ລາວທໍາລາຍອຸປະກອນຮັບສັນຍານດາວທຽມຜິດກົດໝາຍຈໍານວນຫລາຍ
ເມື່ອທ້າຍອາທິດຜ່ານມານີ້, ທີ່ສະໜາມກໍາຈັດຂີ້ເຫຍື້ອຫລັກ 32 ນະຄອນຫລວງວຽງຈັນ, ໄດ້ມີພິທີທໍາລາຍອຸປະກອນຮັບສັນຍານດາວທຽມທີ່ລັກລອບນໍາເຂົ້າບໍ່ຖືກຕ້ອງຕາມລະບຽບກົດໝາຍຂອງ ສປປ ລາວ ເປັນຈໍານວນຫລາຍຄື: ກ່ອງຮັບສັນຍານອິນໂຟແຊດ (Infoset) 2.879 ອັນ, ຈານຮັບສັນຍານ 355 ອັນ ແລະ ຫົວດູດສັນຍານ 375 ອັນ, ລວມມີມູນຄ່າກວ່າ 500 ລ້ານກີບ, ພາຍຫລັງຢຶດໄດ້ຈາກຮ້ານຂາຍເຄື່ອງອາໄຫລ່, ເຄື່ອງໄຟຟ້າຫລາຍແຫ່ງຂອງຊາວຕ່າງປະເທດໃນເຂດເມືອງຈັນທະບູລີ, ສີສັດຕະນາກ ແລະ ສີໂຄດຕະບອງໃນຜ່ານມາ, ໂດຍປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີກ່ຽວກັບການຕິດຕາມກວດກາການນໍາເຂົ້າ ແລະ ຈໍາໜ່າຍອຸປະກອນຮັບສັນຍານໂທລະພາບຜ່ານດາວທຽມຢູ່ ສປປ ລາວ, ເຊິ່ງອຸປະກອນດັ່ງກ່າວແມ່ນລັກລອບນໍາເຂົ້າມາຈາກປະເທດໃກ້ຄຽງທີ່ຜິດລະບຽບກົດໝາຍຂອງ ສປປ ລາວ ຄື: ບໍ່ໄດ້ຮັບສິດເພື່ອໃຫ້ບໍລິການໂທລະພາບຜ່ານດາວທຽມໃນລາວ, ບໍ່ຜ່ານການກວດກາ ແລະ ຮັບຮອງມາດຕະຖານເຕັກນິກຈາກຂະແໜງການກ່ຽວຂ້ອງ.
ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໃຫ້ຮູ້ວ່າ: ອຸປະກອນຮັບສັນຍານດາວທຽມດັ່ງກ່າວນີ້ແມ່ນໄດ້ນໍາໃຊ້ຫລາຍຢູ່ປະເທດເຮົາ ຍ້ອນມີຂາຍແຜ່ຫລາຍຢູ່ທົ່ວໄປທັງໃນຕົວເມືອງ ແລະ ຊົນນະບົດ ແລະ ຕິດຕັ້ງງ່າຍດາຍ, ແນວໃດກໍຕາມ, ອຸປະກອນດັ່ງກ່າວບໍ່ແມ່ນສິນຄ້າເກືອດຫ້າມກໍຕາມ, ແຕ່ຜູ້ນໍາເຂົ້າຕ້ອງໄດ້ຮັບອະນຸຍາດຈາກຂະແໜງການກ່ຽວຂ້ອງຕ່າງໆຕາມລະບຽບກົດໝາຍ.
ເຂົ້າຮ່ວມພິທີທໍາລາຍສິນຄ້າດັ່ງກ່າວນີ້, ມີທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ພ້ອມດ້ວຍຜູ້ຕາງໜ້າຈາກກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ກະຊວງການເງິນ ແລະ ກະຊວງປ້ອງກັນຄວາມສະຫງົບ.
