ກາແດງລາວຊ່ວຍຕິດຕັ້ງເຄື່ອງງຕອງນ້ຳສະອາດໃຫ້ຜູ້ປະສົບໄພຢູ່ເມືອງສອງຄອນ
ພາຍຫລັງຮັບຂ່າວເກີດໄພນ້ຳຖ້ວມຢູ່ 6 ແຂວງພາກກາງ ແລະ ພາກໃຕ້ ໃນລະຫວ່າງວັນທີ 2-6 ກັນຍາຜ່ານມານີ້ ສົ່ງຜົນໃຫ້ປະຊາຊົນໃນ 43 ເມືອງ, 1.400 ກວ່າບ້ານ, 175.400 ກວ່າຄອບຄົວ, ມີ 13 ຄົນເສຍຊີວິດ ແລະ ສູນຫາຍອີກ 1 ຄົນ. ໃນຂະນະທີ່ຕ້ອງໄດ້ສຸມກຳລັງຍົກຍ້າຍປະຊາຊົນຫລາຍກວ່າ 14.000 ຄອບຄົວໄປຢູ່ບ່ອນປອດໄພ.
ຕໍ່ສະພາບດັ່ງກ່າວ ອົງການກາແດງລາວກໍໄດ້ຮີບຮ້ອນ ເພື່ອຊ່ວຍເຫລືອຜູ້ປະສົບໄພຢ່າງຮີບດ່ວນ ໂດຍສະເພາະແມ່ນໄດ້ຈັດໜ່ວຍງານອາສາສະໝັກລົງຊ່ວຍເມືອງສອງຄອນ ເຊິ່ງເປັນເມືອງໜຶ່ງໃນ 15 ເມືອງຂອງແຂວງສະຫວັນນະເຂດທີ່ປະສົບໄພພິບັດຄັ້ງນີ້ ດ້ວຍການນຳເອົາເຄື່ອງຊ່ວຍເຫລືອບັນເທົາທຸກໃນເບື້ອງຕົ້ນ, ລົດອຳບູລັງ 1 ຄັນ ພ້ອມດ້ວຍວິຊາການປະຖົມພະຍາບານ ແລະ ຢາປິ່ນປົວພະຍາດທີ່ຈຳເປັນລົງຊ່ວຍປິ່ນປົວສຸຂະພາບໃຫ້ປະຊາຊົນຢູ່ສູນພັກເຊົາຕ່າງໆຂອງ 36 ບ້ານທີ່ໄດ້ຮັບຜົນກະທົບ ພ້ອມນັ້ນກໍໄດ້ນຳເອົາເຮືອທ້ອງແບນຈຳນວນ 2 ລຳລົງຊ່ວຍຂົນຍ້າຍປະຊາຊົນ ແລະ ວັດຖຸສິ່ງຂອງຕ່າງໆຂອງເຂົາເຈົ້າໄປຢູ່ບ່ອນປອດໄພ ແລະ ພິເສດແມ່ນໄດ້ຕິດຕັ້ງເຄື່ອງຕອງນ້ຳທັນສະໄໝ AP700 ທີ່ຜະລິດຢູ່ອິນເດຍໃຫ້ປະຊາຊົນບ້ານສິງທ່າ ເຊິ່ງມື້ໜຶ່ງສາມາດຜະລິດນ້ຳໄດ້ຫລາຍເຖິງ 24.000 ລິດ ເພື່ອສະໜອງນ້ຳສະອາດໃຫ້ແກ່ຜູ້ປະສົບໄພດັ່ງກ່າວໄດ້ຊົມໃຊ້ຢ່າງພຽງພໍ.
ອາສາສະໝັກກາແດງລາວ ຜູ້ລົງໄປເຮັດວຽກຕົວຈິງໃຫ້ຮູ້ຕື່ມວ່າ: ເຖິງຈະມີການຊ່ວຍເຫລືອເປັນຈຳນວນຫລາຍຈາກພາກສ່ວນຕ່າງໆ ແຕ່ຍັງບໍ່ພຽງພໍກັບຄວາມຕ້ອງການຂອງຜູ້ປະສົບໄພໃນເມືອງດັ່ງກ່າວ ເຊິ່ງປັດຈຸບັນເຂົາເຈົ້າມີຄວາມຕ້ອງດານດ່ວນແມ່ນສະບຽງອາຫານ ໂດຍສະເພາະແມ່ນເຂົ້າສານປະມານ 300 ໂຕນ ຈຶ່ງຈະຊ່ວຍໃຫ້ເຂົາເຈົ້າຜ່ານຜ່າວິກິດນີ້ໄດ້ໂດຍໄວ.
