ອັງກິດຢຶດ ຢາເສບຕິດມີປະລິມານຫຼາຍເປັນປະຫວັດການ
ແປ ແລະ ຮຽບຮຽງໂດຍ: ລູກເມືອງພວນ
ອີງຕາມແຫຼ່ງຂ່າວ VN Express ວັນທີ 5 ກັນຍານີ້ ໃຫ້ຮູ້ວ່າ: ເຈົ້າໜ້າທີ່ຕຳຫຼວດ ອັງກິດ ໄດ້ພົບເຫັນ ເຮໂຣອິນ 1,3 ໂຕນ, ມູນຄ່າປະມານ 150 ລ້ານໂດລາ ໃນກຳປັ່ນ ຄອນແຕນເນີ ລຳໜຶ່ງ ໃນບັ້ນມ້າງຄະດີຢາເສບຕິດໃຫຍ່ທີ່ສຸດຂອງປະເທດອັງກິດ.
ອົງການຕ້ານອາດສະຍາກຳແຫ່ງຊາດ (NCA) ແລະ ກຳລັງປ້ອງກັນຊາຍແດນຂອງອັງກິດ ໄດ້ພົບເຫັນຢາເສບຕິດຈຳນວນດັ່ງກ່າວ ຖືກຊຸກເຊື່ອງໄວ້ໃນຫ້ອງນໍ້າກຳປັ່ນ Gibraltar ທີ່ຈອດທຽບທ່າຢູ່ທີ່ທ່າກຳປັ່ນ Felixstowe, ໃນວັນທີ 30 ສິງຫາຜ່ານມາ ແລະ ຖືກນຳເອົາມາລົງເຜີຍແຜ່ໃນ ເວບໄຊ ໃນວັນທີ 4 ກັນຍານີ້.
“ການຢຶດ ເຮໂຣອິນ ໃນຄັ້ງນີ້, ເປັນຄັ້ງທີ່ໃຫ່ຍທີ່ສຸດບໍ່ເຄີຍມີມາກ່ອນໃນປະເທດອັງກິດ ແລະ ກໍເປັນຄັ້ງທີ່ໃຫ່ຍທີ່ສຸດຂອງ ເອີຣົບ ” – ທ່ານ Matt Horne , ຮອງຫົວໜ້າກົມຮັບຜິດຊອບສືບສວນຂອງ NCA ກ່າວ.
ຢາເສບຕິດຈຳນວນດັ່ງກ່າວນີ້, ອາດຂາຍໄດ້ໃນລາຄາ 120 ລ້ານ ປອນ(ສະກຸນເງິນ ອັງກິດ ) ເທົ່າກັບ 150 ລ້ານໂດລາສະຫະລັດ.
—————————-
