ເຈົ້າໜ້າທີ່ເມືອງໂພນທອງກັກຕົວຜູ້ກະທຳຜິດໃນການໂຄສະນາ

ຂປລ: ໃນວັນທີ 12 ກັນຍາ 2019 ເຈົ້າໜ້າທີ່ຮັກສາຄວາມສະຫງົບ ເມືອງໂພນທອງ ແຂວງຈໍາປາສັກ ໄດ້ກັກຕົວ ນາງ ຮວ່າຍເຮືອງ ໄຊຍະບູລີ (ໝວຍ) ອາຊີບຄ້າຂາຍ, ຢູ່ບ້ານສະເຫລົ້າ, ເມືອງໂພນທອງ ແຂວງຈຳປາສັກ ເພື່ອດຳເນີນຄະດີຕາມກົດໝາຍ ຍ້ອນຜູ້ກ່ຽວໄດ້ເຄື່ອນໄຫວໂຄສະນາຕ້ານ ສປປລາວ ຜ່ານສື່ສັງຄົມອອນລາຍ.

ປະມວນກົດໝາຍອາຍາ ມາດຕາ 117 ລະບຸວ່າ: ບຸກຄົນໃດ ຫາກໄດ້ໂຄສະນາໃສ່ຮ້າຍປ້າຍສີ ສາທາລະນະ ລັດ ປະຊາທິປະໄຕ ປະຊາຊົນລາວ ບິດເບືອນແນວທາງຂອງພັກ ແລະ ນະໂຍບາຍຂອງລັດປ່າວຂ່າວອະກຸສົນ, ເຮັດໃຫ້ມີຄວາມວຸ້ນວາຍດ້ວຍການເວົ້າ, ການຂຽນ, ການພິມ, ໜັງສືພິມ, ຮູບເງົາ, ວີດີໂອ, ຮູບພາບ, ເອກະສານ, ສື່ເອເລັກໂຕຣນິກ ຫລື ຮູບການອື່ນ ທີ່ມີເນື້ອໃນຕ້ານ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອເຮັດໃຫ້ອຳນາດແຫ່ງລັດອ່ອນເພຍ ຈະຖືກລົງໂທດ ຕັດສິນອິດສະຫລະພາບ ແຕ່ໜຶ່ງປີ ຫາ ຫ້າປີ ແລະ ຈະຖືກປັບໃໝແຕ່ 5.000.000 ກີບ 20.000.000 ກີບ.
ເຈົ້າໜ້າທີ່ຮັກສາຄວາມສະຫງົບ ເມືອງດັ່ງກ່າວ ໄດ້ກ່າວວ່າ: ການກັກຕົວຜູ້ກ່ຽວໃນຄັ້ງນີ້ແມ່ນໄດ້ຮັບຄຳເຫັນດີຈາກ ອົງການໄອຍະການທ້ອງຖິ່ນ ແລະ ປະຕິບັດຕາມຂະບວນຍຸຕິທຳ ຂອງລາວ ຢ່າງຄົບຖ້ວນ.

ນອກຈາກນີ້ ການກະທຳຂອງຜູ້ກ່ຽວຍັງຜິດຕໍ່ດຳລັດ ສະບັບເລກທີ 327/ນຍ ວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ເປັນຕົ້ນມາດຕາ 10 ກ່ຽວກັບເນື້ອໃນທີ່ບໍ່ອະນຸຍາດ ເຊັ່ນ: ຂໍ້ 2 ບໍ່ອະນຸຍາດໃຫ້ຍຸຍົງ ແລະ ສົ່ງເສີມການເຄື່ອນໄຫວທີ່ເປັນການກໍ່ການຮ້າຍ; ຄາດຕະກຳ ແລະ ປັ່ນປ່ວນສັງຄົມ ແລະ ຂໍ້ 6 ຫ້າມເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງ ແລະ ບິດເບືອນຄວາມຈິງ… ແລະ ມາດຕາ 16 ຂໍ້ຫ້າມ ຄື: ນໍາສະເໜີ, ສົ່ງ ແລະ ສົ່ງຕໍ່ຂໍ້ມູນຂ່າວສານທີ່ມີເນື້ອໃນຕາມທີ່ໄດ້ກໍານົດໄວ້ໃນມາດຕາ 10.

ນັບແຕ່ໄພພິບັດນ້ຳຖ້ວມເກີດຂຶ້ນຢູ່ພາກກາງ ແລະ ພາກໃຕ້ ເປັນຕົ້ນມາ ຜູ້ກ່ຽວໄດ້ປ່ອຍຂໍ້ຄວາມໂຄສະນາຢ່າງຕໍ່ເນື່ອງ ທີ່ສ້າງຄວາມເຂົ້າໃຈຜິດ ແລະ ປັ່ນປ່ວນສັງຄົມ ຊຶ່ງສວນທາງກັບຄວາມເອົາໃຈໃສ່ ຂອງລັດຖະບານ ໃນການແກ້ໄຂຜົນຮ້າຍຂອງໄພພິບັດ ແລະ ການໃຫ້ຄວາມຊ່ວຍເຫລືອບັນເທົາທຸກສຸກເສີນແກ່ປະຊາຊົນ ຢ່າງບໍ່ລົດລະຕະຫລອດເວລາ.
ຕາມທີ່ໄດ້ຊາບ ອຳນາດການປົກຄອງທ້ອງຖິ່ນ ກໍ່ໄດ້ຕັກເຕືອນ ແລະ ສຶກສາອົບຮົມຜູ້ກ່ຽວຫລາຍຄັ້ງແລ້ວໃນຜ່ານມາ, ແຕ່ຜູ້ກ່ຽວຍັງສືບຕໍ່ເຄື່ອນໄຫວໂຄສະນາທີ່ຜິດກົດໝາຍ.