ມະຫາວິທະຍາໄລແຫ່ງຊາດລາວ-ຫວຽດນາມ ຮ່ວມມືເປີດຫຼັກສູດປະລິນຍາໂທ ສາຂາ ເສດຖະສາດ ແລະ ການລົງທຶນ ຮຸ່ນທີ 1 ໃນສົກຮຽນ 2019-2020
ຄະນະເສດຖະສາດ ແລະ ບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດລາວ ຮ່ວມກັບ ມະຫາວິທະຍາໄລ ເສດຖະກິດແຫ່ງຊາດ ສສ ຫວຽດນາມ ເປີດໂຄງການຫຼັກສູດປະລິນຍາໂທ ສາຂາເສດຖະສາດ ແລະ ການລົງທຶນ ຮຸ່ນທີ 1 ໃນສົກຮຽນ 2019-2020. ເພື່ອກໍ່ສ້າງບຸກຄະລາກອນໃນສາຂາ ເສດຖະສາດການລົງທຶນໃຫ້ມີຄວາມຮູ້ຄວາມສາມາດໃນການວິເຄາະການລົງທຶນ ຫຼືສາມາດປະເມີນຜົນຂອງການລົງທຶນໄດ້ໃນລະດັບສູງ.
ສໍາລັບຫຼັກສູດດັ່ງກ່າວ ແມ່ນການຮຽນເປັນພາສາອັງກິດ ລວມມີ 15 ວິຊາຮຽນ ໂດຍໃຊ້ເວລາ 2 ປີ. ສ່ວນເງື່ອນໄຂຂອງຜູ້ທີ່ຈະສະໝັກແມ່ນຕ້ອງຈົບສາຂາເສດຖະສາດ ແລະ ບໍລິຫານທຸລະກິດ ໃນລະດັບປະລິນຍາຕີ ຄະແນນສະເລ່ຍ 3.00 ຂຶ້ນໄປ, ມີຄະແນນ TOEFL 500 ຂຶ້ນໄປ ແລະ IL 5,5 ຄະແນນຂຶ້ນໄປ. ຫຼັກສູດດັ່ງກ່າວ ໄດ້ເປີດຮັບຄໍາຮ້ອງສະໝັກໃນວັນທີ 17 ມິຖຸນາ-31 ກໍລະກົດນີ້ ແລະ ຈະສອບເສັງຄັດເລືອກ ໃນວັນທີ 4 ສິງຫາ 2019, ສາມາດພົວພັນໂດຍກົງທີ່ ພາກວິຊາການຄ້າ ຄະນະເສດຖະສາດ ແລະ ບໍລິຫານທຸລະກິດ ຫຼືດາວໂຫຼດຄໍາຮ້ອງ, ແບບຟອມສະໝັກ ແລະ ລາຍລະອຽດເງື່ອນໄຂໄດ້ທີ່ Facebook: FEB-Graduate-Programe.
