ.

 “ ຈຸດປະສົງຂອງການປ່ຽນແປງຂໍ້ກຳນົດການຄ້າໃໝ່ ແມ່ນແນໃສ່ປັບປຸງລະບົບກວດກາການສົ່ງອອກຂອງ ສ ເກົາຫຼີ ຫາກບໍ່ແມ່ນເປັນການຕອບໂຕ້ຍີ່ປຸ່ນ ” – ກະຊວງການຄ້າ-ອຸດສາຫະກຳ ແລະ ພະລັງງານ ສ ເກົາຫຼີ ກ່າວ.

ຂໍ້ກຳນົດການຄ້າໃໝ່ ຈະເພີ່ມຂັ້ນຕອນ ແລະ ແກ່ຍາວເວລາຂໍອະນຸຍາດບາງລາຍການສິນຄ້າທີ່ພົວພັນເຖິງອາວຸດຂອງ ສ ເກົາຫຼີ ໄປຍັງຍີ່ປຸ່ນ ອອກໄປ.

ຄວາມເຄັ່ງຕຶງລະຫ່ວາງການຄ້າສອງປະເທດເພີ່ມທະວີຂຶ້ນ ໃນລະຫ່ວາງເດືອນກໍລະກົດຜ່ານມາ, ພາຍຫຼັງ ໂຕກຽວ ຫຼຸດຜ່ອນການສົ່ງອອກອຸປະກອນເທັກໂນໂລຢີສູງທີ່ ສ ເກົາຫຼີ ມີຄວາມຕ້ອງການເຊັ່ນ: ອຸປະກອນຊັກນຳໄຟຟ້າ, ໜ້າຈໍສຳພັດໂທລະສັບ. ຍີ່ປຸ່ນໄດ້ເອົາ ສ ເກົາຫຼີໃຕ້ອອກຈາກ “ບັນຊີຂາວ” ພ້ອມດຽວກໍຫ້າມ 27 ປະເທດຮ່ວມການຄ້າ ຈຳກັດການສົ່ງອອກສິນຄ້າໄປຍັງ ເຊອູນ ໂດຍອ້າງວ່າ ເຊອູນ ມີລະບົບການສົ່ງອອກບໍ່ເປັນໜ້າເຊື່ອຖື.

ອາທິດກ່ອນໜ້ານີ້, ສ ເກົາຫຼີ ໄດ້ສົ່ງຄຳຮ້ອງໄປຍັງອົງການການຄ້າໂລກ(WTO), ກ່າວຫາຍີ່ປຸ່ນສະກັດກັ້ນການສົ່ງອອກ. ຕາມຂໍ້ກຳນົດຂອງອົງການການຄ້າໂລກ ລະບຸວ່າ: ສອງປະເທດຈະເຈລະຈາກັນ ເພື່ອຫຼຸດຜ່ອນຄວາມເຄັ່ງຕຶງ. ຖ້າຫາກບໍ່ສາມາດໂລ່ງລອຍກັນໄດ້ WTO ຈະຈັດຕັ້ງສະພາໜຶ່ງຂຶ້ນເພື່ອແກ້ໄຂບັນຫາດັ່ງກ່າວ.