ຫ້ອງການວິຊາການ ມຊ ເຕືອນ ຜູ້ປົກຄອງ ແລະ ນັກຮຽນ-ນັກສຶກສາ ຢ່າຫລົງເຊື່ອການຫລອກລວງເຂົ້າ ມຊ
ເມື່ອມໍ່ໆມານີ້ທ່ານ ຄຳຜົງ ນາມມະວົງມີໄຊ ຫົວໜ້າຫ້ອງການວິຊາການ ມະຫາວິທະຍາໄລແຫ່ງຊາດ ໄດ້ອອກມາເຕືອນວ່າ: ຜ່ານມາ ໄດ້ມີກຸ່ມຄົນບໍ່ດີຈຳນວນໜຶ່ງ ເຄື່ອນໄຫວຕົວະຍົວະຫລອກລວງຜູ້ປົກຄອງ, ກໍຄືພໍ່ແມ່ ວ່າສາມາດວິ່ງເຕັ້ນແລ່ນເອົາລູກຫລານເຂົ້າຮຽນຢູ່ມະຫາວິທະຍາໄລແຫ່ງຊາດ ໂດຍນັກສຶກສາບໍ່ຕ້ອງຜ່ານການສອບເສັງ ຫລື ເສັງບໍ່ຜ່ານກໍສາມາດປອມແປງລາຍຊື່ໃຫ້ເຂົ້າຮຽນໄດ້ ແລະ ນີ້ໃນຊຸມປີຜ່ານມາທາງມະຫາວິທະຍາໄລແຫ່ງຊາດ ໄດ້ພົບເຫັນກໍລະນີທີ່ນັກສຶກສາໄດ້ປອມແປງເອກະສານເຂົ້າມາເຊັ່ນ: ໃບປະກາດຈົບຊັ້ນ ມໍປາຍ ແລະ ປ່ຽນລາຍຊື່, ລວມທັງການຊື້ຈ້າງເພື່ອໄດ້ໃຫ້ເຂົ້າສຶກສາຮ່ຳຮຽນຢູ່ມະຫາວິທະຍາໄລແຫ່ງຊາດ ສຸດທ້າຍກໍບໍ່ໄດ້ຮັບຜົນທັງເສຍຊັບສິນເງິນ-ຄຳ ຈຳນວນບໍ່ໜ້ອຍ. ຢ່າງໃດກໍຕາມກຸ່ມຄົນບໍ່ດີຈໍານວນໜຶ່ງໄດ້ຖືກລົງໂທດທາງວິໄນ ແລະ ມອບໃຫ້ເຈົ້າໜ້າທີ່ດຳເນີນຄະດີຕາມລະບຽບກົດໝາຍມາແລ້ວ.
ດັ່ງນັ້ນ ອີກເທື່ອໜຶ່ງ ທາງມະຫາວິທະຍາໄລແຫ່ງຊາດ ກໍໄດ້ອອກມາເຕືອນໃຫ້ສັງຄົມ, ກໍຄືຜູ້ປົກຄອງນັກຮຽນ-ນັກສຶກສາຢ່າຫລົງເຊື່ອກັບການຕົວະຍົວະໃນລັກ ສະນະດັ່ງກ່າວຢ່າງເດັດຂາດ ແລະ ທັງໄດ້ຢືນຢັນວ່າ ການສອບເສັງຄັດເລືອກເອົານັກສຶກສາເຂົ້າຮຽນ ຢູ່ມະຫາວິທະຍາໄລແຫ່ງຊາດສົກຮຽນນີ້ ແມ່ນຈະເນັ້ນຄວາມເຂັ້ມງວດ, ໂປ່ງໃສ ແລະ ຍຸຕິທຳຫລາຍຂຶ້ນ. ເນື່ອງຈາກປັດຈຸບັນການກວດຄະແນນ ແລະ ກວດຂໍ້ສອບ ແມ່ນໄດ້ໃຊ້ມາດຕະຖານສາກົນ ກໍຄືການນຳໃຊ້ລະບົບຄອມພິວເຕີ ຊຶ່ງເຮັດໃຫ້ມີຄວາມວ່ອງໄວ ແລະ ໂປ່ງໃສທີ່ສຸດ, ພ້ອມນີ້ການປະກາດຜົນການສອບເສັງ ແມ່ນໄດ້ຜ່ານການກວດກາຂອງຄະນະກຳມະການສອບເສັງລະດັບຊາດ, ໂດຍຈັດລຽງຄະແນນແຕ່ສູງຫາຕ່ຳ ຕາມເກນມາດຕະຖານຄະແນນທີ່ກຳນົດໃນລາຍວິຊາຢ່າງເຂັ້ມງວດ.
ພາຍຫລັງກວດກາລາຍຊື່ ແລະ ຄະແນນທີ່ຖືກຕ້ອງ ໂດຍຜ່ານການຮັບຮອງຜົນສອບເສັງຈາກກະຊວງສຶກສາທິການ ແລະ ກິລາ ພາຍໃນ 15 ວັນ ໂດຍຜູ້ຖືກຄັດເລືອກແມ່ນໃຫ້ມາລົງທະບຽນພາຍໃນ 30 ວັນ, ຖ້າກາຍກຳນົດແມ່ນສະຫລະສິດ. ຫລັງຈາກຮັບນັກສືກສາ ໄດ້ປະມານ 1 ເດືອນ, ກໍຈະມີການກວດເຊັກປະຫວັດ ແລະ ເອກະສານທຸກຢ່າງຂອງນັກສຶກສາໃຫ້ລະອຽດ ເພື່ອຮັບປະກັນຄວາມໂປ່ງໃສ ເຮັດໃຫ້ການພັດທະນາຊັບພະຍາກອນມະນຸດມີຄຸນນະພາບດີຂຶ້ນ.
