ຍາມຝົນສ່ຽງໄພ ເອົາໃຈໃສ່ກຽມຮັບມື

ໂດຍ: ມຶກບໍ່ແຫ້ງ

ຍາມຝົນ ແມ່ນຍາມທີ່ມີຄວາມສ່ຽງຫຼາຍແນວ ໜຶ່ງໃນນັ້ນກໍຄືໄພພິບັດທາງທໍາມະຊາດ ໂດຍສະເພາະນໍ້າຖ້ວມເຊິ່ງເປັນໄພຂົ່ມຂູ່ ຊີວິດ ແລະຊັບສິນຂອງປະຊາຊົນລາວທົ່ວປະເທດ, ເມື່ອເປັນເຊັ່ນນັ້ນພວກເຮົາຄວນກຽມພ້ອມຮັບມືກັນຫຼືຍັງ? ພໍກ້າວຮອດຍາມຝົນນັ້ນກໍເກີດມີຄວາມສ່ຽງຕໍ່ສຸຂະພາບ ແລະຊັບສິນຫຼາຍແນວ ໃນນັ້ນກໍແມ່ນ ໄພນໍ້າຖ້ວມ, ດິນເຊາະເຈື່ອນ ແລະ ພາຍຸ ທີ່ຈະຖ່ວງດຶງຊີວິດການເປັນຢູ່ຂອງປະຊາຊົນກໍຄືການພັດທະນາ ເສດຖະກິດ-ສັງຄົມຂອງຊາດ.

ປີ 2018 ຜ່ານມາໄດ້ກາຍເປັນປີໜຶ່ງທີ່ ປະຊາຊົນລາວໄດ້ປະສົບພົບພໍ້ກັບ ໄພພິບັດທາງທໍາມະຊາດໜັກທີ່ສຸດໂດຍສະເພາະ ນໍ້າຖ້ວມ ຫຼາຍກວ່າ 10 ແຂວງຂອງປະເທດເຮັດໃຫ້ປະຊາຊົນຈໍານວນຫຼາຍທີ່ມີຊີວິດທີ່ດີກັບກາຍມາເປັນຜູ້ທຸກຍາກ ຂັດສົນກໍມີເພາະ ໄຮ່ນາຮົ້ວສວນຖືກນໍ້າຖ້ວມ, ບາງພ່ອງເຮືອນຊານບ້ານຊ່ອງຖືກເຊາະເຈື່ອນໄປຕາມສາຍນໍ້າຢ່າງໜ້າສົງສານ.

ໃນປັດຈຸບັນ ຜົນກະທົບຈາກການປ່ຽນແປງຂອງດິນຟ້າອາກາດ ໄດ້ເພີ່ມທະວີຂຶ້ນເລື້ອຍໆ, ອຸນຫະພູມຂອງໂລກກໍເພີ່ມຂຶ້ນຊັກໃຊ້ ເຮັດໃຫ້ເກີດມີພາຍຸ, ຝົນຟ້າຄະນອງທີ່ຮ້າຍແຮງກວ່າເກົ່າ ແລະ ຕາມການຄົ້ນຄວ້າ ຂອງນັກວິຊາການຫຼາຍທ່ານ ກໍໃຫ້ທັດສະນະວ່າ ສປປລາວ ແມ່ນປະເທດໜຶ່ງທີ່ມີສ່ຽງຕໍ່ຜົນກະທົບຂອງການປ່ຽນແປງ ດິນຟ້າອາກາດ.

ສິ່ງດັ່ງກ່າວ ກໍເນື່ອງຈາກປະຊາຊົນ ສ່ວນຫຼາຍຍັງ ຢຶດຄອງການດໍາລົງຊີວິດອາໄສທໍາມະຊາດເປັນຕົ້ນຕໍແຕ່ຖ້າສະພາບການດິນຟ້າອາກາດຫາກປ່ຽນແປງໄປກໍຈະສົ່ງຜົນກະທົບ ຕໍ່ຊີວິດການເປັນຢູ່ໜັກທີ່ສຸດ ເບິ່ງເຫັນໄດ້ຢ່າງຊັດເຈນກໍແມ່ນໄພນໍ້າຖ້ວມທີ່ເກີດຂຶ້ນເລື້ອຍໆ ແລະ ນັບມ້ືນັບຮ້າຍແຮງຍິ່ງຂຶ້ນ, ໃນປີ 2018 ສປປ ລາວ ໄດ້ພົບພໍ້ກັບພາຍຸທີ່ນໍ້າເອົາປະລິມານນໍ້າຝົນຈໍານວນຫຼວງຫຼາຍລົງໃສ່ຜືນແຜ່ນດິນລາວເຮັດໃຫ້ເກືອບທຸກແຂວງພົບພໍ້ກັບໄພນໍ້າຖ້ວມໜັກ ເຊັ່ນ ຄໍາມ່ວນ, ສະຫວັນນະເຂດ, ຈໍາປາສັກ, ບໍລິຄໍາໄຊ, ແຂວງວຽງຈັນ,ແຂວງຊຽງຂວາງ, ອັດຕະປື,ນະຄອນຫຼວງວຽງຈັນ ແລະແຂວງອື່ນໆ.

ເມື່ອເປັນເຊັ່ນນັ້ນ, ພວກເຮົາຕ້ອງພາກັນກຽມພ້ອມຕັ້ງແຕ່ຫົວທີ, ສິ່ງໜຶ່ງພວກເຮົາເຮັດໄດ້ກໍຄືການຕິດຕາມສະພາບດິນຟ້າອາກາດຢ່າງເປັນປົກກະຕິ ໂດຍສະເພາະກະຊວງຊັບພະຍາກອນທໍາມະຊາດ ແລະ ສິ່ງແລດລ້ອມ ເພິ່ນໄດ້ມີການແຈ້ງການສະພາບດິນຟ້າອາກາດເປັນປະຈໍາ, ເຊິ່ງປະຊາຊົນ ສາມາດຕິດຕາມໄດ້ຫຼາຍຊ່ອງທາງບໍ່ວ່າໜັງສືພິມ, ວິທະຍຸ, ໂທລະພາບກໍຄືສື່ສັງຄົມທີ່ສາມາດເຜີຍແຜ່ໄດ້ຢ່າງວ່ອງໄວ.

ດັ່ງທີ່ພວກເຮົາຮູ້ວ່າ ຜ່ານມາມີບັນດາໂຄງການຈໍານວນຫຼາຍທີ່ລັດຖະບານເຮົາໄດ້ຮ່ວມມືກັບຄູ່ຮ່ວມມືພັດທະນາໃນການຊຸກຍູ້ສ້າງຄວາມເຂັ້ມແຂງແກ່ປະຊາຊົນໃນການກຽມພ້ອມໃນການຮັບມືກັບໄພພິບັດທາງທໍາມະຊາດຕາມແນວທາງຂອງ ສປປລາວ ແລະ ເມື່ອກອງປະຊຸມສະໄໝສາມັນເທື່ອ 7 ຂອງສະມາຊິກສະພາແຫ່ງຊາດ ຊຸດທີ VIII ທີ່ຜ່ານມາກົດໝາຍວ່າດ້ວຍການຄຸ້ມຄອງໄພພິບັດ ເຊິ່ງເປັນຂີດໝາຍສໍາຄັນທີ່ພວກເຮົາຈະຕ້ອງມີແຜນກຽມພ້ອມ ແລະ ຮັບມືໃຫ້ດີກວ່າເກົ່າ.

ເນື່ອງຈາກວ່າໃນໄລຍະຜ່ານມານັ້ນປະຊາຊົນທີ່ໄດ້ຮັບຜົນກະທົບຈາກໄພພິບັດທໍາມະຊາດໂດຍສະເພາະນໍ້າຖ້ວມນັ້ນຍັງບໍ່ໄດ້ຮັບການຊ່ວຍເຫຼືອ (ທັງກ່ອນ ແລະ ຫຼັງ) ເທົ່າທີ່ຄວນເຊິ່ງເປັນສິ່ງຈໍາເປັນໃນການຍົກສູງວຽກງານນີ້ໃນຕໍ່ໜ້າ, ຄວາມອາດສາມາດໃນການຮັບມື, ການຟື້ນຟູພາຍຫຼັງໄພພິບັດກໍແມ່ນປັດໄຈທີ່ໜຶ່ງວັດແທກຄວາມເຂັ້ມແຂງຂອງການພັດທະນາພວກເຮົາທີ່ຈະນໍາເອົາປະຊາຊົນພົ້ນຈາກຄວາມທຸກຍາກ.