ລາວ-ໄທ-ມຽນມາ ກຽມພ້ອມບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າ
ອົງການກອງທຶນອານຸລັກສັດປ່າໂລກ ໃຫ້ຮູ້ວ່າ: ໃນລະຫວ່າງວັນທີ 26-30 ສິງຫາ 2019 ທີ່ຊຽງລາຍປະເທດໄທ, ເຈົ້າໜ້າທີ່ກວດກາປ່າໄມ້ລາວ, ໄທ ແລະ ມຽນມາ ໄດ້ເຂົ້າຮ່ວມຝຶກອົບຮົມ ກ່ຽວກັບການການວາງແຜນ, ເພື່ອກຽມພ້ອມວຽກງານບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າ ໃຫ້ມີປະສິດຜົນ.
ປັດຈຸບັນ,
ການສະກັດກັ້ນການຄ້າ-ຂາຍ ສັດນໍ້າ-ສັດປ່າ ທີ່ຜິດກົດໝາຍ ຖືວ່າເປັນວຽກອັນຮີບດ່ວນ ແລະ ຈະຕ້ອງໄດ້ຮັບການແກ້ໄຂຢ່າງຈິງຈັງທັງຢູ່ພາຍໃນ
ແລະ ຂ້າມຊາດ, ຊຶ່ງເປັນຈຸດສໍາຄັນທີ່ຈະເຮັດໃຫ້ສັດປ່າສູນພັນ.
ພາຍໃຕ້ກົດໝາຍຂອງ ສປປ ລາວ, ຫາກບຸກຄົນໃດມີການຊື້-ຂາຍ, ເປັນເຈົ້າຂອງ ຫລື ເກັບຮັກສາໄວ້, ຂ້າ ຫລື ປຸງແຕ່ງ, ນໍາເຂົ້າ-ສົ່ງອອກ, ຫລື ນໍາຜ່ານສັດປ່າຫວງຫ້າມ ລວມທັງຊິ້ນສ່ວນ ແລະ ຜະລິດຕະພັນຂອງສັດປ່າດັ່ງກ່າວ ຈະຖືກລົງໂທດຕາມຄວາມເສຍຫາຍຂອງມູນຄ່າສິນຄ້າ ຫລື ຖືກຕັດອິດສະລະພາບໄລຍະຍາວ. ປະເພດສັດປ່າຫວງຫ້າມປະກອບດ້ວຍ ຜະລິດຕະພັນທີ່ເຮັດຈາກ ຊ້າງ, ເສືອ, ໝີ, ລິ່ນ, ກວາງ ແລະ ຊິ້ນສັດປ່າ ທີ່ຜິດກົດໝາຍ. ການກະທໍາດັ່ງກ່າວບໍ່ພຽງແຕ່ຈະຜິດກົດໝາຍ ແຕ່ຍັງເປັນເຫດຜົນຫລັກ ທີ່ຈະສົ່ງຜົນກະທົບໄປສູ່ການສູນພັນຂອງສັດປ່າຫວງຫ້າມອີກດ້ວຍ.
ອົງການກອງທຶນອານຸລັກ ສັດປ່າໂລກ(WWF-Laos) ໃນປັດຈຸບັນ ໄດ້ໃຫ້ການສະໜັບສະໜູນໂຄງການ ສ້າງຄວາມເຂັ້ມແຂງການບັງຄັບໃຊ້ກົດໝາຍ ເພື່ອຕ້ານ ແລະ ສະກັດກັ້ນ ການຄ້າ-ຂາຍ ສັດປ່າທີ່ຜິດກົດໝາຍໃນ ສປປ ລາວ ແລະ ການຮ່ວມມືກັບປະເທດເພື່ອນບ້ານ. ໂຄງການໄດ້ໃຫ້ການສະໜັບສະໜູນ 4 ແຂວງເປົ້າໝາຍ ທີ່ເປັນບູລິມະສິດ ເປັນຕົ້ນ ນະຄອນຫລວງວຽງຈັນ, ອຸ ດົມໄຊ, ຫລວງນໍ້າທາ ແລະ ບໍ່ແກ້ວ ແລະ ບັນດາແຂວງອື່ນໆ ກໍສາມາດໄດ້ຮັບການສະໜັບສະໜູນ ເພື່ອຕອບໂຕ້ກິດຈະກໍາອາຊະຍາກໍາສັດປ່າ ກໍລະນີຮີບດ່ວນ ຫລື ຫາກມີການກະທໍາຜິດທາງອາຍາທີ່ຮ້າຍແຮງເກີດຂຶ້ນ.
