ຮ່ອງລະບາຍນໍ້າຫລາຍເສັ້ນທາງໃນຕົວເມືອງອຸດຕັນ

ໃນຕອນເຊົ້າວັນສຸກ (ວັນທີ 9 ສິງຫາຜ່ານມານີ້) ການສັນຈອນຂອງຍານພາຫະນະຢູ່ເສັ້ນທາງຫລາຍສາຍໃນຕົວເມືອງເຫັນວ່າມີຄວາມແອອັດແລະພົບຄວາມຫຍຸ້ງຍາກສົມຄວນ, ເນື່ອງຈາກມີຝົນຕົກຕິດຕໍ່ກັນຫລາຍຊົ່ວໂມງແລ້ວເຮັດໃຫ້ເກີດນໍ້າຖ້ວມອັ່ງຂັງໃນຫລາຍເສັ້ນທາງ, ບາງສາຍທາງລະດັບນໍ້າສູງເຖິງ 30 ຊັງຕີແມັດ, ຕາມການລົງຕິດຕາມຂອງນັກຂ່າວລາວພັດທະນາພວກເຮົາເຫັນວ່າເສັ້ນທາງທີ່ມີນໍ້າຖ້ວມແມ່ນເສັ້ນທາງທ່າງ່ອນ, ເຂດສີ່ແຍກໄຟແດງທາດຫລວງ, ທາງ 13 ໃຕ້ເຂດຫລັກ 7, ດອນໜູນ, ເສັ້ນທາງສຸພານຸວົງແລະເສັ້ນທາງອື່ນໆ, ເຊິ່ງໄດ້ສົ່ງຜົນກະທົບຕໍ່ການສັນຈອນມີຄວາມສັບສົນຫຍຸ້ງຍາກຫລາຍສົມຄວນແລະປາກົດວ່າໄດ້ມີອຸປະຕິເຫດຕາມມາໃນຫລາຍຈຸດ. ສາເຫດຕົ້ນຕໍທີ່ພາໃຫ້ເກີດສະພາບນໍ້າຖ້ວມທາງດັ່ງກ່າວຍ້ອນຮ່ອງລະບາຍນໍ້າຕາມແຄມທາງມີການອຸດຕັນຈາກຂີ້ດິນ, ຂີ້ເຫຍື່ອເຮັດໃຫ້ນໍ້າໄຫລ່ລົງສູ່ຄູຄອງບໍ່ສະດວກ.ນອກນີ້ກໍຍັງມີບັນຫາຄວາມບໍ່ສະອາດ, ເສັ້ນທາງຊຸດໂຊມເປ່ເພຕາມມາອີກດ້ວຍ. ແນວໃດກໍຕາມ, ໄລຍະນີ້ກໍແມ່ນຢູ່ໃນຊ່ວງລະດູຝົນກໍຂໍໃຫ້ພາກສ່ວນກ່ຽວຂ້ອງມີແຜນການອານາໄມຮ່ອງລະບາຍນໍ້າໃຫ້ດີເພື່ອບໍ່ໃຫ້ມີບັນຫານໍ້າຖ້ວມອັ່ງຂັງໃນຕົວເມືອງ, ພ້ອມນີ້, ອໍານາດການປົກຄອງແຕ່ລະທ້ອງຖິ່ນຕ້ອງເພີ່ມທະວີຄວາມເປັນເຈົ້າການນໍາພາປະຊາຊົນອະນາໄມເສັ້ນທາງແລະບ່ອນຮົກເຮື້ອໃນຂອບເຂດຮັບພິຊອບຂອງຕົນໃຫ້ສະອາດຈົບງາມຂຶ້ນ.