ລັດແຕ່ງຕັ້ງຄະນະກວດກາລົດພະນັກງານການນຳທີ່ມີຫລາຍຄັນເກີນຕຳແໜ່ງ

ລັດຖະບານຈະເອົາໃຈໃສ່ປະຕິບັດດໍາລັດວ່າດ້ວຍການປະກອບ ແລະ ຄຸ້ມຄອງລົດປະຈໍາຕໍາແຫນ່ງຂອງພະນັກງານການນໍາລະດັບສູງໃຫ້ເປັນຮູບປະທໍາຫລາຍກວ່າເກົ່າ, ພາຍຫລັງເຫັນວ່າຜ່ານມາຍັງມີພະນັກງານຂັ້ນສູງຈໍານວນຫນຶ່ງບໍ່ຢາກສົ່ງລົດຄືນໃຫ້ລັດ.ບັນຫາດັ່ງກ່າວ, ໄດ້ຮັບການເປີດເຜີຍຈາກທ່ານຮອງນາຍົກລັດຖະມົນຕີ ສົມດີ ດວງດີ ເມື່ອບໍ່ດົນມານີ້ວ່າ: ພາຍຫລັງນາຍົກລັດຖະມົນຕີໄດ້ອອກດໍາລັດສະບັບເລກທີ 15/ນຍ ລົງວັນທີ 5 ມັງກອນ2017 ວ່າດ້ວຍການປະກອບແລະ ຄຸ້ມຄອງລົດປະຈໍາຕໍາແຫນ່ງຂອງພະນັກງານການນໍາລະດັບສູງ, ໂດຍແບ່ງເປັນ 4 ປະເພດຄື:

ປະເພດ 1 ປະກອບມີ: ປະທານປະເທດຄວບຕໍາແຫນ່ງເລຂາທິການໃຫຍ່,ປະທານສະພາແຫ່ງຊາດ, ນາຍົກລັດຖະມົນຕີ ແລະ ກໍາມະການກົມການເມືອງສູນກາງພັກ ແມ່ນໃຫ້ປະກອບລົດປະຈໍາຕໍາແຫນ່ງ 3 ຄັນຄື: ລົດເກັງຄວາມແຮງບໍ່ເກີນ 3.500 ຊີຊີ,ລົດຈິບຄວາມແຮງບໍ່ເກີນ 4.500 ຊີຊີ ແລະ ລົດກະບະ 4ປະຕູຄວາມແຮງບໍ່ເກີນ 3.500ຊີຊີ, ພ້ອມປະກອບນ້ໍາມັນ 500 ລິດຕໍ່ເດືອນ.

ປະເພດ 2ປະກອບມີ: ເລຂາທິການສູນກາງພັກ, ຮອງປະທານປະເທດ, ຮອງປະທານສະພາແຫ່ງຊາດ ແລະ ຮອງນາຍົກລັດຖະມົນຕີ ໃຫ້ປະກອບລົດປະຈໍາຕໍາແຫນ່ງ 2 ຄັນຄື: ລົດເກັງຄວາມແຮງບໍ່ເກີນ 3.000ຊີຊີ ແລະ ລົດຈິບ, ພ້ອມປະກອບນໍ້າມັນ 350 ລິດຕໍ່ເດືອນ.

ປະເພດ 3 ປະກອບມີ: ກໍາມະການສູນກາງພັກ, ຫົວຫນ້າຄະນະພັກ, ລັດຖະມົນຕີ ແລະ ຫົວຫນ້າອົງການທຽບເທົ່າກະຊວງ,ປະທານກໍາມາທິການ ແລະ ເລຂາທິການສະພາແຫ່ງຊາດ,ປະທານສານປະຊາຊົນສູງສຸດ,ຫົວຫນ້າອົງການໄອຍະການປະຊາຊົນສູງສຸດ, ປະທານອົງການກວດສອບແຫ່ງລັດ,ຜູ້ວ່າການທະນາຄານແຫ່ງສປປ ລາວ, ປະທານສູນກາງແນວລາວສ້າງຊາດ, ປະທານຫລື ເລຂາອົງການຈັດຕັ້ງມະຫາຊົນຂັ້ນສູນກາງ, ເລຂາຄະນະພັກນະຄອນຫລວງ, ເລຂາຄະນະພັກແຂວງ, ເຈົ້າຄອງນະຄອນຫລວງ, ເຈົ້າແຂວງ,ປະທານສະພາປະຊາຊົນຂັ້ນນະຄອນຫລວງ ແລະ ຂັ້ນແຂວງ ໃຫ້ປະກອບລົດປະຈໍາຕໍາແຫນ່ງຈໍານວນ 2 ຄັນຄື: ລົດເກັງຄວາມແຮງບໍ່ເກີນ 2.500ຊີຊີ, ລົດກະບະຄວາມແຮງບໍ່ເກີນ 2.500 ຊີຊີ, ພ້ອມປະກອບນ້ໍາມັນ 300 ລິດຕໍ່ເດືອນ.

ປະເພດ 4 ປະກອບມີ: ກໍາມະການສໍາຮອງສູນກາງພັກ, ຮອງຫົວຫນ້າຄະນະພັກ,ຮອງລັດຖະມົນຕີ ແລະ ຮອງຫົວຫນ້າອົງການລັດທຽບເທົ່າກະຊວງ, ຮອງປະທານກໍາມາທິການ ແລະ ຮອງເລຂາທິການສະພາແຫ່ງຊາດ, ຮອງປະທານສານປະຊາຊົນສູງສຸດ,ຮອງຫົວຫນ້າອງການໄອຍະການປະຊາຊົນສູງສຸດ, ຮອງປະທານອົງການກວດສອບແຫ່ງລັດ, ຮອງຜູ້ວ່າການທະນາຄານ ແຫ່ງ ສປປ ລາວ, ຮອງປະທານສູນກາງແນວລາວສ້າງຊາດ, ຮອງປະທານຫລື ຮອງເລຂາອົງການຈັດຕັ້ງມະຫາຊົນຂັ້ນສູນກາງ, ຮອງເລຂາຄະນະພັກນະຄອນຫລວງ, ຮອງເລຂາຄະນະພັກແຂວງ, ຮອງເຈົ້າຄອງນະຄອນ ແລະ ຮອງເຈົ້າແຂວງໃຫ້ປະກອບລົດປະຈໍາຕໍາແຫນ່ງພຽງ 1 ຄັນຄື: ລົດເກັງຄວາມແຮງບໍ່ເກີນ 2.000 ຊີຊີ, ພ້ອມປະກອບນໍ້າມັນ 200 ລິດຕໍ່ເດືອນ. ນອກນີ້ດໍາລັດສະບັບນີ້ໄດ້ກໍານົດໃຫ້ຖອນຄືນລົດປະຈໍາຕໍາແຫນ່ງຂອງພະນັກງານການນໍາຂັ້ນສູງ ແລະ ລົດຮັບແຂກຢູ່ຂັ້ນສູນກາງ, ນະຄອນຫລວງ ແລະ ບັນດາແຂວງທີ່ເປັນປະເພດລົດ ບີເອັມດັບເບີນຢູ (BMW) ແລະ ລົດປະເພດອື່ນໆ ທີ່ບໍ່ເຫມາະສົມກັບຕໍາແຫນ່ງການນໍາລະດັບສູງ,ແຕ່ຜ່ານການປະຕິບັດຕົວຈິງໃນຜ່ານມາເຫັນວ່າການປະກອບລົດໃຫ້ສ່ວນຫລາຍເຮັດໄດ້ແຕ່ໃນລະດັບການນໍາສູງສຸດ, ສ່ວນລະດັບຮອງລົງມາແມ່ນຍັງບໍ່ທັນສໍາເລັດເທື່ອ, ຂະນະດຽວກັນການໃຫ້ ບັນດາລັດຖະມົນຕີ ແລະ ຮອງລັດຖະມົນຕີ ຕ້ອງສົ່ງລົດປະຈໍາຕໍາແຫນ່ງທີ່ມີຫລາຍຄັນເກີນກັບຕໍາແຫນ່ງນັ້ນແມ່ນບໍ່ທັນປະຕິບັດໄດ້ດີ, ຊຶ່ງບັນຫານີ້, ທ່ານນາຍົກລັດຖະມົນຕີ ໄດ້ແຕ່ງຕັ້ງຄະນະຮັບຜິດຊອບເພື່ອໄປກວດກາເບິ່ງຕົວຈິງວ່າ ລັດຖະມົນຕີ ແລະ ຮອງລັດຖະມົນຕີແຕ່ລະທ່ານມີລົດປະຈໍາຕໍາແຫນ່ງຈັກຄັນ ແລະ ໄດ້ມາຖືກຕ້ອງຕາມລະບຽບການ ຫລື ບໍ່?. ຖ້າເຫັນວ່າທ່ານໃດມີລົດປະຈໍາຕໍາແຫນ່ງເກີນກໍານົດແມ່ນຕ້ອງສົ່ງຄືນລັດ ຫລື ຖ້າທ່ານໄດ້ຢາກໄດ້ຍ້ອນນໍາໃຊ້ມາດົນແລ້ວກໍຕ້ອງຕີລາຄາເພື່ອໃຫ້ຊື້ເອົາ.ສ່ວນໃນລະດັບແຂວງແມ່ນຫຍຸ້ງຍາກຫລາຍເພາະລັດຖະບານບໍ່ມີງົບປະມານເພື່ອຊື້ລົດໃຫມ່ໄປແທນໃຫ້ການນໍາສູງສຸດຂອງແຂວງໄດ້, ຈຶ່ງຕ້ອງນໍາ ໃຊ້ຕາມທີ່ມີໄປກ່ອນ ແລະໃນ ລະດັບຂັ້ນກົມຕ່າງໆ ລັດຖະບານພວມຄົ້ນຄ້ວາອອກດໍາລັດໃຫມ່ສະເພາະຍ້ອນວ່າມີຈໍານວນຫລາຍ.