ເມືອງໄຊທານີເລັ່ງແກ້ໄຂບັນຫາປ້າຍໂຄສະນາຜິດລະບຽບ.
ບັນຫາປ້າຍໂຄສະນາທີ່ບໍ່ຖືກຕ້ອງຕາມລະບຽບກົດໝາຍໃນປັດຈຸບັນ ແມ່ນພົບເຫັນຫລາຍໃນຕົວເມືອງນະຄອນຫລວງວຽງຈັນ, ໄດ້ກາຍເປັນປາກົດການຫຍໍ້ທໍ້ໜຶ່ງທີ່ສັງຄົມມີຫາງສຽງວິພາກວິຈານກັນຫລາຍຕໍ່ພາກສ່ວນໃດຄຸ້ມຄອງ ແລະ ອານຸຍາດໃຫ້ຫົວໜ່ວຍທຸລະກິດດັ່ງກ່າວຕິດຕັ້ງປ້າຍແບບນີ້ຂຶ້ນ, ໂດຍສະເພາະເນື້ອໃນ ແລະ ຕົວໜັງສືຢູ່ເທິງແຜນປ້າຍຕ່າງໆເລົ່ານັ້ນ, ມີຫລາຍປ້າຍຈົນບໍ່ມີຕົວອັກສອນລາວເລີຍ.
ຕໍ່ກັບບັນຫາດັ່ງກ່າວ, ຮອງຫົວໜ້າຫ້ອງການຖະແຫລງຂ່າວ, ວັດທະນະ ທຳ ແລະ ທ່ອງທ່ຽວ (ຖວທ) ເມືອງໄຊທານີ ນະຄອນຫລວງວຽງຈັນ ໃຫ້ຮູ້ວ່າ: ເມືອງໄຊທານີ ເປັນເມືອງໜຶ່ງໃນ 9 ຕົວເມືອງຂອງນະຄອນຫລວງ ທີ່ປະສົບບັນຫາປ້າຍໂຄສະນາທີ່ບໍ່ຖືກຕ້ອງດັ່ງກ່າວມາເປັນເວລາດົນນານພໍສົມຄວນ, ເນື່ອງຈາກວ່າ ຜ່ານມາຍັງຂາດຄວາມເຂັ້ມງວດໃນການຕິດຕາມກວດກາ ແລະ ເຜີຍແຜ່ລະບຽບການຕິດຕັ້ງປ້າຍໃຫ້ແກ່ບັນດາຫົວໜ່ວຍທຸລະກິດ ແລະ ຜູ້ປະກອບການ ກໍຄືປະຊາຊົນຢ່າງທົ່ວເຖິງເທົ່າທີ່ຄວນ, ໄດ້ເຮັດໃຫ້ຜູ້ປະກອບການຖືເບົາ ແລະ ຕິດຕັ້ງປ້າຍໂຄສະນາຕາມໃຈ, ໂດຍສະເພາະແມ່ນການຂໍອະນຸຍາດ ເຊິ່ງທາງພາກສ່ວນກ່ຽວຂ້ອງບໍ່ສາມາດຮັບຮູ້ໄດ້ເຖິງການກະທຳຜິດໃນເບື້ອງຕົ້ນ ໄດ້ກາຍເປັນບັນຫາທີ່ແກ້ໄຂຍາກ, ແຕ່ເຖິງຢ່າງໃດກໍຕາມ, ໃນປັດຈຸບັນຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວເມືອງ ໄດ້ຮັບການຊີ້ນຳຈາກອົງການປົກຄອງເມືອງ ແລະ ນະຄອນຫລວງໃຫ້ເອົາໃຈໃສ່ແກ້ໄຂບັນຫາປ້າຍໂຄສະນາບໍ່ຖືກລະບຽບດັ່ງກ່າວໃຫ້ໝົດໄປ ແລະ ຜ່ານການລົງເກັບກໍາປ້າຍໂຄສະນາທີ່ບໍ່ຖືກຕ້ອງຢູ່ເມືອງໄຊທານີມີຢູ່ຫລາຍໃນແຄມທາງໃຫຍ່ບ້ານດອນໜູນ ແລະ ບ້ານໄຊສະຫວ່າງ ພົບເຫັນ 150 ກວ່າປ້າຍ, ພົ້ນເດັ່ນກວ່າໝູ່ແມ່ນປ້າຍຮ້ານຂາຍໂທລະສັບທີ່ຜູ້ປະກອບການອ້າງວ່າ: ບໍລິສັດຜູ້ຈໍາໜ່າຍໂທລະສັບເປັນຜູ້ຜະລິດ ແລະ ຕິດຕັ້ງໃຫ້, ເຊິ່ງຕໍ່ກັບບັນຫາດັ່ງກ່າວຫ້ອງການ ຖວທ ເມືອງໄດ້ປະສານສົມທົບກັບພາກສ່ວນກ່ຽວຂ້ອງລົງກວດກາຕົວຈິງ ພ້ອມທັງຊີ້ແຈງ ແລະ ຊຸກຍູ້ ໃຫ້ມີການປັບປຸງແກ້ໄຂຕໍ່ກັບການກະທຳຜິດດັ່ງກ່າວ. ພ້ອມນີ້, ຍັງໄດ້ມີແຜນຈັດກອງປະຊຸມຮ່ວມກັບຫ້ອງການໂຍທາທິການ ແລະ ຂົນສົ່ງ, ຫ້ອງການອຸດສາຫະກໍາ ແລະ ການຄ້າເມືອງ ລົງເຄື່ອນໄຫວຊຸກຍູ້ໃຫ້ຜູ້ປະກອບການເປັນເຈົ້າການແກ້ໄຂປ້າຍໂຄສະນາດັ່ງກ່າວໃຫ້ຖືກຕ້ອງຕາມລະບຽບກົດໝາຍ, ເຊິ່ງປ້າຍໂຄສະນາທີ່ຖືກຕ້ອງໄດ້ກໍານົດໄວ້ວ່າ: ປ້າຍໂຄສະນາຂອງຜູ້ປະກອບການເອກະຊົນຕ້ອງມີພື້ນສີເຫລືອງໂຕໜັງສືສີແດງ, ລັດວິສາຫະກິດພື້ນສີຂາວ ໂຕໜັງສືສີແດງ, ພາກລັດພື້ນສີຟ້າໂຕໜັງສືສີຂາວ, ປກສ-ປກຊ ພື້ນສີແດງໂຕໜັງສືສີຂາວ ແລະ ບັນດາອົງການຈັດຕັ້ງສາກົນ ທຸຕານູທູດ ຕ້ອງມີປ້າຍໂຄສະນາເປັນພື້ນສີຂາວ ໂຕໜັງສືສີຟ້າເປັນຕົ້ນ.
