ຂາຍເຄື່ອງແຄມທາງບັນຫາແກ້ບໍ່ຕົກ ຄວາມຮັບຜິດຊອບແມ່ນໃຜ ?
ສະບາຍດີ ເພື່ອນຜູ້ອ່ານທີ່ຮັກແພງ, ນັບວ່າດົນສົມຄວນທີ່ພວກເຮົາບໍ່ໄດ້ມາສົນທະນາຮ່ວມກັນ ແລະ ມື້ນີ້ກໍທ້າຍເດືອນພຶດສະ ພາແລ້ວ, ທ່ຽງທຳ ຂໍຍົກເອົາເລື່ອງຂາຍເຄື່ອງແຄມທາງເປັນບັນຫາແກ້ບໍ່ຕົກຢູ່ໃນນະຄອນຫລວງວຽງຈັນ ແລະ ຄວາມຮັບຜິດ ຊອບແມ່ນໃຜ. ກໍດັ່ງພວກເຮົາຮັບຮູ້ດີນຳກັນແລ້ວວ່າ: ສະພາບນຳໃຊ້ແຄມທາງຍ່າງເປັນບ່ອນຂາຍເຄື່ອງ ແລະ ເຮັດບໍລິການ ຕ່າງໆຢູ່ຫລາຍເຂດໃນນະຄອນຫລວງວຽງຈັນເປັນສະພາບຊຳເຮື້ອມາແຕ່ດົນແລ້ວ ແລະ ໃຜໆກໍຮູ້ດີວ່າສິ່ງດັ່ງກ່າວໄດ້ກາຍເປັນອຸ ປະສັກໃຫ້ແກ່ການສັນຈອນໄປມາໃນນະຄອນຫລວງ ສົ່ງຜົນໃຫ້ຫລາຍເຂດຂາດຄວາມເປັນລະບຽບຮຽບຮ້ອຍ. ດັ່ງເຂດຕະຫລາດ ຄ້ອຍໄຟຟ້າໂພນຕ້ອງຈອມມະນີ, ເຂດຕະຫລາດຂົວດິນ ແລະ ໂປໂລຂຶ້ນມາໃໝ່ກໍແມ່ນເຂດແຈວັດອິນແປງ ລໍ້ຂາຍໝາກໄມ້, ເຂົ້າ ໜົມ, ໂຕະວາງຂາຍອາຫານໄດ້ກາຍເປັນສິ່ງກີດຂວາງແກ່ການຄົມມະນາຄົມໃນບໍລິເວນດັ່ງກ່າວ, ບາງມື້ມີບຸນມີງານແດ່ກໍຈົນເຮັດ ໃຫ້ການສັນຈອນໄປມາໃນບໍລິເວນນັ້ນເປັນອຳມະພາດ, ແຕ່ຈົນມາຮອດປັດຈຸບັນສະພາບດັ່ງກ່າວກໍຍັງບໍ່ທັນໄດ້ຮັບການແກ້ໄຂ ແລະ ບໍ່ຮູ້ວ່າພາກສ່ວນໃດຈຶ່ງມີອຳນາດພໍ ເພື່ອຈະສຸມໃສ່ແກ້ໄຂພະຍາດຊຳເຮື້ອນີ້. ຕາມທ່ຽງທຳຈື່ບໍ່ຜິດ ແມ່ນໃນລະຫວ່າງກ່ອນ ປີໃໝ່ລາວຜ່ານມານີ້, ທ່ານຮອງເຈົ້າຄອງໄດ້ມີກອງປະຊຸມຮ່ວມກັບພະແນກໂຍທາທິການ ແລະ ຂົນສົ່ງ, ອົງການບໍລິຫານ ແລະ ພັດທະນາຕົວເມືອງ (ອພບ), ພະແນກຈະລາຈອນ ແລະ ອຳນາດການປົກຄອງຕ່າງໆ ເພື່ອຈະສຸມໃສ່ແກ້ໄຂສະພາບສັນຈອນແອ ອັດ ແນໃສ່ຫລຸດຜ່ອນອຸປະຕິເຫດ ແລະ ໜຶ່ງໃນນັ້ນກໍແມ່ນເລັ່ງໃຫ້ຂະແໜງການ ແລະ ແຕ່ລະເມືອງກ່ຽວຂ້ອງດັ່ງກ່າວສຸມໃສ່ແກ້ ໄຂສະພາບການນຳໃຊ້ທາງຍ່າງເປັນບ່ອນຈອດລົດ ແລະ ການວາງຂາຍສິ່ງຂອງຕ່າງໆໃຫ້ໝົດໄປ, ຟັງແລ້ວໃຜໆກໍດີໃຈວ່າຈະເຫັນ ນະຄອນຫລວງວຽງຈັນເຮົາມີໜ້າຕາໃໝ່ຂຶ້ນມາຢ່າງຈັບອົກຈັບໃຈ, ແຕ່ແລ້ວຄວາມຄອງຄອຍດັ່ງກ່າວກໍນັບຫລາຍເດືອນຫລາຍ ປີແລ້ວ ແຕ່ກໍຍັງບໍ່ມີວີ່ແວວໃດໆເກີດຂຶ້ນ ແລະ ກໍບໍ່ຮູ້ວ່າດ້ວຍເຫດຜົນໃດ ແລະ ຍ້ອນຫຍັງ ? ຫລືວ່າ ຄວາມອາດສາມາດຂອງຂະ ແໜງການກ່ຽວຂ້ອງບໍ່ແຂງແຮງພໍບໍ ? ຫລືວ່າ ມີສິ່ງກີດຂວາງທາງອື່ນເຂົ້າມາສະກັດກັ້ນ ຫລື ບໍ່ ?. ເອົາລະຜູ້ຂຽນເຊື່ອວ່າສິ່ງຫຍໍ້ທໍ້ ດັ່ງກ່າວຈະໄດ້ຮັບການແກ້ໄຂໂດຍໄວ ເພື່ອຄວາມເປັນລະບຽບຮຽບຮ້ອຍຂອງຕົວເມືອງຫລວງ.
