ເຈົ້າແຂວງອຸດົມໄຊ ເນັ້ນໃຫ້ທຸກພາກສ່ວນເອົາໃຈໃສ່ຕ້ານ ແລະ ສະກັດກັ້ນການແຜ່ລະບາດພະຍາດຕ່າງໆ
ທ່ານ ຄຳພັນ ເຜີຍຍະວົງ ເຈົ້າແຂວງອຸດົມໄຊ ກໍໄດ້ເນັ້ນໃຫ້ທຸກພາກສ່ວນເອົາໃຈໃສ່ເປັນເຈົ້າການໃນການປ້ອງກັນ, ຕ້ານ ແລະ ສະກັດກັ້ນການແຜ່ລະບາດພະຍາດໝາກແດງໃຫ່ຍ, ໝາກແດງນ້ອຍ, ໄຂ້ຍຸງ, ອັກເສບສະໝອງຍີ່ປຸ່ນ, ອະຫິວາໝູ,ສະພາບໄພແຫ້ງແລ້ງ ແລະ ພະຍາດອື່ນໆ ທີ່ຈະເກີດຂຶ້ນໃຫ້ມີປະສິດທິຜົນ.
ທ່ານເຈົ້າແຂວງ ກ່າວວ່າ: ພະຍາດດັ່ງກ່າວແມ່ນພະຍາດທີຮ້າຍແຮງ ແລະ ບໍ່ທັນມີຢາປີ່ນປົວ, ປັດຈຸບັນໄດ້ແຜ່ລະບາດຢູ່ຫລາຍເມືອງຂອງແຂວງອຸດົມໄຊ ໂດຍສະເພາະພະຍາດໄຂ້ຍຸງລາຍລະບາດສູງເຖິງ 169 ຄົນ, ພະຍາດອະຫິວາໝູອາຟຣິກາ ມີຢູ່ 5 ເມືອງຄື : ເມືອງໄຊ, ເມືອງຫລາ, ເມືອງນາໝໍ້, ເມືອງແບ່ງ ແລະ ເມືອງຮຸນ. ໃນນັ້ນມີໝູຫລາຍຮ້ອຍໂຕຕິດເຊື້ອ ແລະ ຖືກທຳລາຍຖິ້ມ. ສຳລັບພະຍາດໝາກແດງໃຫ່ຍແມ່ນເກີດຢູ່ເມືອງຮຸນ ແລະ ເມືອງແບງ, ປັດຈຸບັນມີຜູ້ຕິດເຊື້ອທັງໝົດ 277 ຄົນ, ໃນນັ້ນເມືອງຮຸນມີ 274 ຄົນ, ພະຍາດອັກເສບສະໝອງຍີ່ປຸ່ນ ເກີດຢູ່ 6 ເມືອງຄື: ເມືອງໄຊ, ເມືອງງາ, ເມືອງຫລາ, ເມືອງນາໝໍ້, ເມືອງຮຸນ ແລະ ເມືອງປາກແບ່ງ ລວມມີ 37 ກໍລະນີ. ໃນນັ້ນເສຍຊີວິດແລ້ວ 4 ຄົນ. ຈາກສະພາບດັ່ງກ່າວໄດ້ສົງຜົນສະທ້ອນຕໍ່ຊີວິດການເປັນຢູ່ຂອງປະຊາຊົນ ກໍຄືການພັດທະນາເສດຖະກິດ-ສັງຄົນຂອງແຂວງເປັນຈໍານວນຫລາຍ. ພ້ອມນີ້ທ່ານໄດ້ຮຽກຮ້ອງໃຫ້ການນຳທຸກພາກສ່ວນລວມເຖິງການຈັດຕັ້ງບ້ານ ແລະ ປະຊາຊົນຈົ່ງເປັນເຈົ້າການຮ່ວມມື້ກັບພາກສ່ວນກ່ຽວຂ້ອງໃນການກຳຈັດພະຍາດດັ່ງກ່າວໃຫ້ໝົດໄປເທື່ອລະກ້າວ.
ສຳລັບຮອງເຈົ້າເມືອງແບງ ແຂວງອຸດົມໄຊ ໃຫ້ຮູ້ວ່າ: ສະພາບນ້ໍາຖ້ວມ ເມືອງຂອງຕົນຄັ້ງວັນທີ 17 ສິງຫາ ຜ່ານມາ, ສົ່ງຜົນໃຫ້ມີຄວາມເສຍຫາຍທັງຫມົດ ປະມານ 5 ຕື້ກວ່າກີບຄື: ບ້ານນາຫ້ວຍ, ຫ້ວຍລາ, ທ່າກາດ, ໂພແກ້ວ ແລະ ບ້ານແບ່ງຫຼວງ, ມີ 139 ຄອບຄົວ, ມີພົນລະເມືອງ 791 ຄົນ, ໄດ້ຮັບຜົນກະທົບໂຮງຫມໍເມືອງມີຕຶກອາຄານຈານວນ 5 ຫຼັງ, ຢາ ແລະ ອຸປະກອນການແພດເສຍຫາຍ, ເຄື່ອງໄຟຟ້າ ແລະ ອື່ນໆລວມມູນຄ່າເສຍຫາຍທັງຫມົດ: 424 ລ້ານກວ່າກີບ. ເສັ້ນທາງຫຼວງແຫ່ງຊາດ 1 ຈຸດ ຖືກເຊາະເຈື່ອນ, ທາງຊົນນະບົຕຈາກບ້ານນາຫ້ວຍຫາບ້ານນາໂຮມ ຖືກຕັດຂາດ 3 ຈຸດ, ບ້ານນ້ໍາຕໍ້ ຫາ ບ້ານພູສິງ 1 ຈຸດ, ລະບົບນໍ້າປະປາເປເພເສຍຫາຍຈໍານວນ 24 ຈຸດ, ປັດຈຸບັນສາມາດ ແກ້ໄຂ ແລະ ສະຫນອງນ້ໍາໄດ້ແລ້ວ. ເນື້ອທີ່ນາຖືກຜົນກະທົບທັງຫມົດ 128 ເຮັກຕາ, ສວນສາລີຖືກຜົນກະທົບ 92 ເຮັກຕາ ແລະ ພືດອື່ນໆໄດ້ຮັບຜົນກະທົບ 16 ເຮັກຕາ, ສັດລ້ຽງເສຍຫາຍຈໍານວນ 280, ຫນອງປາ 61 ຫນອງ, ຊົນລະປະທານຖືກຜົນກະທົບ 9 ໂຄງການ ມີຈຸດຫົວງານເປເພ ແລະ ຄອງເຫມືອງໃຊ້ການບໍ່ໄດ້ 3 ເສັ້ນ. ປັດຈຸບັນໄດ້ມອບໃຫ້ຂະແຫນງການທີ່ກ່ຽວຂ້ອງຂອງເມືອງລົງສົມທົບກັບອານາດການປົກຄອງບ້ານເກັບກໍາຂໍ, ມູນຜົນເສຍຫາຍຢ່າງລະອຽດ. ສົມທົບກັບອົງການກາແດງນໍາເອົາເຄື່ອງຊ່ວຍເຫຼືອໄປມອບໃຫ້ປະຊາຊົນ ຜູ້ທີ່ໄດ້ຮັບຜົນກະທົບ ພ້ອມທັງນໍາເອົາກໍາລັງຊາວຫນຸ່ມຈາກສໍານັກງານອ້ອມຂ້າງເມືອງສົມທົບກັບ ສອງກອງບັນຊາການຫານ, ຕໍາຫຼວດ ລົງຊ່ວຍປະຊາຊົນເຮັດອະນາໄມເຮືອນຊານບ້ານຊ່ອງທີ່ໄດ້ ຮັບຜົນກະທົບ, ພ້ອມໄດ້ມອບເຂົ້າສານ ແລະ ເຄື່ອງຂອງທີ່ຈໍາເປັນຈໍານວນຫນຶ່ງໃຫ້ຜູ້ປະສົບໄພ ແລະ ຊອກບ່ອນພັກຊົ່ວຄາວໃຫ້ຄອບຄົວທີ່ຖຶກຜົນກະທົບ, ແລ້ວກະກຽມຈັດສັນດິນປູກສ້າງໃຫມ່ ແລະ ພົວພັນນໍາ ຍທຂ ເມືອງນາສະເຫນີ ພະແນກຍທຂແຂວງພິຈາລະນາຊ່ວຍແກ້ປັບປຸງນ່ອນປຸກສ້າງເຮືອນຊານ ແລະ ພື້ນຟູເນື້ອທີ່ນາທີ່ສາມາດຟື້ນຟູໄດ້ເພື່ອຜະລິດຄືນໃໝ່. ສໍາລັບເສັ້ນທາງແມ່ນໄດ້ແກ້ໄຂຂັ້ນພື້ນຖານໃຫ້ລົດສາມາດແລ່ນໄປມາໄດ້ທັງທາງຫຼວງແຫ່ງຊາດ ແລະ ເສັ້ນທາງຊົນນະບົດ. ສ້ອມແປງທໍ່ສົ່ງນ້ໍາປະປາໃຫ້ສາມາດນາໃຊໄດ້ເປັນປົກກະຕິ, ຊີ້ນໍາການວາງແຜນການເພື່ອປູກພືດລະດູແລ້ງທົດແທນໃຫ້ສໍາເລັດຜົນ.
