ກີມຈອງອູນ ໄດ້ເປັນປະມຸກແຫ່ງລັດແລ້ວ

ຮຽບຮຽງໂດຍ: ລູກເມືອງພວນ

ສະພາແຫ່ງຊາດ ສປປ. ເກົາຫຼີ ໄດ້ຜ່ານຮ່າງລັດຖະທຳມະນູນສະບັບປັບປຸງໃໝ່ ເພື່ອໃຫ້ ກີມຈອງອູນ ໄດ້ກາຍເປັນປະມຸກແຫ່ງລັດ ຖືກຕ້ອງຕາມກົດໝາຍ.

ສຳນັກງານຂ່າວສານແຫ່ງລັດຂອງ ສປປ. ເກົາຫຼີ(KCNA), ວັນທີ 29 ສິງຫານີ້, ປະທານສະພາແຫ່ງຊາດປະຊາຊົນສູງສຸດຂອງ ສປປ. ເກົາຫຼີ ທ່ານ Choe Ryong-hae ໃຫ້ຮູ້ວ່າ: “ ຖານະບົດບາດຕາມກົດໝາຍ ຂອງທ່ານ ກີມຈອງອູນ ໃນນາມເປັນຜູ້ນຳແຫ່ງລັດ ໄດ້ຖືກປັບປຸງໃຫ້ມີຄວາມໜັກແໜ້ນກ່ວາເກົ່າ, ມີສິດອຳນາດຕັດສິນທຸກບັນຫາຂອງຊາດ ”

ປະທານແຫ່ງຊາດຜູ້ປັດຈຸ ເປັນພຽງໃນນາມປະມຸກລັດເທົ່ານັ້ນ. ລັດຖະທຳມະນູນສະບັບປັບປຸງໃໝ່ນີ້, ໄດ້ຊີ້ແຈງວ່າ: ປະທານຄະນະກຳມະການສະມາຊິກສະພາແຫ່ງລັດ(SAG) ຢ່າງແທ້ຈິງແມ່ນ ທ່ານ ກີມຈອງອູນ ຊຶ່ງເປັນຜູ້ຕາງໜ້າປະຊາຊົນ ສປປ. ເກົາຫຼີ, ເປັນປະມຸກລັດ, ເປັນຜູ້ບັນຊາການທະຫານສູງສຸດ. ລັດຖະທຳມະນູນສະບັບກ່ອນໜ້ານີ້ ເອີ້ນ ກີມຈອງອູນ ພຽງແຕ່ເປັນ “ຜູ້ນຳສູງສຸດ ” ແລະ ເປັນຜູ້ບັງຄັບບັນຊາທະຫານຮອບດ້ານເທົ່ານັ້ນ.

ລັດຖະທຳມະນູນສະບັບປັບປຸງໃໝ່ທີ່ປະກາດອອກໃນວັນທີ 29 ສິງຫານີ້, ໄດ້ຮັບຮອງເອົາ ທ່ານ ກີມຈອງອູນເປັນປະມຸກແຫ່ງລັດ ແລະ ເປັນຜູ້ບັນຊາການທະຫານສູງສຸດຢ່າງເປັນທາງການ, ຊຶ່ງມີສິດອຳນາດອອກຄຳສັ່ງທາງກົດໝາຍ, ມະຕິ ແລະ ຂໍ້ຕົກລົງໃຫ່ຍໆ, ມີສິດເຕົ້າໂຮມ, ແຕ່ງຕັ້ງ ແລະ ປະຕິບັດໜ້າທີ່ໃນວຽກງານການຕ່າງປະເທດ.