ນາຍົກລັດຖະມົນຕີ ຫງວຽນຊວັນຟຸກ ຂອງຫວຽດນາມຈະເຂົ້າຮ່ວມກອງປະຊຸມ G20
ການນຳຂອງຫວຽດນາມ ຈະເຂົ້າຮ່ວມທຸກໆວາລະກອງປະຊຸມຂອງ G20 ໃນນາມເປັນແຂກຖືກເຊີນຂອງເຈົ້າພາບ ຍີ່ປຸ່ນ.
ນາຍົກລັດຖະມົນຕີ ຫງວຽນຊວັນຟຸກ ແລະ ພັນລະຍາ ໄດ້ເດີນທາງໄປເຂົ້າຮ່ວມກອງປະຊຸມ ສຸດຍອດ G20 ເທື່ອທີ່14 ຢູ່ Osaka ຍີ່ປຸ່ນ ໃນວັນທີ 1 ກໍລະກົດນີ້.
ຄາດວ່າທ່ານນາຍົກຂອງຫວຽດນາມຈະເຂົ້າຮ່ວມທຸກວາລະກອງປະຊຸມຂອງ G20 ແລະ ຈະປະກອບຄຳເຫັນໃສ່ຮ່າງຖະແຫຼງການຮ່ວມ. ກອງປະຊຸມ G20 ໃນປີນີ້ ຈະມີກອງປະຊຸມຍ່ອຍເຊັ່ນ: ຄົ້ນຄ້ວາເສດຖະກິດຂອງໂລກ, ການຄ້າ, ການລົງທຶນ, ປ່ຽນແປງໃໝ່ເສດຖະກິດ ແລະ ເສດຖະກິດດີຈິຕອນ, ການພັດທະນາແບບຍືນຍົງ, ວຽກເຮັດງານທຳ, ບັນຫາຂອງແມ່ຍິງ, ການແພດ, ສິ່ງແວດລ້ອມ, ພະລັງງານ ແລະ ການປ່ຽນແປງຂອງດິນຟ້າອາກາດ.
ຫວຽດນາມເປັນໜຶ່ງໃນ 8 ປະເທດທີ່ຖືກເຊື່ອເຊີນຈາກເຈົ້າພາບຍີ່ປຸ່ນ. ນອກຈາກຫວຽດນາມແລ້ວ, ບັນດາປະເທດທີ່ຖືກເຊີນຍັງມີ: ສິງກະໂປ, ໄທ, ຊີເລ, ຄເລັກ, ເຊເນກັນ, ສະເປນ, ເນເທິແລນ. ຫວຽດນາມໄດ້ເຂົ້າຮ່ວມກອງປະຊຸມ G20 ຄັ້ງທຳອິດແມ່ນປິ 2010 ຢູ່ Toronto Canada ໃນນາມເປັນປະທານ ASEAN ໃນປີນັ້ນ.
ຫວຽດນາມ ແລະ ຍີ່ປຸ່ນກຳລັງດຳເນີນການຮ່ວມມືໃນກອບຍຸດທະສາດທີ່ເລິກເຊີ່ງ ເພື່ອສັນຕິພາບ ແລະ ຄວາມວັດທະນາຖາວອນ ຢູ່ອາຊີທີ່ໄດ້ສ້າງຕັ້ງຂຶ້ນແຕ່ປີ 2014. ຍີ່ປຸ່ນເປັນຄູ່ຮ່ວມມືອັນດັບໜຶ່ງຂອງຫວຽດນາມ, ຊຶ່ງມີມູນຄ່າທາງການຄ້າໃນ 5 ເດືອນຕົ້ນປີ 2019 ນີ້ ແມ່ນ 15,3 ຕື້ໂດລາສະຫະລັດ.
ມາເຖິງເດືອນມິຖຸນາ 2018, ຊາວຫວຽດນາມທີ່ດຳລົງຊີວິດຢູ່ຍີ່ປຸ່ນແມ່ນ 300.000 ຄົນ, ຢູ່ອັນດັບທີສາມຂອງຄົນຕ່າງປະເທດດຳລົງຊີວິດຢູ່ຍີ່ປຸ່ນ ແລະ ປັດຈຸບັນມີຄົນຍີ່ປຸ່ນກຳລັງດຳລົງຊີວິດຢູ່ຫວຽດນາມມີເຖິງ 17.000 ຄົນ.
ຮຽບຮຽງໂດຍ: ລູກເມືອງພວນ
