ຮອງນາຍົກລັດຖະມົນຕີ ສອນໄຊ ສີພັນດອນ ເນັ້ນໃຫ້ເລັ່ງແກ້ໄຂແຮງງານເຖື່ອນຢູ່ລາວ

          ໃນໂອກາດເຂົ້າຮ່ວມກອງປະຊຸມສະຫລຸບຕີລາຄາ ແລະ ຖອດຖອນບົດຮຽນການຈັດຕັ້ງປະຕິບັດການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ແກ່ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ລາວ ໃນຂອບເຂດທົ່ວປະເທດ, ເມື່ອວັນທີ 14 ມີນານີ້, ທີ່ນະຄອນຫລວງວຽງຈັນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ແນະນຳໃຫ້ທິດກະຊວງແຮງງານ ແລະ ສະຫວັດດີການສັງຄົມ ແລະ ກະຊວງປ້ອງກັນຄວາມສະຫງົບ ໃນຖານະເປັນຄະນະຈັດຕັ້ງປະຕິບັດວຽກງານດັ່ງກ່າວໂດຍກົງ, ເພື່ອນຳໄປຈັດຕັ້ງປະຕິບັດຕົວຈິງໃຫ້ສອດຄ່ອງ ແລະ ມີປະສິດທິພາບຄື: 1. ກ່ອນອື່ນໝົດ ຕ້ອງກຳແໜ້ນແນວທາງຂອງພັກ ແລະ ລັດຖະບານຕໍ່ວຽກງານການຕ່າງປະເທດ ໃນສະພາບ ແລະ ເງື່ອນໄຂແຫ່ງການເຊື່ອມໂຍງກັບພາກພື້ນ ແລະ ສາກົນ, ໂດຍການສ້າງຄວາມເຂົ້າໃຈໃຫ້ແກ່ທຸກພາກສ່ວນທີ່ກ່ຽວຂ້ອງ, ໂດຍສະເພາະບັນດາສະຖານທູດທີ່ມີປະຊາຊົນຂອງຕົນນອນຢູ່ໃນກຸ່ມຜູ້ທີ່ເຮົາຈະຂຶ້ນທະບຽນໄດ້; 2. ທຸກການປະຕິບັດຕໍ່ຄົນຕ່າງປະເທດຕ້ອງເອົາໃຈໃສ່ເລື່ອງມາດຕະຖານສາກົນ, ເລື່ອງກົດໝາຍ ແລະ ລະບຽບການທີ່ກຳນົດໄວ້ ແລະ ຕ້ອງກຽມຄຳຕອບໃຫ້ລະອຽດ ແລະ ເປັນເອກະພາບກັນ ເພື່ອຊີ້ແຈງໃນເວທີສາກົນຕ່າງໆ; 3. ໃຫ້ອົງການປົກຄອງທ້ອງຖິ່ນທຸກຂັ້ນເອົາໃຈໃສ່ສຶກສາອົບຮົມ ແລະ ຊີ້ນຳພະນັກ ງານລັດຖະກອນ, ເຈົ້າໜ້າທີ່ທີ່ກ່ຽວຂ້ອງຂອງລັດ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນ ໃຫ້ເຫັນແກ່ຜົນປະໂຫຍດລວມຂອງຊາດເປັນຫລັກ, ບໍ່ໃຫ້ປິດບັງເຊື່ອງອຳ, ບໍ່ອຳນວຍຄວາມສະດວກຢ່າງເດັດຂາດຕໍ່ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ລາວ; 4. ໃຫ້ເອົາໃຈໃສ່ຕື່ມໃນການຄຸ້ມຄອງກວດກາການນຳໃຊ້ແຮງງານຕ່າງປະເທດ, ຢູ່ບັນດາໂຄງການຂະໜາດໃຫຍ່ທີ່ມີເວລາຈຳກັດ ລວມທັງເຂດເສດຖະກິດສະເພາະ ແລະ ເຂດເສດຖະກິດພິເສດ ທີ່ມີການນຳໃຊ້ຄົນຕ່າງປະເທດເຮັດວຽກເປັນຈຳນວນຫລາຍນັ້ນ, ໂດຍໃຫ້ສົມທົບກັບພາກສ່ວນທີ່ເປັນເຈົ້າຂອງໂຄງການ; 5. ສຳລັບການແກ້ໄຂບັນຫາສະເພາະໜ້າແມ່ນໃຫ້ເບິ່ງຄືນຢ່າງລະອຽດ ບັນດານິຕິກຳທີ່ເຮົານຳໃຊ້ໃນປັດຈຸບັນ ວ່າມັນມີຄວາມສອດຄ່ອງ ແລະ ເໝາະສົມແລ້ວບໍ່, ໃນການນຳໃຊ້ຕໍ່ຄົນຕ່າງປະເທດທີ່ເປັນທັງຜູ້ອອກແຮງງານ, ຜູ້ລົງທຶນຄ້າຂາຍ ແລະ ເຄື່ອນໄຫວບໍລິການຕ່າງໆ. ນອກນີ້ ທ່ານຮອງລັດຖະມົນຕີ ຍັງໄດ້ກ່າວເນັ້ນວ່າ: ການຈັດຕັ້ງປະຕິບັດໜ້າທີ່ດັ່ງກ່າວ ແມ່ນມີຄວາມໝາຍ, ຄວາມສຳຄັນຫລາຍ, ຊຶ່ງອາດເວົ້າໄດ້ວ່າ ແມ່ນການປະຕິບັດຕາມແນວທາງການເມືອງຂອງພັກ, ການປະຕິບັດຕາມກົດໝາຍ, ລະບຽບການ, ຄຳສັ່ງ, ຍຸດທະສາດ ແລະ ແຜນພັດທະນາເສດຖະກິດ-ສັງຄົມຂອງລັດຖະບານຢ່າງແທ້ຈິງ.