ປະທານາທິບໍດີ ທຣຳ ພົບປະກັບປະທານຄະນະມົນຕີ-ຄະນະກຳມາທິການເອີຣົບ
ບຣຸກແຊນ 25 ພຶດສະພາ: ປະທານາທິບໍດີ ໂດນັນ ທຣຳ ຂອງອາເມລິກາ ເຂົ້າພົບທ່ານ ໂດນັນ ທັສ ປະທານຄະນະມົນຕີເອີຣົບ ແລະ ທ່ານ ໝອງ ຄລັອດ ຍຸງເກີ ປະທານຄະນະກຳມາທິການເອີຣົບ ເປັນເທື່ອທຳອິດໃນວັນທີ 25 ພຶດສະພານີ້ ຫວັງຟື້ນຟູການພົວພັນ.
ທ່ານ ທຣຳ ເດີນທາງເຖິງນະຄອນຫລວງບຣຸກແຊນ ຂອງແບນຊິກ ໃນວັນທີ 24 ພຶດສະພາ ຕາມເວລາທ້ອງຖິ່ນ ເພື່ອຫາລືກັບເຈົ້າໜ້າທີ່ລະດັບສູງຂອງສະຫະພາບເອີຣົບ ແລະ ເຂົ້າຮ່ວມກອງປະຊຸມສຸດຍອດອົງການສົນທິສັນຍາອັດລັງຕິກເໜືອ ຫລື ນາໂຕ. ທັງນີ້ ມີການຕັ້ງຂໍ້ສັງເກດວ່າ: ການຢ້ຽມຢາມນະຄອນຫລວງບຣຸກແຊນເທື່ອນີ້ອາດຈະເປັນສິ່ງທີ່ຍາກລຳບາກທີ່ສຸດສຳລັບການປະຕິບັດພາລະກິດໃນຕ່າງປະເທດເທື່ອທຳອິດຂອງທ່ານ ທຣຳ ໃນຖານະປະທານາທິບໍດີຂອງອາເມລິກາ.
ກ່ອນໜ້ານີ້, ທ່ານ ທຣຳ ສ້າງຄວາມບໍ່ພໍໃຈໃຫ້ແກ່ບັນດາຜູ້ນຳປະເທດເອີຣົບ ໂດຍການສະໜັບສະໜູນໃຫ້ທຸກປະເທດອອກຈາກການເປັນສະມາຊິກ EU ຄືກັບອັງກິດ. ນອກຈາກນີ້ ຍັງບອກອີກວ່າ: EU ເປັນເຄື່ອງມືຊ່ວຍສົ່ງເສີມໃຫ້ເຢຍລະມັນ ເຊິ່ງເປັນມະຫາອຳນາດທາງເສດຖະກິດ ຄອບງຳເອີຣົບທົ່ວທະວີບ ສົ່ງຜົນໃຫ້ທ່ານ ຍຸງເກີ ຕ້ອງອອກມາຕອບໂຕ້ທ່ານ ທຣຳ ຢ່າງຮຸນແຮງວ່າ: ຖ້າທ່ານ ທຣຳ ຍັງບໍ່ຢຸດໃຫ້ການສະໜັບສະໜູນການອອກຈາກ EU ຂອງອັງກິດ, ທ່ານຈະສະໜັບສະໜູນໃຫ້ແຕ່ລະລັດຂອງອາເມລິກາແຍກເປັນເອກະລາດ ສະທ້ອນໃຫ້ເຫັນເຖິງການພົວພັນທີ່ຊຸດໂຊມລະຫວ່າງ 2 ຝ່າຍ.
ເຖິງຢ່າງໃດກໍດີ, ນອກຈາກການເຂົ້າພົບທ່ານ ທັສ ແລະ ທ່ານ ຍຸງເກີ ແລ້ວ, ປະທານາທິບໍດີອາເມລິກາຍັງເຂົ້າພົບປະກັບທ່ານ ອັນໂຕນິໂອ ທາຈານີ ປະທານລັດຖະສະພາເອີຣົບ ແລະ ທ່ານນາງ ເຟເດຣິກາ ໂມເກຣິນີ ຫົວໜ້າຝ່າຍນະໂຍບາຍຕ່າງປະເທດ EU.
