ນໍ້າໄຫຼຊຸຈຸຊ້າງເຂົ້າໄຮ່

ໂດຍ: ມຶກບໍ່​ແຫ້ງ

ທ່າມກາງນໍ້າໄຫຼຊຸລົງຈາກບ່ອນສູງສູ່ທົ່ງພຽງຢ່າງກະທັນຫັນພາໃຫ້ປະຊາຊົນຢ້ານກົວ ແລະ ໃນຂະນະດຽວກັນນັ້ນຊ້າງແມ່ລູກອ່ອນ ແລະ ຊ້າງນ້ອຍອື່ນໆ​ກໍແຕກຕື່ນເຂົ້າໄຮ່ປະຊາຊົນ.

ພາບທີ່ພວກເຮົາປາກົດເຫັນສະພາບນໍ້າໄຫຼຊຸ, ນໍ້າໄຫຼນອງພັດເອົາເຮືອນ ຊານ, ໄຮ່ນາຮົ້ວສວນຂອງປະຊາຊົນໄປກັບສາຍນໍ້ານັ້ນມັນເປັນເລື່ອງທີ່ ໜ້າເຫັນໃຈເຊິ່ງໃນປັດຈຸບັນແມ່ນເກີດຂຶ້ນຢູ່ເມືອງປາກແບງແຂວງອຸດົມໄຊຖືວ່າຮ້າຍແຮງບໍ່ໜ້ອຍໜ້າໄປກວ່າເຫດການທີ່ຫາກໍເກີດຂຶ້ນເມື່ອບໍ່ດົນມານີ້ ຢູ່ເມືອງນານແຂວງຫຼວງພະບາງ, ແຂວງຫົວພັນແລະແຂວງຊຽງຂວາງ.

ກ່ອນການເກີດມີສະພາບນໍ້າໄຫຼຊຸວັນທີ 17 ສິງຫາ 2019 ຂອງທົ່ງນາ, ຮົ້ວສວນແລະບ້ານປະຊາຊົນເມືອງແບງແຂວງອຸດົມໄຊນັ້ນພວກເຮົາກໍໄດ້ ຍິນຂ່າວວ່າມີຝູງຊ້າງ 10​ ກວ່າໂຕໄດ້ເຂົ້າໄປຫາກິນຢູ່ບໍລິເວນໄຮ່ ແລະມ້າງເພຖຽງໄຮ່ຂອງປະຊາຊົນບ້ານຫາດນິກເມືອງຫຼາແຂວງອຸດົມໄຊ ເຮັດໃຫ້ ມີຜົນເສຍຫາຍທາງດ້ານຜົນລະປູກຫຼາຍສົມຄວນ.

ເມື່ອພວກເຮົາເຫັນຂ່າວນີ້ ກໍເປັນຕາອີຕົນທັງຄົນ ແລະ ສັດ, ປະຊາຊົນ ເຂດ ນັ້ນຍັງເພິ່ງອາໄສການເຮັດໄຮ່ ເພື່ອຄອງຊີບເຂົາເຈົ້າດັ່ງທີ່ໄດ້ ເຮັດມາຫຼາຍເຊັ່ນຄົນເມື່ອຖືກຊ້າງມາມ້າງເພທຳລາຍເຊັ່ນນັ້ນແລ້ວອາດເຮັດໃຫ້ ຜົນຜະລິດເຂົາເຈົ້າຫຼຸດໜ້ອຍລົງກວ່າທີ່ຕັ້ງເປົ້າໝາຍໄວ້.

ແຕ່ພ້ອມນັ້ນກໍຍັງອີຕົນຊ້າງປ່າເຫຼົ່ານັ້ນຢູ່ບ່ອນວ່າພວກມັນອາດມີບ່ອນ ຫາກິນຈຳກັດຂຶ້ນນັບມື້ເພາະປ່າໄມ້ທີ່ເຄີຍເພິ່ງພາອາໄສໄດ້ຖືກຕັດແຜ້ວຖາງ ເພື່ອ ທຳການຜະລິດໃນຮູບແບບຕ່າງໆ ເຊິ່ງເປັນການບັງຄັບໃຫ້ ບັນດາຊ້າງຝູງດັ່ງກ່າວຈຶ່ງໄດ້ພາລູກເຕົ້າເຫຼົ່າກໍຂອງພວກມັນຊອກຫາ ກິນຕາມໄຮ່ ຕາມນາປະຊາຊົນ.

ຫຼາຍຄົນຍັງຄິດຢູ່ວ່ານໍ້າໄຫຼຊຸກັບຝູງຊ້າງເຂົ້າໄຮ່ນັ້ນມັນກ່ຽວຂ້ອງກັນ ແນວໃດ? ທີ່ຈິງແລ້ວທັງສອງເຫດການອາດມາຈາກສາເຫດດຽວກັນ ຄືການທຳລາຍ ປ່າໄມ້, ທຳລາຍລະບົບນິເວດທີ່ອຸດົມສົມບູນ. ດັ່ງທີ່ ພວກເຮົາຮູ້ດີວ່າພາກ ເໜືອຂອງລາວສ່ວນໃຫຍ່ເປັນພື້ນທີ່ສູງຊັນ, ຖ້າຫາກ ບໍ່ມີປ່າໄມ້ທີ່ດູດຊຶມເອົານໍ້າທີ່ມາຈາກຝົນຕົກ ລົງຢ່າງຮຸນແຮງນັ້ນແລ້ວກໍຈະ ເກີດມີການໄຫຼຊຸຂອງນໍ້າຢ່າງຮຸນແຮງ.

ພ້ອມນັ້ນການທຳລາຍປ່າໄມ້ຄືດັ່ງກ່າວຍັງເປັນການພັດພາກທີ່ຢູ່ອາໄສຂອງບັນດາສັດປ່ານາໆ ຊະນິດຮວມທັງບັນດາຝູງຊ້າງເຫຼົ່ານັ້ນ.

ຫຼາຍຄົນຍັງຖິ້ມໂທດໃສ່ປະຊາຊົນວ່າເປັນຕົ້ນເຫດໃນການທຳ ລາຍປ່າໄມ້ໂດຍການຖ່າງປ່າເຮັດໄຮ່ເລື່ອນລອຍເຊິ່ງຄວາມຈິງແລ້ວປະຊາ ຊົນເຫຼົ່ານັ້ນອາດມີທາງເລືອກຈຳກັດໃນການຜະລິດສະບຽງອາຫານຂອງ ເຂົາເຈົ້າທີ່ສືບທອດກັນມາຫຼາຍເຊັ່ນຄົນ.

ມັນຂຶ້ນກັບວ່າພວກເຮົາຈະສາມາດສະໜອງທາງເລືອກທີ່ດີແລະຍືນຍົງກວ່າ ເກົ່າໃຫ້ເຂົາເຈົ້າໄດ້ຫຼາຍສໍ່າໃດ? ນະໂຍບາຍຢຸດຕິການຖາງ ປ່າເຮັດໄຮ່ອາດບໍ່ໄດ້ຜົນຈັກເທື່ອຕາບໃດທີ່ບໍ່ມີທາງເລືອກອື່ນທີ່ດີໃຫ້ປະຊາ ຊົນເຫຼົ່ານັ້ນ ສາມາດມີອາຫານກິນທີ່ພຽງພໍແລະມີລາຍໄດ້ ສາມາດໃຊ້ຈ່າຍໃນຍາມຈຳເປັນ.

ປັດຊະຍາໃໝ່ໃນການຄອງຊີບແບບຍືນຍົງນັ້ນພວກເຮົາບໍ່ຈຳເປັນຕ້ອງທຳລາຍປ່າເພື່ອຫາກິນແຕ່ຫາກິນນຳປ່າເຊັ່ນການຟື້ນຟູປ່າເພື່ອພັດທະນາ ການ ທ່ອງທ່ຽວແບບອະນຸລັກ, ໄດ້ທັງປ່າແລະສ້າງອາຊີບໃຫ້ປະຊາຊົນ, ເມື່ອມີປ່າຈະສາມາດຫຼຸດຜ່ອນຜົນກະທົບຈາກນໍ້າໄຫຼຊຸແລະຝູງຊ້າງ ກໍຍູທ່າງທຳມາຫາກິນ.