ບາງມາດຕະການຂອງລັດເພື່ອຊຸກຍູ້ການພັດທະນາເສດຖະກິດ-ສັງຄົມ

 ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານຕໍ່ກອງປະຊຸມລັດຖະບານເປີດກວ້າງຄັ້ງທີ 1 ປີ 2019 ໃນອາທິດຜ່ານມານີ້ວ່າ: ເພື່ອປະຕິບັດວຽກງານຈຸດສຸມຕົ້ນຕໍໃຫ້ບັນລຸ, ບັນດາຂະແໜງການ ແລະ ທ້ອງຖິ່ນ ຈະໄດ້ສຸມໃສ່ປະຕິບັດໂຄງການລົງທຶນຂອງລັດທີ່ໄດ້ອະນຸມັດແລ້ວໃນແຜນປະຈຳປີ 2019 ເພື່ອໃຫ້ນຳໃຊ້ເຂົ້າໃນການເຄື່ອນໄຫວວຽກງານຕ່າງໆໄດ້ຕາມແຜນ, ຂະນະດຽວກັນນັ້ນ ກໍສືບຕໍ່ເລັ່ງປັບປຸງ 10 ຕົວຊີ້ວັດທີ່ຍັງຄ້າງຄາໃຫ້ສຳເລັດໃນທ້າຍປີນີ້, ໂດຍສະເພາະ ຕົວຊີ້ວັດທີ 4 ການຂຶ້ນທະບຽບຊັບສິນ, ຕົວຊີ້ວັດທີ 7 ການຊຳລະອາກອນ, ຕົວຊີ້ວັດທີ 9 ການບັງຄັບໃຊ້ສັນຍາ ແລະ ຕົວຊີ້ວັດທີ 10 ການແກ້ໄຂການລົ້ມລະລາຍ, ພ້ອມທັງອຳນວຍຄວາມສະດວກໃຫ້ແກ່ການລົງທຶນພາກເອກະຊົນໃຫ້ມີຄວາມວ່ອງໄວ, ງ່າຍດາຍ ແລະ ຕົ້ນທຶນຕ່ຳ. ຄຽງຄູ່ກັນນັ້ນກໍຈະສຸມໃສ່ຍູ້ແຮງການຜະລິດ ແລະ ການບໍລິການ ເປັນຕົ້ນ: ການຜະລິດກະສິກໍາເປັນສິນຄ້າທີ່ມີຕະຫລາດແລ້ວເຊັ່ນ: ເຂົ້າ, ພືດຜັກ, ສັດໃຫຍ່, ຊາ,​ ກາເຟ ແລະ ອື່ນໆ, ຊຸກຍູ້ການຜະລິດອຸດສາຫະກຳທີ່ມີທ່າແຮງສົ່ງອອກ ເຊັ່ນ: ການຜະລິດໄຟຟ້າ, ແຮ່ທາດ, ອຸດສາຫະກຳປຸງແຕ່ງ ໃນເຂດເສດຖະກິດພິເສດ, ພ້ອມທັງເລັ່ງແກ້ໄຂບັນຫາ ແລະ ຂອດອຸດຕັນຕໍ່ການສົ່ງເສີມທຸລະກິດຂະໜາດນ້ອຍ ແລະ ກາງ ເປັນຕົ້ນແມ່ນແຫລ່ງທຶນ, ກົນໄກ, ເຕັກນິກ, ການປະສານງານ ແລະ ອື່ນໆ. ໄປພ້ອມກັບຍູ້ແຮງການທ່ອງທ່ຽວ ໂດຍສະເພາະປີທ່ອງທ່ຽວລາວ-ຈີນ, ໂດຍເອົາໃຈໃສ່ແກ້ໄຂບັນຫາຂໍ້ຫຍຸ້ງຍາກ ເຊັ່ນ: ກົນໄກເຂົ້າ-ອອກເມືອງ, ປັບປຸງຄຸນນະພາບການບໍລິການ, ປັບປຸງສະຖານທີ່ທ່ອງທ່ຽວ, ສ້້າງຜະລິດຕະພັນການທ່ອງທ່ຽວທີ່ຫລາກຫລາຍມີຄຸນນະພາບສູງຂຶ້ນ, ເພີ່ມທະວີການໂຄສະນາ ແລະ ປັບປຸງເຄືອຂ່າຍການທ່ອງທ່ຽວໃຫ້ກວ້າງຂວາງເຂັ້ມແຂງ, ຄົ້ນຄວ້າສ້າງຍຸດທະສາດດຶງດູດນັກທ່ອງທ່ຽວ ທີ່ມີຄວາມສາມາດໃຊ້ຈ່າຍເງິນສູງໃຫ້ຫລາຍຂຶ້ນຕື່ມ ເພື່ອສ້າງລາຍຮັບເຂົ້າສູ່ປະເທດໃຫ້ຫລາຍຂຶ້ນ, ລວມທັງຊຸກຍູ້ການບໍລິການໃຫ້ຂະຫຍາຍຕົວເປັນຕົ້ນ: ການຂົນສົ່ງ, ການຄ້າຂາຍ, ການສົ່ງອອກ ໂດຍສະເພາະກະແສໄຟຟ້າ,​ ແຮ່ທາດ, ອຸດສາຫະກຳປຸງແຕ່ງ, ຜົນຜະລິດກະສິກຳເພື່ອດຶງດູດເງິນຕາເຂົ້າປະເທດ. ພ້ອມນັ້ນ ກໍສະເໜີຂັ້ນເທິງພິຈາລະນາແກ້ໄຂໜີ້ສິນບູລິມະສິດການລົງທຶນຂອງລັດ ເພື່ອສ້າງສະພາບຄ່ອງຕົວໃຫ້ພາກທຸລະກິດ, ທັງເປັນການອັດສີດເງິນເຂົ້າລະບົບເສດຖະກິດເພື່ອຊຸກຍູ້ການພັດທະນາ ແລະ ການເຕີບໂຕທາງດ້ານເສດຖະກິດ. ໄປຄຽງຄູ່ການປະຕິບັດມາດຕະການເຂັ້ມງວດດ້ານວິໄນການເງິນ-ເງິນຕາ ເຊັ່ນ: ຫັນການຈັດເກັບລາຍຮັບໄປສູ່ທັນສະໄໝ, ແກ້ໄຂການຂາດດຸນງົບປະມານ, ເພີ່ມລາຍຮັບຄຸ້ມຄອງລາຍຈ່າຍ, ແກ້ໄຂໜີ້ສິນ ແລະ ຄຸ້ມຄອງຕິດຕາມແຫລ່ງເງິນຕາຕ່າງປະເທດຈາກຂາອອກ, ການລົງທຶນ, ທຶນຊ່ວຍເຫລືອລ້າ, ການບໍລິການທະນາຄານ ແລະ ການບໍລິການອື່ນໆ, ຫລຸດຜ່ອນການນຳເຂົ້າທີ່ບໍ່ຈຳເປັນ, ສ້າງຄວາມເຊື່ອໝັ້ນດ້ານກົນໄກການບໍລິການ-ການເງິນຂອງທະນາຄານ, ຄຸ້ມຄອງແຫລ່ງເງິນຕາ ແລະ ອັດຕາແລກປ່ຽນຂອງຮ້ານແລກປ່ຽນຢ່າງເຂັ້ມງວດໃນທົ່ວປະເທດ.