ກວຕ ມອບ​ໃບຍ້ອງຍໍໃຫ້ນັກຮຽນດີເດັ່ນຈາກການແຂ່ງຂັນຫຸ່ນຍົນໃນເວທີສາກົນ

​ໃນ​ວັນ​ທີ 11 ກໍລະກົດ​ນີ້, ກະຊວງວິທະຍາສາດ ແລະ ເຕັກໂນໂລຊີ ​(ກວຕ) ໄດ້ຈັດພິທີມອບ​ໃບຍ້ອງຍໍ​ໃຫ້ນັກຮຽນທີ່ສາມາດຍາດໄດ້ຫລຽນລາງວັນ ແລະ ສ້າງຜົນງານໂດດເດັ່ນຈາກການເຂົ້າຮ່ວມແຂ່ງຂັນຫຸ່ນຍົນຊາວໜຸ່ມ ຄັ້ງທີ 5 ແລະ ການແຂ່ງຂັນໃນໂຄງການນັກວິທະຍາສາດໜຸ່ມນ້ອຍອາຊຽນ ຄັ້ງທີ 8, ໂດຍການ​ເຂົ້າ​ຮ່ວມ​ຂອງ​ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງດັ່ງກ່າວໄດ້ໃຫ້ກຽດມອບໃບຍ້ອງຍໍດັ່ງກ່າວ.

ການແຂ່ງຂັນຫຸ່ນຍົນຊາວໜຸ່ມສາກົນຄັ້ງທີ 5 5st International Youth Robot Competition (IYRC) ​ໄດ້ຈັດຂຶ້ນໃນທ້າຍ 2018 ຜ່ານມາ ທີ່ບາງກອກ ຣາຊະອານາຈັກໄທ ມີຜູ້ເຂົ້າຮ່ວມການແຂ່ງຂັນທັງໝົດ 25 ປະເທດ, ເຊິ່ງ ທ້າວ ບຸນຍາລິດ ໄຊສຸລຽນ ຈາກລາວເຮົາ ສາມາດຍາດໄດ້ ລາງວັນຊະນະເລີດໃນການແຂ່ງຂັນດັ່ງກ່າວ. ພ້ອມໄດ້ມອບໃບຍ້ອງຍໍໃຫ້ສູນການຮຽນຮູ້ VF (VF Learning Center) ທີ່ນຳພາຄະນະຊາວໜຸ່ມລາວເຂົ້າຮ່ວມການແຂ່ງຂັນຄັ້ງນີ້ອີກດ້ວຍ.

ສ່ວນໂຄງການວິທະຍາສາດໜຸ່ມນ້ອຍອາຊຽນບວກສາມ ຄັ້ງທີ 8 (ASEAN Plus Three Junior Science Odyssey (APT JSO) ໄດ້ຈັດຂຶ້ນໃນວັນທີ 9-15 ມິຖຸນາຜ່ານມາ ທີ່ແຂວງປະທຸມທານີ ຣາຊະ​ອານາຈັກ​ໄທ, ເຊິ່ງນັກຮຽນ ມສ ວຽງຈັນ ສປປ ລາວ ເຮົາກໍສາມາດຍາດໄດ້ຫລຽນເງິນ ຈາກການນຳສະເໜີໂພສເຕີ, ໂຮງຮຽນກຽດຕິສັກ ຍາດໄດ້ຫລຽນທອງແດງ ຈາກການເຮັດທົດລອງໃນຫ້ອງປະຕິບັດການອີກດ້ວຍ.