ບຣາຊິລ ລະດົມເຮືອບິນຖອກນໍ້າມອດໄຟໄໝ້ປ່າ ອາເມຊອນ

ຮຽບຮຽງໂດຍ: ລູກເມືອງພວນ

ວັນທີ 24 ສິງຫານີ້, ກະຊວງປ້ອງກັນປະເທດ ບຣາຊິລ ໄດ້ລະດົມເຮືອບິນຖອກນໍ້າມອດໄຟໄໝ້ປ່າ ອາເມຊອນ ຢູ່ທາງທິດຕາເວັນຕົກຂອງ Rondonia,

ເຮືອບິນທີ່ລະດົມໄປຖອກນໍ້າມອດໄຟປ່າໃນຄັ້ງນີ້ ແມ່ນເຮືອບິນລຸ່ນ C-130 Hercules ຊຶ່ງມີຄວາມສາມາດບັນທຸກນໍ້າໄດ້ເຖິງ 12.000 ລີດໃນແຕ່ລະຖ້ຽວ. ປະທານາທິບໍດີຂອງ ບຣນຊິລ Jair Bolsonaro ໄດ້ອອກຄຳສັ່ງລະດົມກຳລັງທະຫານຢູ່ໃນ 7 ລັດ ຕໍ່ສູ້ກັບໄຟໄໝ້ປ່າ ອາເມຊອນ ໃນຄັ້ງນີ້ – ໂຄສົກລັດຖະບານ ບຣາຊິລ ອອກແຈ້ງການ ໃນວັນທີ 25 ສິງຫາ.

ຄຳປະກາດດັ່ງກ່າວມີຂຶ້ນ ພາຍຫຼັງບັນດາຜູ້ນຳ G7 ກຳລັງປະຊຸມກັນຢູ່ ຝຼັ່ງ ໄດ້ສະແດງຄວາມເປັນຫ່ວງຕໍ່ສະພາບການໄຟໄໝ້ປ່າ ອາເມຊອນຂອງ ບຣາຊິລ ໃນຄັ້ງນີ້. ວັນທີ 23 ສິງຫານີ້, ປະທານາທິບໍດີຂອງ ຝຼັ່ງ Emmanuel Macron ໃຫ້ຮູ້ວ່າ: ກອງປະຊຸມ G7 ໄດ້ມີຂໍ້ຕົກລົງວ່າດ້ວຍການ “ ຕອບສະໜອງງົບປະມານ ແລະ ພາຫະນະເຕັກນິກ ” ໃຫ້ແກ່ບັນດາປະຊາຊາດທີ່ໄດ້ຮັບຜົນກະທົບຈາກໄຟໄໝ້ປ່າ.

ປະທານາທິບໍດີ ທຣຳ ໄດ້ຂຽນລົງໃນ ທະວິດເຕີສ່ວນຕົວຮຽກຮ້ອງໃຫ້ ບຣາຊິລ ຕໍ່ສູ້ກັບໄຟໄໝ້ປ່າໃນຄັ້ງນີ້. ລັດຖະມົນຕີກະຊວງປ້ອງກັນປະເທດ ບຣາຊິລ Fernando Azevedo ໃຫ້ຮູ້ວ່າ: ມາເຖິງປັດຈຸບັນນີ້, ພວກເຂົາຍັງບໍ່ທັນໄດ້ຮັບການປະສານຫຍັງທັງໝົດຈາກສະຫະລັດ ຈາກຄຳປະກາດຂອງ ທຣຳ.

ປ່າ ອາເມຊອນ ຖືວ່າເປັນ “ ປອດ ” ທີ່ສຳຄັນຂອງໂລກ ເພື່ອປົກປ້ອງການເສື່ອມຖອຍອາກາດຂອງໂລກ, ຊຶ່ງໃນ 8 ເດືອນຕົ້ນປີນີ້ເກີດໄຟໄໝ້ປ່າແລ້ວ 73.000 ຄັ້ງ, ເພີ່ມຂຶ້ນ 83% ທຽບໃສ່ປີກາຍ ແລະ ມີສະຖິຕິສູງສຸດນັບແຕ່ປີ 2013 ເປັນຕົ້ນມາ – ອີງຕາມຂໍ້ມູນຈາດລັດຖະບານ ບຣາຊິລ.